மகாத்மா காந்திதான் என் ஹீரோ-ஒபாமா

வாஷிங்டன்: என்னைப் பொறுத்தவரை மகாத்மா காந்திதான் உண்மையான ஹீரோ. அவர் உயிருடன் இருந்தால் அவருடன் சேர்ந்து இரவு உணவு சாப்பிட விரும்புகிறேன் என்று கூறியுள்ளார் அமெரிக்க அதிபர் பாரக் ஒபாமா.

தலைநகர் வாஷிங்டனில் கடந்த செவ்வாய்க்கிழமையன்று பள்ளிக் கூட மாணவ, மாணவர்களிடையே பேசினார் ஒபாமா.

அப்போது 9வது வகுப்பு படிக்கும் மாணவி லில்லி என்பவர் எழுந்து, உயிருடன் இருக்கும் அல்லது இல்லாத ஒரு தலைவருடன் இரவு உணவு சாப்பிட நீங்கள் விரும்பினால், அந்தத் தலைவர் யார் என்று கேட்டார்.

அதற்குப் பதிலளித்த ஒபாமா, அது பெரிய லிஸ்ட்டே இருக்கிறது. இருந்தாலும், என்னைப் பொறுத்தவரை, மகாத்மா காந்தியுடன் இரவு உணவு சாப்பிட விரும்புவேன். காரணம், அவர் உண்மையான ஹீரோ.

அவருடன் நான் கொஞ்சம்தான் சாப்பிடுவேன். காரணம், அவர் அதிகம் சாப்பிட மாட்டார். அவரிடமிருந்து நான் நிறைய கற்றுக் கொண்டுள்ளேன்.

எனக்கு முன்னால் டாக்டர் மார்ட்டின் லூதர் கிங்கையும் வசீகரித்தவர் காந்தி. எனவே இந்தியாவில் அகிம்சை முறையை காந்தியடிகள் போதித்திருக்காவிட்டால், அமெரிக்காவில் வன்முறை இல்லாமல் சிவில் உரிமைகளைப் பெறும் போராட்டத்தை லூதர் கிங் தொடங்கியிருக்க வாய்ப்பில்லாமல் போயிருக்கும்.

காந்தியடிகளிடம் உள்ள விசேஷம் என்னவென்றால் எந்தவிதமான ஆயுத பலமும் இல்லாமல், தனது கொள்கைகளால் மட்டும் பெரும் மாற்றத்தை ஏற்படுத்தினார். மக்கள் மனதை மாற்றினார், பலமாக்கினார்.

உங்களிடம் சக்தி மறைந்து கிடக்கிறது என்று கூறி மக்களை தட்டியெழுப்பினார். அந்த சக்தியைப் பயன்படுத்தினால் ஒடுக்கப்பட்ட மக்களை உயர்த்த முடியும் என்பதை மக்களுக்கு எடுத்துரைத்தார்.

எனவேதான், மாற்றத்தைக் கொண்டு வர முடியும் என்று நம்புபவர்கள், மாற்றத்தை ஏற்படுத்த முயல்பவர்களை எனக்கு மிகவும் பிடிக்கும். பண பலமோ, ஆயுத பலமோ, ஆள் பலமோ இல்லாமல், தங்களது தார்மீக கொள்கைகள், நெறிமுறைகள் மூலம் மாற்றத்தை ஏற்படுத்த முடியும் என்பதில் நம்பிக்கை உள்ளவன் நான். அப்படிப்பட்டவர்களுடன் நான் பேச அதிகம் ஆசைப்படுகிறேன் என்றார் ஒபாமா.

இந்த சந்திப்பின்போது பேசிய ஒபாமா கூகுள், ட்விட்டர், பேஸ்புக் ஆகியவற்றைப் பாராட்டினார்.

ஒபாமா கூறுகையில், இன்று இங்கு மாணவர்களாக உட்கார்ந்திருக்கும் இடத்தில் 75 ஆண்டுகளுக்கு முன்பு மாணவர்களாக இருந்தவர்கள் ஒரு பெரும் பொருளாதார சீர்குலைவிலிருந்து மீண்டு வர உதவினார்கள். ஒரு உலகப் போரை வென்றார்கள்.

ஒரு மனிதரை நிலவுக்கு அனுப்பி வைத்தனர். சிவில் உரிமைகளுக்கான போரை நடத்தினார்கள்.

20 ஆண்டுகளுக்கு முன்பு இங்கு மாணவர்களாக இருந்தவர்கள் கூகுள் நிறுவனத்தை உருவாக்கிநார்கள். ட்விட்டரை உருவாக்கினார்கள். பேஸ்புக்கை ஏற்படுத்தினார்கள். நமது தகவல் தொடர்பு முகத்தை முற்றிலும் மாற்றியமைத்தார்கள் என்றார் ஒபாமா.