சோனம் வாங்சுக் மருத்துவமனை அறையில் உளவு பார்த்த போலீஸ்? மனைவி சொன்ன திடுக்கிடும் தகவல்

டெல்லி: நீட் தேர்வு முறைகேடுகளுக்கு எதிர்ப்பு தெரிவித்து டெல்லி ஜந்தர் மந்தரில் தொடர் உண்ணாவிரதப் போராட்டம் நடத்தி வந்த சமூக ஆர்வலர் சோனம் வாங்சுக், சஃப்தர்ஜங் அரசு மருத்துவமனையில் அனுமதிக்கப்பட்டுள்ளார்.

அவரை தனியார் மேதாந்தா மருத்துவமனைக்கு மாற்றக் கோரி அவரது மனைவி கீதாஞ்சலி ஆங்மோ தாக்கல் செய்த மனுவை விசாரித்த டெல்லி உயர் நீதிமன்றம், இடைக்கால நிவாரணம் வழங்க மறுத்துவிட்டது. மேலும், வாங்சுக் சட்டவிரோத காவலில் வைக்கப்படவில்லை என்றும், அவரது உடல்நிலையைக் கருத்தில் கொண்டே அரசு இந்த நடவடிக்கையை எடுத்துள்ளதாகவும் நீதிமன்றம் தெளிவுபடுத்தியுள்ளது.

அறையிலேயே இருக்கும் போலீஸ்: மனைவி பரபரப்பு குற்றச்சாட்டு

டெல்லி உயர் நீதிமன்றத்தில் சோனம் வாங்சுக் தரப்பில் ஆஜரான மூத்த வழக்கறிஞர் கபில் சிபல் மற்றும் வாங்சுக்கின் மனைவி கீதாஞ்சலி ஆங்மோ ஆகியோர், சஃப்தர்ஜங் மருத்துவமனையில் தங்களுக்கு அச்சுறுத்தல் இருப்பதாக வாதிட்டனர்.

மருத்துவமனை அறையின் உள்ளேயே டெல்லி போலீஸார் முகாமிட்டுள்ளதாகவும், குடும்ப உறுப்பினர்கள் வாங்சுக்கைச் சந்தித்துப் பேசும் தனிப்பட்ட உரையாடல்களை அவர்கள் உளவு கேட்டுத் தீவிரமாகக் கண்காணித்து வருவதாகவும் கீதாஞ்சலி நீதிமன்றத்தில் பரபரப்பு குற்றச்சாட்டை முன்வைத்தார்.

தங்களுக்கு அரசு மருத்துவர்கள் மற்றும் மருத்துவமனை நிர்வாகத்தின் மீது நம்பிக்கை இல்லை என்றும், எனவே உடனடியாக அவரை குருகிராமில் உள்ள மேதாந்தா மருத்துவமனைக்கு மாற்ற அனுமதிக்க வேண்டும் என்றும் அவர் கோரினார்.

ஒரு குடிமகனுக்கு உரிமை இல்லையா? - கபில் சிபல் கேள்வி

நீதிமன்றத்தில் வாங்சுக் தரப்பில் வாதிட்ட கபில் சிபல், "இந்தியாவின் ஒரு சுதந்திரமான குடிமகனுக்கு, தனக்கு எந்த மருத்துவமனையில், எந்த மருத்துவரிடம் சிகிச்சை வேண்டும் என்பதைத் தேர்வு செய்யும் உரிமை இல்லையா? அவர் மீது எந்தவிதமான குற்றவழக்கோ அல்லது தடுப்புக் காவல் உத்தரவோ இல்லாத நிலையில், ஒருவரை அரசு மருத்துவமனையில்தான் இருக்க வேண்டும் என்று அரசு எவ்வாறு வற்புறுத்த முடியும்? என்று காரசாரமாகக் கேள்வி எழுப்பினார்.

மேலும், மேதாந்தா மருத்துவமனைக்கு மாற்றினாலும் அரசு மருத்துவர்கள் அவரது உடல்நிலையைக் கண்காணிக்கலாம் என்றும் அவர் யோசனை தெரிவித்தார்.

அரசின் நடவடிக்கை தன்னிச்சையானது அல்ல: நீதிமன்றம் விளக்கம்

இருப்பினும், இந்த வாதங்களை நிராகரித்த டெல்லி உயர் நீதிமன்றம், சோனம் வாங்சுக் கடந்த 17-18 நாட்களாகத் தொடர்ந்து உண்ணாவிரதம் இருந்து வருவதால் அவரது உடல்நிலை மிகவும் மோசமடைந்துள்ளது என்பதைச் சுட்டிக்காட்டியது.

போராட்டக் களத்திலிருந்து அவரை மருத்துவமனைக்கு மாற்றிய அரசின் முடிவு தன்னிச்சையானது அல்ல என்று நீதிமன்றம் குறிப்பிட்டது. வாங்சுக்கின் ரத்த சர்க்கரை அளவு மற்றும் பொட்டாசியம் அளவு ஆபத்தான கட்டத்திற்குச் சென்றதாலேயே இந்த நடவடிக்கை எடுக்கப்பட்டுள்ளது. ஒவ்வொரு மனித உயிரும் விலைமதிப்பற்றது, அதைப் பாதுகாக்க வேண்டிய கடமை அரசுக்கு உள்ளது என்று நீதிமன்றம் தெரிவித்தது.

முரண்பட்ட மருத்துவ அறிக்கைகள்

அரசு மருத்துவர்கள் மீதான நம்பிக்கையின்மை குறித்து விளக்கிய கீதாஞ்சலி ஆங்மோ, சஃப்தர்ஜங் மருத்துவமனை அறிக்கையில் வாங்சுக்கின் பொட்டாசியம் அளவு உயிருக்கு ஆபத்தான 2.9 எனக் குறிப்பிடப்பட்டிருந்ததாகக் கூறினார். ஆனால், தனியார் ஆய்வகம் மூலம் எடுக்கப்பட்ட மற்றொரு சோதனையில் அது 3.5 எனத் தங்களுக்குக் காட்டியதாகக் குறிப்பிட்டார்.

இந்த முரண்பாடு காரணமாகவே தங்களுக்கு அரசு மருத்துவக் குழு மீது சந்தேகம் எழுந்துள்ளதாகவும், மருத்துவர்களின் அறிவுரைக்கு எதிராக அவரை மேதாந்தாவுக்குக் கொண்டு செல்லத் தயாராக இருப்பதாகவும் அவர் வாதிட்டார்.

இதற்குப் பதிலளித்த கூடுதல் சொலிசிட்டர் ஜெனரல் , வாங்சுக்கின் உடல்நிலை மற்றும் நீண்ட உண்ணாவிரதம் காரணமாக அரசு கூடுதல் எச்சரிக்கையுடன் செயல்பட வேண்டிய கட்டாயத்தில் உள்ளது என்றும், அங்கு நடக்கும் அசம்பாவிதங்கள் பெரிய சட்டம்-ஒழுங்கு விளைவுகளை ஏற்படுத்தும் என்றும் கூறினார்.

மேலும், வாங்சுக் சில நேரங்களில் சிகிச்சைக்கு ஒத்துழைக்க மறுப்பதாக மருத்துவமனை நிர்வாகம் தரப்பில் தெரிவிக்கப்பட்டது.

நீதிமன்றத்தின் இறுதி உத்தரவு

வழக்கை விசாரித்த டெல்லி உயர் நீதிமன்றம், சோனம் வாங்சுக்கிற்கு மருத்துவமனையில் அவரது குடும்பத்தினர் எப்போது வேண்டுமானாலும் சந்திக்கும்படி முன்னெப்போதும் இல்லாத வகையில் சிறப்பு அனுமதி வழங்கப்பட்டுள்ளதைச் சுட்டிக்காட்டியது. எனவே, அவர் காவலில் வைக்கப்பட்டுள்ளார் என்ற வாதத்தை ஏற்க முடியாது எனக் கூறி, மேதாந்தா மருத்துவமனைக்கு மாற்ற இடைக்கால உத்தரவு பிறப்பிக்க மறுத்துவிட்டது.

அதே நேரத்தில், வாங்சுக்கின் மருத்துவ அறிக்கைகளைத் தொடர்ந்து குடும்பத்தினருடன் பகிர்ந்து கொள்ள வேண்டும் என்றும், மருத்துவக் குழுவே இறுதி முடிவுகளை எடுக்கும் என்றும் நீதிமன்றம் உத்தரவிட்டது.

இந்த விவகாரத்தில் மத்திய அரசு, டெல்லி காவல்துறை மற்றும் சஃப்தர்ஜங் மருத்துவமனை நிர்வாகம் ஆகிய மூன்று நாட்களுக்குள் விரிவான நிலை அறிக்கையைத் தாக்கல் செய்ய உத்தரவிட்டு, வழக்கின் அடுத்த விசாரணையை வரும் வியாழக்கிழமைக்கு ஒத்திவைத்தது.

English summary

Sonam Wangchuk Hospitalization: Wife Alleges Police Spying Inside Room