நெல்லை: அடுத்தடுத்து விபத்துகள்-8 பேர் பலி

நெல்லை: நெல்லை அருகே ஒரே நாளில் அடுத்தடுத்து நடந்த மூன்று விபத்துக்களில் 8 பேர் பலியாயினர்.

நெல்லை மாவட்டம் மானூர் அருகே செட்டிகுறிச்சி கிராமத்தை சேர்ந்தவர் ராஜசேகர். இவர் கோவையில் பல பலசரக்கு கடை நடத்தி வருகிறார்.

இந்நிலையில் நேற்று முன்தினம் தனது ஒன்றரை வயது மகள் பிரியாதர்ஷினுக்கு நெல்லை அருகேயுள்ள சிவந்திபட்டி கோயிலில் முடி காணிக்கை செலுத்துவதற்காக கோவையிலிருந்து காரில் சொந்த ஊருக்கு வந்தார்.

பின்னர் அங்கிருந்து தந்தை சங்கர் ரெட்டியார் மற்றும் குடும்பத்தினருடன் நேற்று மதியம் காரில் சிவந்திபட்டி கிளம்பினர். காரை ராஜசேகர் ஓட்டினார்.

புறப்பட்ட 5 நிமிடத்திலேயே கார் சாலையோர பள்ளத்தில் தலைகுப்புற கவிழ்ந்து விபத்துக்குள்ளாகியது. இதில் உடல் நசுங்கி சம்பவ இடத்திலேயே ராஜசேகர், சங்கர் ரெட்டியார், சிறுமி பிரியாதர்ஷினி ஆகியோர் இறந்தனர்.

செட்டிகுறிச்சியை சேர்ந்த ராசையா மனைவி பெருமாள் அக்கா, ராமசாமி மனைவி மூக்கம்மாள், ராமசாமி மகன் சண்முகராஜ் ஆகிய 4 பேர் படுகாயமடைந்தனர். சம்பவ இடத்திற்கு மானூர் போலீசார் சென்று படுகாயமடைந்த 4 பேரையும் மீட்டு வண்ணார்பேட்டை தனியார் மருத்துவமனையில் சேர்த்தனர்.

ராஜசேகர் மனைவி உள்பட 3 பேர் உயிர் தப்பினர். விபத்தில் ஒரே குடும்பத்தை சேர்ந்த 4 பேர் இறந்ததால் செட்டிகுறிச்சி கிராமமே சோகத்தில் மூழ்கியது.

மேலும் நெல்லை மாவட்டம், சங்கரன்கோவிலை அடுத்த பெருங்கோட்டூர் அருகே சாத்தூரிலிருந்து சங்கரன்கோவில் வந்துகொண்டிருந்த பஸ்சும், தனியார் வேனும் நேருக்கு நேர் மோதி கொண்டது.

இதில் வேன் ரோட்டரோத்தில் இருந்த பள்ளத்தில் விழுந்தது. இந்த விபத்தில் வேன் டிரைவர் சங்கரன்கோவிலை சேர்ந்த பாக்கியநாதன் மகன் ராஜா, வேனில் பயணம் செய்த புதுமனையை சேர்ந்த கோவிந்தராஜ், இருவரும் சம்பவ இடத்திலேயே பலியானார்கள். படுகாயமடைந்த சங்கரமகாலிங்கம் மகள் அங்காளஈஸ்வரி மருத்துமனையி்ல் அனுமதிக்கப்பட்டு இறந்தாள்.

நெல்லை மாவட்டம், சேரன்மகாதேவி பொழிக்கரையை சேர்ந்த அரிராமன் என்ற விவசாயி பைக்கிள் சென்றபோது தவறி விழுந்து பலியானார். நேற்று ஒரே நாளில் அடுத்தடுத்து நடந்த கோர விபத்துகளில் நெல்லை மாவட்டத்தில் 8 பேர் பலியாகி உள்ளனர்.