ஜெயலலிதாவால் மூன்றாவது அணி படும்பாடு

டெல்லி:

டெல்லியில் நேற்று நடக்கவிருந்த மூன்றாவது அணியின் கூட்டம் ரத்து செய்யப்பட்டுவிட்டது.

ஐக்கிய தேசிய முற்போக்கு கூட்டணி என்ற பெயரில் அதிமுக பொதுச் செயலாளர் ஜெயலலிதா, தெலுங்கு தேசம் தலைவர் நாயுடு, சமாஜ்வாடிக் கட்சியின் தலைவர் முலாயம் சிங் யாதவ் ஆகியோர் முன்னின்று இந்தக் கூட்டணியை ஆரம்பித்தனர்.

ஆனால், ஜெயலலிதா வழக்கம்போல் தனது வேலையைக் காட்டினார்.

இந்தக் கூட்டணியில் இருந்து கொண்டே பாஜகவுடன் ரகசியமாய் கைகோர்த்தார். பாஜகவுக்கு ஆதரவான முடிவுகளை எடுத்த அவர் ஜனாதிபதி தேர்தலுக்கு தனது அணியின் சார்பில் வேடாபாளரை அறிவித்துவிட்டு பாஜக வேட்பாளருக்கு அதிமுக எம்பி, எம்எல்ஏக்களை வாக்களிக்க வைத்தார்.

கேட்டால் தனக்கே தெரியாமல் அதிமுகவினர் பாஜகவுக்கு ஓட்டு போட்டுவிட்டதாக காதில் ஓட்டை போட்டார்.

இதையடுத்து நாயுடு, முலாயம் மற்றும் ஜெயலலிதாவுக்கு இடையே முட்டல் மோதல்கள் உருவாயின.

இதனால் மூன்றாவது அணி உருவான வேகத்திலேயே கலகலகத்துப் போனது. ஜெயலலிதாவிடம் ஏற்கனவே மூக்கறுபட்ட காங்கிரசும், பாஜகவும் மூன்றாவது அணித் தலைவர்களுக்கு ஏற்பட்ட நிலையை பார்த்து சிரிக்கும் நிலை ஏற்பட்டது.

இந் நிலையில் இந்த கலகல அணியின் கூட்டம் நேற்று டெல்லியில் நடப்பதாக இருந்தது. ஆனால், ஜெயலலிதா டெல்லிக்கு போகவில்லை. இந் நிலையில் கூட்டம் வரும் 23ம் தேதிக்கு ஒத்தி வைக்கப்பட்டுள்ளது.

இதிலாவது பங்கேற்க வருமாறு ஜெயலலிதாவுக்கு ஹரியாணாவின் மூத்த தலைவர் ஓம் பிரகாஷ் செளதாலா அழைப்பு விடுத்துள்ளார்.

ஜெயலலிதா செய்த குழப்பத்தால் இந்தக் கூட்டணிக்கு நிர்வாகிகள் கூட இன்னும் நியமிக்கப்படவில்லை என்பது குறிப்பிடத்தக்கது.

பாஜகவுடன் ரகசிய கூட்டு வைத்துள்ள ஜெயலலிதா இந்தக் கூட்டணியின் அமைப்பாளர் பதவியை கேட்டு வருகிறார். ஆனால், ஜெயலலிதாவை நம்பி அந்தப் பொறுப்பைத் தர பிற தலைவர்கள் விரும்பவில்லை.

கூட்டணிக்கு தலைவராக இருந்து கொண்டு, மக்களவைத் தேர்தல் நேரத்தில் பாஜகவுடன் கூட்டணி என்று கூட ஜெயலலிதா அறிவிப்பார் என்பதாலும், அவர் எப்போது என்ன செய்வார் என்று யாராலும் யூகிக்க முடியாது என்பதாலும் ஜெயலலிதாவை நம்ப மற்ற தலைவர்கள் அவ்வளவு சீக்கிரத்தில் தயாராக இல்லை.

இதனால் கூட்டணியின் அமைப்பாளர் பதவி ஜெயலலிதாவுக்கு கிடைப்பது பெரும் சந்தேகமே. இதனால் தான் கூட்டணியின் முக்கிய கூட்டங்களை ஜெயலலிதா புறக்கணிக்க ஆரம்பித்துள்ளார்.