'செக்ஸ்': முதலிடத்தில் மெக்சிகோ; 3வது இடத்தில் இந்தியர்கள்!!!

சென்னை:

'செக்ஸ் 'வைத்துக் கொள்வதில் உலகிலேயே மெக்சிகர்கள்தான் முதலிடத்தில் உள்ளனர். இந்தியர்களுக்கு இதில் 3வது இடம் கிடைத்துள்ளது. ஆனால் பார்ட்னர்களை திருப்திப்படுத்துவதில் உலக சராசரியை விட இந்தியர்களின் சராசரி அதிகம் உள்ளதாக ஆய்வு ஒன்றில் தெரிய வந்துள்ளது.

ஆணுறைகள் உள்ளிட்ட கருத் தடுப்பு சாதனங்களைத் தயாரிக்கும் பிரபல டியூரக்ஸ் நிறுவனம் சமீபத்தில் ஒரு ஆய்வை நடத்தியது. செக்ஸ் வைத்துக் கொள்வதில் உலக அளவில் யார் நம்பர் ஒன், பார்ட்னர்களைத் திருப்திப்படுத்துவதில் யார் சிறந்தவர்கள் என்பது உள்ளிட்ட பல்வேறு கேள்விகள் அடங்கிய கருத்துக் கணிப்பை இது நடத்தியது.

26 நாடுகளில் 26,000 பேரிடம் இந்தக் கருத்துக் கணிப்பு நடத்தப்பட்டது.

இதில் உலக அளவில் செக்ஸ் வைத்துக் கொள்வதில் சிறந்தவர்களாக மெக்சிகோ நாட்டினர் உருவெடுத்துள்ளனர். 80 சதவீத மெக்சிகர்கள் செக்ஸில் திருப்தியுடன் ஈடுபடுவதாக தெரிவித்துள்ளனர்.

2வது இடம் கிரேக்கர்களுக்குக் கிடைத்துள்ளது. இவர்களின் சராசரி அளவு 76 சதவீதமாகும். இந்தியர்கள் 3வது இடத்தில் உள்ளனர். 74 சதவீத இந்தியர்கள் செக்ஸில் பூரண திருப்தியுடன் ஈடுபடுவதாக தெரிவித்துள்ளனராம்.

அதேசமயம், செக்ஸில் பூரண திருப்தியுடையவர்களின் உலக சராசரி 58 சதவீதம்தான். அதை விட இந்தியர்களின் திருப்தி சராசரி அதிகம் என்பது குறிப்பிடத்தக்கது.

ஒன்றுக்கும் மேற்பட்டோரிடம் செக்ஸ் வைத்துக் கொள்வதில் இந்தியர்கள் சற்று தயக்கம் காட்டுகிறார்களாம். சராசரியாக ஒரு இந்திய ஆண், அதிகபட்சம் 6 பெண்களை காதலியாக வைத்திருக்கிறாராம் (லியாகத் அலி போன்றவர்கள் இதில் விதி விலக்கானவர்கள்!!).

இதுவே இங்கிலாந்தில், ஒரு ஆணுக்கு குறைந்தது 16 காதலிகளும், பெண்ணுக்கு குறைந்தது 10 காதலர்களும் இருக்கிறார்களாம்.

உலக அளவில் ஒரு ஆண் 13 பெண்களுடனும், ஒரு பெண் 7 ஆண்களுடனும் உறவு கொள்வதாக தெரிய வந்துள்ளது.

ஒரே பார்ட்னருடன் உறவு கொள்பவர்கள், உறவில் படு திருப்தியாக ஈடுபடுகிறார்களாம். 19 சதவீதம் பேர் வாரத்திற்கு 5 முறை உறவு வைத்துக் கொள்கிறார்களாம்.

இந்தியாவில் 9 சதவீதம் பேர் வைப்ரேட்டர்களை பயன்படுத்துகிறார்கள். 13 சதவீதம் பேர் உபயோகித்துப் பார்க்கலாம் என நினைத்துள்ளார்களாம்.