மேட்டூர்: நீர் இருப்பு 80 அடியைத் தாண்டியது

சேலம்:

மேட்டூர் அணைக்கு வரும் நீரின் வரத்து கணிசமாக உயர்ந்துள்ளதால் அணையின் நீர்மட்டம் வேகமாக உயர்ந்து வருகிறது.வெள்ளிக்கிழமை நண்பகல் நிலவரப்படி நீர் இருப்பு 80.03 அடியாக உள்ளது.

கர்நாடகத்தில் கடந்த சில நாட்களாக மீண்டும் கன மழை பெய்து வருவதால் கபினி அணையிலிருந்து கூடுதல் நீர் திறந்துவிடப்பட்டுள்ளது. விநாடிக்கு 43,643 கன அடி நீர் திறந்து விடப்படுகிறது.

இதையடுத்து மேட்டூர் அணைக்கு வரும் நீரின் அளவு விநாடிக்கு 30,290 கன அடியாக உள்ளது. அணையிலிருந்து விநாடிக்கு12,000 கன அடி நீர் திறந்து விடப்படுகிறது. அணையின் நீர் இருப்பு 80.03 அடியாக உள்ளது.

கர்நாடகத்தின் முக்கிய அணையான கிருஷ்ணராஜ சாகர் அணை இன்னும் ஓரிரு நாட்களில் நிரம்பி விடும் என்றுஎதிர்பார்க்கப்படுகிறது. இதைத் தொடர்ந்து தமிழகத்திற்கு மேலும் அதிக நீரை கர்நாடகம் திறந்து விடும் என்று தெரிகிறது.