சோனியா தான் அடுத்த பிரதமர்: ஹர்கிசன் சிங்

டெல்லி:

அடுத்த பிரதமராக சோனியா காந்தி பதவியேற்பார் என மார்க்சிஸ்ட் கம்யூனிஸ்ட் கட்சியின் தலைவர் ஹர்கிசன்சிங் சுர்ஜித் அறிவித்தார்.

காங்கிரஸ் தலைமையில் ஆட்சியமைக்க கூட்டணிக் கட்சிகளுடன் தீவிரமாக ஆலோசனைகளில் ஈடுபட்டுள்ளார்சுர்ஜித்.

காங்கிரஸ் கூட்டணி 217 இடங்களில் வென்றுள்ளது. இடதுசாரிக் கட்சிகள் 62 இடங்களைப் பிடித்துள்ளன. இவைஇரண்டும் இணைந்து 279 எம்.பிக்களுடன் ஆட்சி அமைக்க முடியும் (ஆட்சி அமைக்க 272 எம்.பிக்கள் தேவை)

ஆனாலும் உத்தரப் பிரதேசத்தில் 34 இடங்களில் வென்றுள்ள முலாயம் சிங்கின் சமாஜ்வாடிக் கட்சி, 20இடங்களைப் பிடித்துள்ள மாயாவதியில் பகுஜன் சமாஜ் கட்சி ஆகியோரையும் இணைத்து அதிக மெஜாரிட்டியுடன்நிலையான அரசை அமைக்க இடதுசாரிக் கட்சிகள் முயன்று வருகின்றன.

மாயாவதியின் ஆதரவு கிடைத்துவிட்ட சூழலில் முலாயம் சிங்குடன் மார்க்சிஸ்ட் தலைவர் ஹர்கிசன் சிங் சுர்ஜித்பேச்சு நடத்தி வருகிறார். ஆனால், தேர்தலில் பாஜகவை மறைமுகமாக ஆதரித்த முலாயமின் ஆதரவுஇல்லாமலேயே ஆட்சி அமைக்கலாம் என மூத்த காங்கிரஸ் தலைவர்கள் விரும்புகின்றனர்.

ஆனால், இதை சுர்ஜித் ஏற்கவில்லை. அந்தக் கட்சியையும் சேர்த்துக் கொள்ளலாம் என வலியுறுத்தி வருகிறார். இந்நிலையில் முலாயம் சிங், அவரது வலதுகரமான அமர் சிங் மற்றும் தேசியவாதக் கட்சியின் தலைவர் சரத்பவாரும்ஆகியோர் சுர்ஜித்துடன் கூட்டாக ஆலோசனை நடத்தினர்.

இதையடுத்து முன்னாள் பிரதமர் வி.பி. சிங்கும் சுர்ஜித்தும் ஆலோசனை நடத்தினர்.

காலை முழுவதும் இந்த சந்திப்புகளை நடத்திய சுர்ஜித் பின்னர் நிருபர்களைச் சந்தித்தார். அப்போது சோனியாகாந்தி தான் அடுத்த அரசுக்கு தலைமை வகிப்பார் என்றார்.

சோனியா தவிர வேறு யாருடைய பெயர் பரிசீலனையில் உள்ளது என நிருபர்கள் கேட்டபோது, எதற்காகஇன்னொரு பெயரையும் பரிசீலிக்க வேண்டும், பெரிய பெயர் பட்டியலே வெளியிட வேண்டும் என்றுநினைக்கிறீர்களா என்று பதில் தந்தார் சுர்ஜித்.

மேலும் ஆட்சியில் சமாஜ்வாடி கட்சியும் பங்கேற்கும் என்றார். அதே நேரத்தில் இடதுசாரிகளும் அமைச்சரவையில்பங்கேற்பார்களா என்ற கேள்விக்கு நேரடி பதில் தரவில்லை.

இதற்கிடையே முன்னாள் நிதியமைச்சர் மன்மோகன் சிங் தலைமையில் கூட்டணி ஆட்சிக்கான குறைந்தபட்சசெயல் திட்டத்தை வகுக்கும் வேலையை காங்கிரஸ் ஆரம்பித்துவிட்டது.

காங்கிரஸ் கூட்டணியில் இடதுசாரிகள் பங்கேற்றால் பொருளாதாரக் கொள்கைகள், தனியார்மயமாக்கல்விஷயத்தில் மோதல் எழும் என்பதால் அரசை நடத்துவது சோனியாவுக்கு அவ்வளவு எளிதாக இருக்கப்போவதில்லை.