சென்னையிலிருந்து டொரண்டோ, நியூயார்க்குக்கு ஜெட் ஏர்வேஸ் புதிய சேவை

சென்னை: தனியார் விமான நிறுவனமான ஜெட் ஏர்வேஸ் சென்னையிலிருந்து டொராண்டோ, நியூயார்க் நகரங்களுக்கு டிசம்பர் 6ம் தேதியிலிருந்து தினமும் விமானங்களை இயக்க முடிவு செய்துள்ளது.

இந்தியாவின் மிகப்பெரிய தனியார் விமான நிறுவனமான ஜெட் ஏர்வேஸ் உள்நாடுகளில் மட்டுமின்றி, வெளிநாடுகளுக்கும் விமானங்களை இயக்கி வருகிறது.

இந்நிறுவனம் வரும் டிசம்பர் 6ம் தேதி முதல் சென்னையிலிருந்து டொராண்டோ, நியூயார்க் ஆகிய இடங்களுக்கு பிரஸல்ஸ் வழியாக தினசரி விமானங்களை இயக்க முடிவு செய்துள்ளது.

டிசம்பர் 6 முதல் சென்னையிலிருந்து டொராண்டோவிற்கு நள்ளிரவு 1.15 மணிக்கு புறப்படும் இந்த விமானம் (9W 226 ) காலை 7.15 மணிக்கு பிரஸல்ஸ் சென்றடையும். அங்கிருந்து 9.15 மணிக்கு புறப்பட்டு டொராண்டோவின் பியர்சன் விமான நிலையத்தை பிற்பகல் 12.55 மணிக்கு போய்ச் சேரும்.

டொரான்டோவில் இருந்து இரவு 2.30 மணிக்குக் கிளம்பும் விமானம் மறுநாள் காலை 9.30 மணிக்கு பிரஸல்ஸ் வந்தடையும். அங்கிருந்து 11.30க்குப் புறப்பட்டு பகல் 1.40 மணிக்கு சென்னை வந்தடையும்.

இந்த விமானத்தில் எகானமி கிளாஸ் கட்டணம் ரூ. 36,000 ஆகவும், பிஸினஸ் கிளாஸ் கட்டணம் ரூ. 1.57 லட்சமாகவும் இருக்கும்.

இந்த மார்க்கத்தில் ஏர்பஸ் 320 ரக விமானங்களை ஜெட் ஏர்வேஸ் பயன்படுத்தவுள்ளது. பிஸினஸ் கிளாசில் 30 இருக்கைகளும் எகானமி கிளாசில் 190 இருக்கைகளும் இருக்கும்.