மேடை நடனத்திற்குத் தடை: கண்டித்து கலைஞர்கள் உண்ணாவிரதம்

கடலூர்: விழாக்களில் நடைபெறும் மேடை நடனங்களில் ஆபாசம் பெருகிவிட்டதாக கூறி மேடை நடன நிகழ்ச்சிகளுக்கு போலீஸார் தடை விதித்ததை எதிர்த்து கடலூரில் எம்.ஜி.ஆர், கமல், ரஜினி, விஜயகாந்த், வடிவேலு, குஷ்பு, சிம்ரன் வேடங்களில் நடனக் கலைஞர்கள் உண்ணாவிரதம் மேற்கொண்டனர். இதனால் அங்கு பரபரப்பு ஏற்பட்டது.

கிராமப்புறங்களில் நடைபெறும் கோவில் திருவிழாக்கள் உள்ளிட்டவற்றில் இப்போதெல்லாம் மேடை நடனங்கள் இடம் பெறுவது வழக்கமாகி விட்டது.

பிரபல சினிமா கலைஞர்கள் வேடத்தில் நடனக் கலைஞர்கள் ஆடுவதால் சினிமா கலைஞர்களை நேரில் பார்த்ததைப் போன்ற திருப்தி மக்களுக்குக் கிடைக்கிறது. ஆனால் ஓரிரு இடங்களில் இதில் ஆபாசத்தைப் புகுத்தி விடுகிறார்கள். அரை குறை ஆடைகளுடன் பெண் கலைஞர்கள் நடனமாடுவதால் இப்படிப்பட்ட நிகழ்ச்சிகளுக்குத் தடை விதிக்க வேண்டும் என போலீஸாருக்கு கோரிக்கை வந்தது.

இதையடுத்து இதுபோன்ற மேடை நடன நிகழ்ச்சிகளுக்கு தற்போது போலீஸார் தடை விதித்து வருகின்றனர்.

இதை எதிர்த்து கடலூர் மாவட்ட மேடை நடனக் கலைஞர்கள் நலச் சங்கம் சார்பில் நேற்று மாவட்ட ஆட்சித் தலைவர் அலுவலகம் எதிரே நூதன உண்ணாவிரதப் போராட்டம் நடைபெற்றது.

300க்கும் மேற்பட்டோர் கலந்து கொண்ட இந்த உண்ணாவிரதத்தில் எம்.ஜி.ஆர், கமல், ரஜினி, விஜயகாந்த், வடிவேலு, பாக்யராஜ், சிம்ரன், குஷ்பு உள்ளிட்ட பிரபலங்களின் வேடங்களுடன் கலைஞர்கள் கலந்து கொண்டனர்.

எம்.ஜி.ஆர். வேடத்தில் இருந்த அன்பு என்ற கலைஞர் கூறுகையில், போலீஸாரின் இந்தத் தடையால் எங்களது ஒட்டு மொத்த குடும்பங்களும் பாதிக்கப்பட்டுள்ளன. அனைவரும் பட்டினி கிடக்கும் நிலையில் உள்ளோம்.

எங்களுக்கு தெரிந்தது இது ஒன்றுதான். இது எங்களின் வாழ்க்கை உயிர் நாடி. எங்கோ ஒரு சிலர் செய்யும் தவறால் ஒட்டுமொத்தமாக அனைவரையும் தண்டிக்கக் கூடாது.

தற்போது ஆடி மாதம். கோயில் விழாக்கள் நிறைய நடக்கிறது. எங்களுக்கும் கச்சேரிகள் நிறைய வருகிறது. ஆனால் போலீஸாரின் தடையால் எங்களால் அவற்றை ஏற்றுக் கொள்ள முடியாத நிலை ஏற்பட்டுள்ளது என்றார் வருத்தத்துடன்.

புன்னகை சிந்தும் முகத்துடன் மக்களை மகிழ்விக்கும் வகையில் வேடமிட்டு நடனம் ஆடும் இந்தக் கலைஞர்கள், முகம் நிறைய சோகத்துடன், குறிப்பாக கவலை படர்ந்த முகத்துடன் இருந்த 'எம்.ஜி.ஆரைப்' பார்த்தபோது, காண வந்த மக்களுக்கும் சோகத்தை ஏற்படுத்தியது உண்மை.