ராஜ்யசபா-22 ஆண்டுக்குப் பின் முதல் முறையாக வாக்குப் பதிவு

சென்னை: தமிழகத்தில் 1986ம் ஆண்டுக்குப் பின்னர் முதல் முறையாக வருகிற ராஜ்யசபா தேர்தலில் வாக்குப் பதிவு நடைபெறும் சூழ்நிலை உருவாகியுள்ளது.

தமிழக ராஜ்யசபா தேர்தல் களம் பெரும் விறுவிறுப்பை ஏற்படுத்தியுள்ளது. மொத்தம் உள்ள 6 இடங்களுக்கு 7 பேர் களத்தில் நிற்கும் நிலை உருவாகியுள்ளது.

திமுக கூட்டணிக்கு 4 இடங்களில் போட்டியின்றி வெல்ல முடியும். அதிமுக கூட்டணி ஒரு இடத்தில் போட்டியின்றி வெல்ல முடியும்.

ஆனால் திடீர் திருப்பமாக திமுக கூட்டணி 5 இடத்திலும் அதிமுக அணி 2 இடங்களில் போட்டியிடுகின்றன.

இதனால் 6 பதவிகளுக்கு 7 பேர் களத்தில் நிற்கும் நிலை உருவாகியுள்ளது. எனவே வாக்கெடுப்பு நடத்தப்பட வேண்டிய சூழ்நிலை ஏற்பட்டுள்ளது.

1986ம் ஆண்டு தமிழக ராஜ்யசபா தேர்தலில் தான் கடைசியாக வாக்குப் பதிவு நடந்தது. அதன் பின்னர் எந்தத் தேர்தலிலும் வாக்குப் பதிவு நடக்கவில்லை.

1986ம் ஆண்டும் 6 இடத்திற்குத்தான் தேர்தல் நடந்தது. அப்போது 7 பேர் களத்தில் இருந்தனர். ஜனதா கட்சி சார்பில் இரா. செழியன் நிறுத்தப்பட்டார். அவரை திமுக வேட்பாளர் டி.ஆர்.பாலு தோற்கடித்தார்.

அதன் பின்னர் தற்போது முதல் முறையாக வாக்குப் பதிவு நடைபெறும் சூழல் ஏற்பட்டுள்ளது குறிப்பிடத்தக்கது.