3வது அணிக்கு துணை ஜனாதிபதி-பாஜக திட்டம்

டெல்லி:

ஷெகாவத்துக்கு குடியரசுத் தலைவர் தேர்தலில் ஆதரவு தந்தால், துணை குடியரசுத் தலைவர் பதவியை 3வது அணியான ஐக்கிய தேசிய முற்போக்குக் கூட்டணிக்கு தரலாம் என்று தேசிய ஜனநாயகக் கூட்டணி தீர்மானித்துள்ளதாக தெரிகிறது.

குடியரசுத் தலைவர் தேர்தலில் காங்கிரஸ் கூட்டணி சார்பில் பிரதீபா பாட்டீலும், தேசிய ஜனநாயகக் கூட்டணியின் ஆதரவுடன் பைரான் சிங் ஷெகாவத்தும் போட்டியிடுகின்றனர்.

தேசிய ஜனநாயகக் கூட்டணிக்கு பெரும் பின்னடைவாக, கூட்டணியில் இடம் பெற்றுள்ள சிவசேனா, பிரதீபா பாட்டீலுக்கு ஆதரவு தருவதாக அறிவித்து விட்டது. இதனால் தேசிய ஜனநாயகக் கூட்டணியிலிருந்து சிவசேனா விலகுவது உறுதியாகி விட்டது.

இந்த நிலையில், ஷெகாவத்துக்கு 3வது அணியின் ஆதரவைப் பெறும் முயற்சியில் தேசிய ஜனநாயகக் கூட்டணி இறங்கியுள்ளது.

இதுதவிர காங்கிரஸ் கூட்டணியில் இடம் பெறாத பிற கட்சிகளின் ஆதரவையும் பெற தேசிய ஜனநாயகக் கூட்டணி தீவிரமாக முயற்சித்து வருகிறது.

இந்த நிலையில், கணிசமான வாக்குகளைக் ெகாண்டுள்ள 3வது அணியான ஐக்கிய தேசிய முற்போக்குக் கூட்டணியின் ஆதரவை ஷெகாவத்துக்குப் பெற துணை குடியரசுத் தலைவர் பதவியை 3வது அணிக்கு ஒதுக்க தேசிய ஜனநாயகக் கூட்டணி தீர்மானித்துள்ளது.

இதுதொடர்பாக டெல்லியில் பாஜக தலைவர்கள் கூடி ஆலோசித்து முடிவெடுத்துள்ளனர். இந்த முடிவுக்கு தேசிய ஜனநாயகக் கூட்டணித் தலைவர்களும் சம்மதித்துள்ளதாக கூறப்படுகிறது.

ஷெகாவத்தை ஆதரிக்க 3வது அணி முன்வந்தால், துணை குடியரசுத் தலைவர் தேர்தலில் அந்த அணி சார்பில் நிறுத்தப்படுவோருக்கு ஆதரவு தர தேசிய ஜனநாயகக் கூட்டணி தற்போது தீர்மானித்துள்ளது.

பிரதீபா பாட்டீலை ஆதரிக்க மாட்டோம் என்று கூறியுள்ள 3வது அணி தலைவர்கள், ஷெகாவத்துக்கும் தங்களது ஆதரவு இல்லை என்று கூறியிருப்பது குறிப்பிடத்தக்கது. இருவருக்கும் ஆதரவு தராமல் தேர்தலைப் புறக்கணிப்பது என்ற முடிவை 3வது அணி எடுக்கவுள்ளதாக அதிமுக பொதுச் செயலாளர் ஜெயலலிதா சமீபத்தில் சூசகமாக தெரிவித்தார்.

இந்த நிலையில்தான் 3வது அணித் தலைவர்களின் மனதை மாற்றி கூட்டணியின் ஆதரவை ஷெகாவத்துக்குப் பெற பாஜக களம் இறங்கியுள்ளது. ஆந்திர மாநில முன்னாள் முதல்வர் சந்திரபாபு நாயுடு தற்போது அமெரிக்கா சென்றுள்ளார். அவர் வந்த பின்னர் இதுதொடர்பாக அவருடனும், இதர தலைவர்களுடனும், தேசிய ஜனநாயகக் கூட்டணி தலைவர்கள் பேச்சுவார்த்தை நடத்தவுள்ளனர்.

இருப்பினும், துணை குடியரசுத் தலைவர் பதவியை 3வது அணி ஏற்குமா என்பது உறுதியாக தெரிவில்லை.