போர்ப்ஸ்- பின்னால் போன அனில் அம்பானி!

வாஷி்ங்டன்: போர்ப்ஸ் இதழின் உலகின் மிகப் பெரிய பணக்காரர்கள் பட்டியலில் இந்தியர்கள் பெரும் சரிவை சந்தித்துள்ளனர். கடந்த ஆண்டு 6வது இடத்திலிருந்த அனில் அம்பானி 34வது இடத்துக்கு தள்ளப்பட்டுள்ளார்.

முகேஷ் அம்பானி 7வது, லட்சுமி மிட்டல் 8வது இடம் பிடித்துள்ளனர். மைக்ரோசாப்ட் நிறுவனர் பில் கேட்ஸ் மீண்டும் முதலிடத்துக்கு வந்துள்ளார்.

உலகின் மிகப் பெரிய கோடீஸ்வரர்கள் பட்டியலை போர்ப்ஸ் இதழ் வெளியிட்டுள்ளது. பொருளாதார நெருக்கடியை தொடர்ந்து போன ஆண்டு கோடீஸ்வரர்கள் பட்டியலில் இருந்த பலர் இந்த ஆண்டு காணாமல் போய்விட்டனர். அவர்களின் எண்ணிக்கையும் மூன்று மடங்கு குறைந்துவிட்டதாக தெரிகிறது.

ரஷ்யாவிலிருந்த கோடீஸ்வரர்களின் எண்ணிக்கை 87லிருந்து 32 ஆக குறைந்துவிட்டது. இப்பட்டியலில் இந்தியர்களின் எண்ணிக்கை கடந்தாண்டை விட தற்போது பாதியாக குறைந்து 24 ஆக இருக்கிறது.

கடந்தாண்டு இப்பட்டியலில் விறுவிறுவென முன்னேறி 6வது இடத்தை பிடித்த அனில் அம்பானி, இந்தாண்டு அதைவிட வேகமாக பின்னுக்கு தள்ளப்பட்டுள்ளார். 42.1 மில்லியன் டாலராக இருந்த அவரது சொத்து தற்போது 10.1 மில்லியன் டாலராக குறைந்து, 34வது இடம்பிடித்துள்ளார். அவரது சகோதரர் முகேஷ் அம்பானி 5வது இடத்தில் இருந்து 7வது இடத்துக்கு தள்ளப்பட்டுள்ளார்.

கடந்த ஆண்டு நான்காவது இடத்திலிருந்த லட்சுமி மிட்டல் 8வது இடம்பிடித்துள்ளார்.

பில் கேட்ஸ் நம்பர் ஒன்...

மைக்ரோசாப்ட் நிறுவனர் பில்கேட்ஸ் மீண்டும் முதலிடத்துக்கு வந்துள்ளார். இவரது சொத்து 40 மில்லியன் டாலராகும். இது இரண்டாவது இடத்துக்கு தள்ளப்பட்டுள்ள அமெரிக்க முதலீட்டாளர் வாரன் பப்பட்டை விட 3 மில்லியன் டாலர் அதிகமாகும். மூன்றாவது இடத்தில் மெக்சிகோ தொலைதொடர்பு நிறுவன அதிகார் கார்லோஸ் சிலிம் இருக்கிறார்.