கொழும்பில் குண்டுவெடிப்பு - 7 பேர் பலி

கொழும்பு:கொழும்பின் புறநகர்ப் பகுதியில் ராணுவ டிரக்கை குறி வைத்து நடந்த குண்டுவெடிப்பில் 7 பேர் உடல் சிதறி உயிரிழந்தனர். இதனால் கொழும்பில் பதட்டம் அதிகரித்துள்ளது.

கொழும்பின் புறநகர்ப் பகுதி ரத்னமாலா. நேற்று மாலை இப்பகுதியில் பெலிக்கடே சந்திப்பு பகுதியில், கொழும்பு-காலே நெடுஞ்சாலையில் ராணுவ வீரர்களை ஏற்றிக் கொண்டு ஒரு டிரக் வந்து கொண்டிருந்தது.

அப்போது சாலையோரம் வைக்கப்பட்டிருந்த கண்ணி வெடி ரிமோட் கண்ட்ரோல் மூலம் வெடிக்கச் செய்யப்பட்டது. இந்த பயங்கர குண்டுவெடிப்பில், 7 பேர் உயிரிழந்தனர். 4 அதிரடிப்படை ராணுவ வீரர்கள் உள்ளிட்ட 14 பேர் படுகாயமடைந்தனர்.

இச்சம்பவத்தால் அப்பகுதியே போர்க்களம் போலக் காணப்பட்டது. இச்சம்பவத்தைத் தொடர்ந்து கொழும்பில் பாதுகாப்பு பலப்படுத்தப்பட்டுள்ளது.

சம்பவம் நடந்த இடத்திற்கு அருகில்தான் விமானப்படை விமான நிலையம் உள்ளது குறிப்பிடத்தக்கது.