கிங்பிஷர் விமானத்தில் குண்டு வைத்த வழக்கில் விசாரிக்கப்பட்டவர் தற்கொலை

திருவனந்தபுரம்: கிங்பிஷர் விமானத்தில் குண்டு வைத்தது தொடர்பாக கைது செய்யப்பட்டு போலீஸாரால் விசாரிக்கப்பட்டு வந்த கிங்பிஷர் நிறுவன முன்னாள் காண்டிராக்டர் தனது வீட்டில் தற்கொலை செய்து கொண்டார். இதனால் சலசலப்பு ஏற்பட்டுள்ளது.

மார்ச் 21ம் தேதி பெங்களூரிலிருந்து திருவனந்தபுரத்திற்கு வந்த கிங்பிஷர் விமானத்தின் சரக்குப் பகுதியில், வெடிகுண்டு இருந்த்து கண்டுபிடிக்கப்பட்டது.

இதையடுத்து நடந்த விசாரணையில், கிங்பிஷர் நிறுவன ஊழியர் ராஜசேகரன் நாயர் கைது செய்யப்பட்டார். மேலும் இந்த சம்பவம் தொடர்பாக கிங்பிஷர் நிறுவனத்தின் முன்னாள் காண்டிராக்டரான சுனில் லாரன்ஸ் (25) போலீஸ் விசாரணைக்கு உட்படுத்தப்பட்டிருந்தார்.

இந்த நிலையில், திருவனந்தபுரம் அருகே உள்ள வலியதாரா பகுதியில் உள்ள தனது வீட்டில் தூக்குப் போட்டு சுனில் லாரன்ஸ் தற்கொலை செய்து கொண்டார்.

தற்கொலை செய்து கொள்வதற்கு முன்பு அவர் ஒரு குறிப்பையும் எழுதி வைத்திருந்தார். அதில், என்னைப் போன்ற அப்பாவி மக்களை போலீஸார் விசாரிக்கும் விதம் என்னை வேதனை அடைய வைத்தது. அதுவே இந்த முடிவுக்கு என்னைக் கொண்டு சென்றது. போலீஸார் தங்களது விசாரணையில் வெற்றி பெற வாழ்த்துகள் என்று எழுதி வைத்திருந்தார் சுனில்.