108 ஆம்புலன்ஸ் போல இலவச அமரர் ஊர்தி சேவை!

சென்னை: '108' அவசர ஆம்புலன்ஸ் சேவையைப் போல தொலைபேசி மூலம் செயல்படும் 'இலவச அமரர் ஊர்தி சேவையும்' அறிமுகப்படுத்தப்படவுள்ளது.

சட்டசபையில் மக்கள் நல்வாழ்வுத் துறை மானியக் கோரிக்கைகள் மீதான விவாதங்களுக்கு பதிலளித்துப் பேசிய அந்தத் துறையின் அமைச்சர் எம்.ஆர்.கே.பன்னீர்செல்வம் கூறியதாவது:

ஏழைக் குடும்பங்களைச் சேர்ந்த நோயாளிகள், அரசு மருத்துவமனைகளில் இறக்கும் நிலை ஏற்பட்டால் இறந்தவரின் உடலை எடுத்துச் செல்ல தனியார் அமரர் ஊர்திகளிடம் அதிக கட்டணம் செலுத்த வேண்டியுள்ளது. இந்தக் கட்டணம் செலுத்த முடியாத ஏழை மக்கள் மிகவும் சிரமப்படுகின்றனர்.

எனவே அரசு- தனியார் கூட்டாண்மை அடிப்படையில் இப்போது சிறப்பாகச் செயல்பட்டு வரும் '108 ஆம்புலன்ஸ் திட்டத்தை' போல இலவச அமரர் ஊர்தி சேவையும் வேறொரு தொலைபேசி எண் மூலம் செயல்படுத்தப்படும்.

நடப்பு நிதியாண்டிலேயே இந்தத் திட்டம் அமலுக்கு வரும்.

'அவசரகால ஆம்புலன்ஸ் சேவை 108' திட்டம் கடந்த 15.9.2008 முதல் செயல்படுத்தப்பட்டு வருகிறது. பொது மக்களால் பெரிதும் பாராட்டப்படும் இந்தத் திட்டத்தில் இப்போது 385 ஆம்புலன்ஸ்கள் தமிழகம் முழுவதும் இயங்கி வருகின்றன. இவற்றின் எண்ணிக்கை விரைவில் 445 ஆக விரைவில் அதிகரிக்கப்படும்.

இந்த ஆம்புலன்ஸ் சேவையால் 11.04.2010ம் தேதி வரை 3 லட்சத்து 90 ஆயிரத்து 961 பேர் பலனடைந்துள்ளனர்.
ஆபத்தான நிலையில் இருந்த 20,184 பேர் காப்பாற்றப்பட்டுள்ளனர்.

அரசு மருத்துவமனைகளில் ஃபிஸியோதெரப்பிஸ்ட்டுகள்:

அதேபோல நடப்பாண்டில் 25 அரசு மருத்துவமனைகளில் ஃபிஸியோதெரப்பிஸ்ட்டுகள் நியமிக்கப்படுவர். அவர்களுக்கான உபகரணங்கள் வழங்க ரூ.2.25 கோடி ஒதுக்கப்பட்டுள்ளது.

காலாவதி மருந்து மற்றும் போலி மருந்துகளைக் கண்டுபிடிக்கும் வகையில் மருந்துக் கட்டுப்பாட்டுத் துறையை வலுப்படுத்த புதிதாக 75 மருந்து ஆய்வாளர்கள் நியமனம் செய்யப்பட உள்ளனர்.

யானைக்கால் பாதிப்பு: மாதந்தோறும் ரூ.400 உதவி:

யானைக்கால் நோயால் கடுமையாக பாதிக்கப்பட்டவர்களுக்கு மாதந்தோறும் உதவித் தொகையாக ரூ.400 வழங்கப்படும்.

யானைக்கால் நோயால் கடுமையாக பாதிக்கப்பட்டவர்களால் கால், கை போன்ற உறுப்புகளை பயன்படுத்த முடியாது. இவர்களுக்கு மாத உதவித் தொகையாக இனி ரூ.400 வழங்கப்படும். இதனால் சுமார் 5,000 பேர் பலனடைவர் என்றார்.