ரயில்வே பட்ஜெட்: தமிழகத்திற்கு பல புதிய ரயில்கள்-திட்டங்கள்

டெல்லி: மமதா பானர்ஜி இன்று தாக்கல் செய்த ரயில்வே பட்ஜெட்டில் தமிழகத்திற்கும் பல புதிய ரயில்களை அறிவித்தார்.

ரயில்வே பட்ஜெட்டில் புதிதாக 54 ரயில்கள் அறிவிக்கப்பட்டுள்ளன. அதில் தமிழகத்துக்கு அறிவிக்கப்பட்டுள்ள ரயில்கள்:

மதுரை- மும்பை மார்க்கத்தி்ல புதிய எக்ஸ்பிரஸ் ரயில் விடப்படும்.

சென்னை- கோவை இடையே அதி விரைவு பகல் நேர துரந்தோ எக்ஸ்பிரஸ் ரயில் அறிமுகப்படுத்தப்படவுள்ளது. இந்த ரயில்தான் தமிழகத்தின் முதல் துரந்தோ எக்ஸ்பிரஸ் ரயில் என்பது குறிப்பிடத்தக்கது.

நாகர்கோயில்-பெங்களூர் இடையே மதுரை- ஒசூர் வழியாக புதிய வாராந்திர ரயில் அறிமுகப்படுத்தப்படும்.

திருப்பதி- சென்னை இடையே நெல்லூர் வழியாக ஒரு பாசஞ்சர் ரயில் இயக்கப்படும்.

கோவை- பெள்ளாச்சி, திருச்செந்தூர்- நெல்லை பாசஞ்சர் ரயில்கள் அறிமுகப்படுத்தப்படும்.

ஹல்தியா- சென்னை இடையே வாரம் ஒரு முறை எக்ஸ்பிரஸ் ரயில் விடப்படும்.

மதுரை- திருப்பதி இடையே வாரம் 2 முறை எக்ஸ்பிரஸ் ரயில் விடப்படும்.

அதேபோல, ஹவுரா - புதுச்சேரி இடையே காட்பாடி வழியாக வாரம் ஒரு முறை எக்ஸ்பிரஸ் ரயில் விடப்படும்.

மங்களூர்- திருச்சி இடையே புதிய வாராந்திர ரயில் விடப்படும்.

ராமேஸ்வரம்- தனுஷ்கோடி மார்க்கத்தில் மீண்டும் ரயில் சேவை தொடங்க ஆய்வு பணிகள் மேற்கொள்ளப்படும்.

திருச்செந்தூர்- திருநெல்வேலி இடையே புதிய பாசஞ்சர் ரயில் தொடங்கப்படும். திருசெந்தூரிலிருந்து மயிலாடுதுறைக்கு திருபுவனம் வழியாக புதிய ரயில் இயக்கப்படும்.

சேலம்-காட்பாடி, கோவை-ஈரோடு இடையே புதிய பாசஞ்சர் ரயில்கள் அறிமுகப்படுத்தப்படும்.

தீர்த்த யாத்திரை ரயில்கள்:

மேலும் பாரத தீர்த்த யாத்திரைக்கென 16 ரயில்களும் அறிமுகப்படுத்தப்பட்டுள்ளன. இதி்ல் 5 ரயில்கள் தமிழகத்தில் இயக்கப்படவுள்ளன. அவை:

1. மதுரை- கோபர்கான்- மந்த்ராலயம்- சென்னை- மதுரை,

2. மதுரை- ஈரோடு- புனே- உஜ்ஜைன்- வேரவல்- நாசிக்- ஹைதராபாத்- சென்னை- மதுரை,

3. மதுரை- சென்னை- ஜெய்ப்பூர்- டெல்லி- மதுரா- பிருந்தாவன்- அலகாபாத்- வாரணாசி- கயா- சென்னை- மதுரை,

4. மதுரை- வாரணாசி- கயா- பாட்னா- அலகாபாத்- ஹரித்வார்- சண்டீகர்- குருஷேத்ரா- அம்ரிஸ்தர்-டெல்லி- மதுரை,

5. மதுரை- மைசூர்- கோவா- மும்பை- ஒளரங்காபாத்- ஹைதராபாத்- மதுரை

புதிய ரயில் பாதைகள்:

மதுரை- கோட்டயம், மதுரை- தூத்துக்குடி, திண்டுக்கல்- குமுளி, ராமேஸ்வரம்- தனுஷ்கோடி ஆகியவற்றின் இடையே புதிய ரயில் பாதைகள் அமைக்கத் திட்டம்.

சேலம்- நாமக்கல்- கரூர், நாகூர்- காரைக்கால் இடையேயான ரயில் பாதைத் திட்டங்கள் 2010-2011ல் நிறைவுபெறும்.

போத்தனூர்- கோவை, வேலூர்- விழுப்புரம் இடையே அமைக்கப்படும் ரயில் பாதை பணிகள் இந்த ஆண்டு நிறைவுபெறும்.

அகலப் பாதை:

திருநெல்வேலி- தென்காசி- திருச்செந்தூர், தென்காசி- விருதுநகர், திண்டுக்கல்- பழனி- பொள்ளாச்சி- பாலக்காடு ஆகிய மீட்டர் கேஜ் பாதைகள் அகலப் பாதைகளாக மாற்றப்படும்.

சென்னை புறநகர் புதிய ரயில்கள்:

சென்னையில் கூடுதல் மின்சார ரயில்கள் இயக்கப்படும்.

சென்னை வேளச்சேரி- செயின்ட் தாமஸ் மெளன்ட் இடையே புறநகர்ப் பாதை 2012ல் இணைக்கப்படும்.

சென்னை ஐசிஎப் ரயில் பெட்டி தயாரிப்பு தொழிற்சாலை நவீனப்படுத்தப்படுவதோடு மேலும், புதிய பிரிவு ஒன்றும் தொடங்கப்படும்.

சென்னை சென்ட்ரல்- சூளூர்பேட்டை- சென்னை கடற்கரை, சென்னை கடற்கரை- வேளச்சேரி- சென்னை கடற்கரை, சென்னை கடற்கரை- திருத்தணி- சென்னை சென்ட்ரல், சென்னை சென்ட்ரல்- அரக்கோணம்- சென்னை சென்ட்ரல் ஆகிய வழித்தடங்களில் புதிய ரயில்கள் அறிமுகப்படுத்தப்படும்.

ரயில்வே மருத்துவப் பரிசோதனை மையம்:

திருச்சி, திருநெல்வேலி, கும்பகோணம் ஆகிய இடங்களில் புறநோயாளிகள் சிகிச்சை மையம் மற்றும் மருத்துவப் பரிசோதனை மையம் தொடங்கப்படவுள்ளது.

பன்முனை வளாகங்கள்:

ஈரோடு, திருத்தணி, நாகர்கோயில், சேலம் ஆகிய இடங்களில் ரயில்வே பன்முனை வளாகங்கள் அமைக்கப்படும்.

அந்தமானிலும் புதிதாக ரயில் சேவை துவக்க திட்டமிடப்பட்டுள்ளது. அதன் தலைநகர் போர்ட்பிளேரில் இருந்து தீவின் வடக்கு முனையில் உள்ள திகில்பூர் வரை இந்தப் பாதை அமைக்கப்படவுள்ளது.