கொல்கத்தா தீ விபத்தில் பலி 27 ஆக உயர்ந்தது

கொல்கத்தா: கொல்கத்தாவில் 150 ஆண்டுகள் பழமையான அடுக்குமாடி கட்டடத்தில் ஏற்பட்ட தீ விபத்தில் பலியானோர் எண்ணிக்கை 27 ஆக உயர்ந்துள்ளது. மேலும் ஏராளமானோர் பலத்த காயமடைந்துள்ளனர்.

காயமடைந்தவர்கள் நகரின் பல்வேறு மருத்துவமனைகளில் அனுமதிக்கப்பட்டுள்ளனர்.​ இதில் சிலரது கவலைக்கிடமாக உள்ளனர்.

கொல்கத்தாவின் பிரபலமான பூங்கா வீதியில் அமைந்துள்ளது ஸ்டீபன் கோர்ட் என்ற அடுக்குமாடி கட்டடம்.​ 150 ஆண்டுகள் பழமைமிக்க இந்தக் கட்டடத்தில் பல்வேறு கடைகள்,​​ ஹோட்டல்,​​ அலுவலகங்கள் இயங்கி வருகின்றன.

நேற்று பிற்பகல் 2 மணி அளவில் கட்டடத்தின் முதல் தளத்தில் லிப்ட் உள்ள பகுதியில் தீப் பிடித்தது. தீ மளமளவென மேல் தளங்களுக்குப் பரவியது.​

ஹோட்டல் மற்றும் கடைகளில் இருந்த வாடிக்கையாளர்கள் தீ பரவுவதை பார்த்து அலறியடித்துக் கொண்டு அங்குமிங்குமாக சிதறி ஓடி தப்ப முயன்றனர்.

மேல்நோக்கி தீ பரவியதால் அவர்களால் கீழே வர முடியவில்லை.​ இதனால் மேல் தளங்களுக்கு ஓடினர்.​ இப்படி ஓடுகையில் பலர் மிதிபட்டு காயமடைந்தனர்.​ சிலர் தீக்கு பயந்து மாடியில் இருந்து குதித்து படுகாயமடைந்தனர்.

சுமார் 300 தீயணைப்பு வீரர்கள் 15 தீயணைப்பு வண்டிகளுடன் தீயை அணைக்க முயன்றனர். உயரமான ஏணிகளை நிறுத்தி 5 மற்றும் 6வது தளத்தில் சிக்கியிருந்தவர்களை ஜன்னல்கள் வழியாக மீட்டனர்.​

ஸ்டீபன் கோர்ட் கட்டடத்தின் உள்பகுதி முழுவதும் மரத்தால் ஆனது.​ இதனால் தீ வேகமாகப் பரவிவிட்டது.

இந்த விபத்தில் அந்தக் கட்டடத்தில் இருந்த கடைகள்,​​ அலுவலகங்கள் மற்றும் ஹோட்டல் எரிந்து சாம்பலாகிவிட்டன.

மாலை 7 மணிக்குத் தான் தீ அணைக்கப்பட்டது. ​பலத்த தீக்காயத்துடன் மருத்துவமனையில் அனுமதிக்கப்பட்டிருந்தவர்களில் 6 பேர் உயிரிழந்துள்ளனர்.​ இதில் சிலர் மாடியிலிருந்து குதித்து காயமடைந்து உயிரிழந்தனர்.

6வது மாடியில் தீயில் கருகிய நிலையில் 4 பேரின் உடல்கள் நேற்று நள்ளிரவு மீட்கப்பட்டன.

இன்று காலையும் பல உடல்கள் மீட்கப்பட்டுள்ளன. இதனால் சாவு எண்ணிக்கை 27 ஆக உயர்ந்துள்ளது.