சிரஞ்சீவி கட்சியைப் பதிவு செய்ய தடை நீங்கியது

டெல்லி: பிரஜா ராஜ்ஜியம் என்ற பெயரில் கட்சியைப் பதிவு செய்ய விண்ணப்பித்திருந்தவர் தனது மனுவை வாபஸ் பெற்றதால், தெலுங்கு மெகா ஸ்டார் சிரஞ்சீவி தனது பிரஜா ராஜ்ஜியம் கட்சியைப் பதிவு செய்ய இருந்த தடை நீங்கி விட்டது.

சிரஞ்சீவி சமீபத்தில் திருப்பதியில், தனது பிரஜா ராஜ்ஜியம் என்ற கட்சியைத் தொடங்கினார். இதையடுத்து கட்சியைப் பதிவு செய்ய தலைமைத் தேர்தல் ஆணையத்தில் விண்ணப்பித்தார்.

ஆனால் அதே பெயரில் ஏற்கனவே சென்னகிருஷ்ணா விண்ணப்பம் கொடுத்திருந்ததால் சிரஞ்சீவியின் கட்சிப் பெயரை பதிவு செய்வதில் சிக்கல் ஏற்பட்டது.

இந்த நிலையில், சென்ன கிருஷ்ணா, தேர்தல் ஆணையத்தை அணுகி தனது முந்தைய விண்ணப்பத்தை திரும்பப் பெறுவதாக கூறி மனு செய்தார். இதையடுத்து சிரஞ்சீவி தனது கட்சிப் பெயரை பதிவு செய்ய ஏற்பட்ட தடை விலகி விட்டது.