டெல்லி, மும்பை-துபாய் ஜெட் ஏர்வேஸ் விமானம்

துபாய்: டெல்லி, மும்பையிலிருந்து அடுத்த மாதம் முதல் துபாய்க்கு நேரடி விமான சேவையை ஜெட் ஏர்வேஸ் தொடங்குகிறது.

கடந்த ஜனவரி மாதம் வளைகுடா நாடுகளுக்கான தனது சேவையை ஜெட் ஏர்வேஸ் தொடங்கியது. தற்போது குவைத், பஹ்ரைன், மஸ்கட், தோஹா ஆகிய நாடுகளுக்கு ஜெட் ஏர்வேஸ் விமான சேவையை மேற்கொண்டுள்ளது.

ரியாத், ஜெட்டா நகரங்களுக்கும் தனது சேவையை விரிவுபடுத்தவுள்ளது. இந்த நிலையில், அடுத்த மாதம் முதல் மும்பை, டெல்லியிலிருந்து துபாய்க்கு நேரடி சேவையை மேற்கொள்ளவுள்ளதாக ஜெட் நிறுவனத்தின் தலைவர் நரேஷ் கோயல் கூறியுள்ளார்.

இதுகுறித்து இஸ்தான்புல்லில் அவர் கூறுகையில், ஜூன் 14ம் தேதி முதல் மும்பையிலிருந்து ஷாங்காய் வழியாக சான்பிரான்சிஸ்கோவுக்குப் புதிய தினசரி சேவையை தொடங்கவுள்ளோம்.

இந்தியா, மலேசியா இடையிலான விமான சேவையை அதிகரிக்கும் வகையில், மலேசிய ஏர்லைன்ஸ் நிறுவனத்துடன் பேசி வருகிறோம் என்றார் கோயல்.