ராஜ்யசபாவில் லோக்பால் மசோதா தாக்கல்- சூடான விவாதம்- நிறைவேறுமா?

டெல்லி: லோக்சபாவில் தப்பிப் பிழைத்த லோக்பால் மசோதா இன்று ராஜ்யசபாவில் தாக்கல் செய்யப்பட்டு தற்போது அங்கு சூடான விவாதம் நடந்து வருகிறது. லோக்சபாவைப் போல காங்கிரஸுக்கு இங்கு பெரும்பான்மை பலம் இல்லாததால் மசோதா நிறைவேறுவது சமாஜ்வாடி, லாலு கட்சி உள்ளிட்ட சில கட்சிகளின் தயவு தேவைப்படுகிறது என்பதால் மசோதா நிறைவேறுவது குறித்து படபடப்புடன் உள்ளது காங்கிரஸ்.

கடந்த 40 ஆண்டுகளாக இழுபறியாக இருந்து வந்த லோக்பால் மசோதா நேற்று முன்தினம் லோக்சபாவில் 11 மணி நேர நீண்ட விவாதம், கடும் அமளி துமளி, வெளிநடப்புகளுக்கு மத்தியில் இரவு 11 மணியளவில் குரல் வாக்கெடுப்பு மூலம் நிறைவேற்றப்பட்டது. இருப்பினும் அதற்கு அரசியல்சாசன அந்தஸ்து வழங்க வகை செய்யும் அரசியல்சாசன திருத்த மசோதா தோல்வியடைந்தது.

இந்த நிலையில் இன்று முற்பகல் 11 மணியளவில் ராஜ்யசபா கூடியதும் அங்கு அமைச்சர் நாராயணசாமி லோக்பால் மற்றும் லோக் ஆயுக்தா சட்ட மசோதாவை தாக்கல் செய்து அறிமுகப்படுத்திப் பேசினார்.

மசோதாவை நாராயணசாமி அறிமுகப்படுத்திப் பேசியபோது சபையில் பிரதமர் மன்மோகன் சிங் இல்லை. பிரதமர் எங்கே என்று கேட்டு எதிர்க்கட்சிகள் அமளியில் இறங்கின. பிரதமர் வந்து கொண்டிருக்கிறார் என்று அவைத் தலைவர் ஹமீத் அன்சாரி கூறியதை எதிர்க்கட்சிகள் ஏற்கவில்லை. இதையடுத்து அவை 10 நிமிடங்கள் ஒத்திவைக்கப்பட்டது.

அதன் பின்னர் மீண்டும் அவை கூடியபோது பிரதமர் அவைக்கு வந்தார். இதையடுத்து விவாதம் தொடங்கியது.

ராஜ்யசபா எதிர்க்கட்சித் தலைவர் அருண் ஜேட்லி விவாதத்தைத் தொடங்கி பேசினார். ஜேட்லி பேசுகையில், வலுவான லோக்பால் மசோதா அமைவதை ராஜ்யசபா உறுதி செய்ய வேண்டும். திருத்தங்களுடன் கூடிய லோக்பால் மசோதாவை ராஜ்யசபா இன்று நிறைவேற்ற வேண்டும். அதேசமயம், பலவீனமான, அரைகுறைமனதுடன் உருவாக்கப்பட்ட லோக்பால்மசோதாவை நாம் நிராகரிக்க வேண்டும் என்றார்.

8 மணி நேரம் லோக்பால் மசோதா மீதான விவாதம் நடைபெறவுள்ளது. அதன் பின்னர் வாக்கெடுப்பு நடைபெறும்.

ராஜ்யசபாவில் உறுப்பினர்களின் எண்ணிக்கை நிலவரம்

மொத்தம் 243. இதில் ஐக்கிய முற்போக்குக் கூட்டணியின் பலம் 95 ஆகும். காங்கிரஸுக்கு 71, திமுகவுக்கும், தேசியவாத காங்கிரஸுக்கும் தலா 7 உறுப்பினர்கள் உள்ளனர். திரினமூல் 6, தேசிய மாநாடு 2, சிக்கிம் ஜனநாயகக் கட்சி, ராஷ்டிரிய லோக்தளத்திற்கு தலா ஒரு உறுப்பினர் உள்ளனர்.

தேசிய ஜனநாயகக் கூட்டணியின் பலம் 66 ஆகும். இவர்கள் போக இடதுசாரிகளுக்கு 19 பேர் உள்ளனர்.

இதுதவிர பகுஜன் சமாஜ் கட்சிக்கு 18, பிஜூ ஜனதாதளத்திற்கு 6, அதிமுகவுக்கு 5, சமாஜ்வாடிக்கு 5, ராஷ்டிரிய ஜனதாதளத்திற்கு 4, அஸ்ஸாம் கண பரிஷத்திற்கு 2 உறுப்பினர்கள் உள்ளனர்.

இவர்கள் தவிர தெலுங்குதேசம், லோக் ஜனசக்தி உள்ளிட்ட 6 கட்சிகளுக்குத் தலா 1 இடம் உள்லது.

நியமன உறுப்பினர்கள் எண்ணிக்கை 8 ஆகும். சுயேச்சைகள் மற்றும் பிறரின் எண்ணிக்கை 6 ஆகும்.

English summary

RS has started discussion on Lokpal bill. The debate will continue for 8 hrs and voting will be taken place after that.