பன்றிக் காய்ச்சல்-புனே நகரில் 3 குழந்தைகள் பலி

டெல்லி: புனே நகரில் பன்றிக் காய்ச்சலுக்கு இன்று 3 குழந்தைகள் பலியாயினர். இந்தக் குழந்தைகள் 1 மாதத்தில் இருந்து 4 வயதுக்குட்பட்டவர்கள் ஆவர்.

இந்தியாவில் முதன் முதலாக இந்த நகரில் பன்றிக் காய்ச்சலுக்கு உயிர் பலியானது. இந் நிலையில் இன்று 3 பச்சிளம் குழந்தைகள் பலியாகியுள்ளன.

இந்த 3 குழந்தைகளும் ஒரு வாரமாக காய்ச்சலால் பாதிக்கப்பட்டு புனே பிம்ப்ரி மருத்துவமனையில் அனுமதிக்கப்பட்டிருந்தனர்.
அவர்களது ரத்த மாதிரிகள் பரிசோதனைக்காக அனுப்பி வைக்கப்பட்டன. அதில் 3 குழந்தைகளுக்கும் பன்றிக் காய்ச்சல் நோய் தாக்குதல் இருப்பது கண்டுபிடிக்கப்பட்டது. ஆனால், இந்த மருத்துவ ரிபோர்ட் வரும் முன்பே 3 குழந்தைகளும் பலியாகிவிட்டனர்.
பரிசோதனை முடிவுகள் தாமதமாக வந்ததால் உரிய சிகிச்சை அளிக்க முடியாமல் 3 குழந்தைகளும் பலியானதாக குற்றச்சாட்டு எழுந்துள்ளது. இதன்மூலம் புனே நகரில் பன்றி காய்ச்சலுக்கு பலியானவர்கள் எண்ணிக்கை 96 ஆக உயர்ந்துள்ளது.

அதே நேரத்தில் நாடு முழுவதும் பன்றிக் காய்ச்சலுக்கு பலியானோர் எண்ணிக்கை 465 ஆக உயர்ந்துள்ளது.