மும்பையில் கட்டடம் இடிந்து 5 பேர் பலி

மும்பை:

மும்பையில் மேலும் ஒரு பழைய கட்டடம் இடிந்து விழுந்ததில் 5 பேர் பலியாயினர். மேலும் 13 பேர் படுகாயமடைந்தனர்.

மும்பையில் சமீபத்தில் பெய்த கன மழை காரணமாக பழைய கட்டடங்கள் அனைத்தும் மோசமான நிலையை அடைந்துள்ளன.கடந்த 15 நாட்களில் 3 கட்டடங்கள் இடிந்து விழுந்து பலர் பலியாகியுள்ளனர்.

இந் நிலையில் நேற்றிரவு தெற்கு மும்பையில் நியூ மெரைன் லைன்ஸ் பகுதியில் பஞ்சரத்னா ஹோட்டலுக்கு அருகே ஒரு பழைய 3மாடிக் கட்டடம் இடிந்து விழுந்தது.

இதில் 5 பேர் இடிபாடுகளில் சிக்கி பலியாயினர். மேலும் 13 பேர் பலத்த காயங்களுடன் மீட்கப்பட்டு மருத்துவமனையில்அனுமதிக்கப்பட்டுள்ளனர். பலியானவர்களில் 3 பேர் பெண்கள் ஆவர்.

இரு வாரங்களுக்கு முன் நாக்பாடா தெம்கூர் ரோட்டில் நூற்றாண்டு பழைய கட்டடம் ஒன்று இடிந்து 11 பேர் பலியாயினர்.டார்டியோ பகுதியில் ஒரு கட்டடம் இடிந்து பலர் காயமடைந்தனர் என்பது குறிப்பிடத்தக்கது.