பெண்ணை கொல்ல முயன்ற கடற்படை அதிகாரி

மும்பை: சக ஊழியரின் மனைவியை கத்தியால் 11 முறை குத்தி கொடூரமாக கொல்ல முயன்ற வழக்கில் கப்பற்படை அதிகாரி ஒருவரை போலீசார் கைது செய்துள்ளனர்.

மும்பையில் உள்ள இந்திய கப்பற்படையில் ரேடியோ அதிகாரியாக இருந்து வருபவர் ஆர்ஏ சந்திரன். இவர் கோலபா என்னும் பகுதியில் உள்ள நேவி நகரில் வசித்து வருகிறார்.

அவரது பிளாட்டுக்கு அருகில் வசித்து வருபவர் தாரம்பால் ரவத். இவரும் கப்பற்படையில் வேலை பார்த்து வருகிறார். இவரது மனைவி அனிதா. இவர்களது குழந்தையும், சந்திரனின் குழந்தையும் ஒரே பள்ளியில் படிக்கின்றனர்.

இதையடுத்து அனிதாவை சந்திரன் அடிக்கடி பள்ளியில் சந்தித்துள்ளார். அடுத்தவரின் மனைவி என்பதையும் மீறி சந்திரன் அவர் மீது காதல் வயப்பட்டுள்ளார். ஒரு நாள் சந்திரன் தனது காதலை அனிதாவிடம் தெரிவித்துள்ளார். ஆனால், அனிதா அதை கடுமையாக கண்டித்துள்ளார்.

இந்நிலையில் சந்திரன், ரவத் இல்லாத சமயத்தில் அவரது பிளாட்டுக்குள் ஏறி குதித்து, பால்கனி வழியாக அனிதாவின் அறைக்கு சென்றுள்ளார். அங்கு தனியாக இருந்த அனிதாவை வெறித்தனமாக கத்தியால் 11 முறை குத்தினார். பின்னர் தனது கையையும் கத்தியால் கீறிக் கொண்டார்.

அவரது அலறல் சத்தத்தை கேட்ட அக்கம்பக்கத்தினர் போலீசாருக்கு தகவல் கொடுத்தனர். போலீசார் ரத்த வெள்ளத்தில் கிடந்த அனிதாவை அருகிலிருக்கும் மருத்துவமனைக்கு அழைத்து சென்றனர்.

அங்கு அவருக்கு ஆபரேஷன் செய்யப்பட்டது. ஆனாலும், அவரது உடல்நிலை இன்னும் மோசமான கட்டத்தை தாண்டவில்லை.

போலீசார் சந்திரன் மீது கொலை முயற்சி, பெண்ணிடம் தவறாக நடந்துகொண்டது, வீட்டுக்குள் அத்துமீறி நுழைந்தது என மூன்று வழக்குகள் பதிவு செய்துள்ளனர்.

இது குறித்து போலீஸ் சப் இன்ஸ்பெக்டர் தாம்பிரே கூறுகையில், கடந்த 13ம் தேதி சந்திரன், ரவத் மனைவியிடம் தனியாக பேச வேண்டும் வெளியே வா என அழைத்திருக்கிறார். இதையறிந்த ரவத் அவரை அந்த இடத்தில் இருந்து துரத்தி அடித்துள்ளார். இதனால் சந்திரன், அனிதாவை கொடூரமாக கொல்ல முயன்றுள்ளார் என்றார்.