சேதமடைந்த அனைத்து படகுகளுக்கும் நிவாரணம் கிடைக்கும் வரை கடலூர் மீனவர்கள் வேலைநிறுத்தம்

கடலூர்: தானே புயலால் சேதமடைந்த அனைத்து படகுகளுக்கும் நிவாரணம் அளிக்கும் வரை கடலுக்கு செல்லப் போவதில்லை என்று கடலூர் மாவட்ட மீனவர்கள் அறிவித்துள்ளனர்.

கடலூர் மாவட்டம் தாண்டவராயன் சோழகன் பேட்டை முதல் நல்லவாடு வரை உள்ள 48 கிராமங்களைச் சேர்ந்த சுமார் 1 லட்சம் பேர் மீன்பிடித் தொழிலை நம்பி உள்ளனர் இந்நிலையில் அண்மையில் வீசிய தானே புயலால் அவர்களுக்கு சொந்தமான படுகுகளில் ஏராளமானவை சேதமடைந்தன. புயலால் 82 விசைப் படகுகள், 270 கண்ணாடி இழைப் படகுகள், 729 கட்டுமரங்கள் சேதமடைந்துள்ளதாக அரசு அறிவித்துள்ளது. ஆனால் மேலும் பல படகுகள் சேதமடைந்துள்ளதாகவும், அரசு அறிவித்துள்ள நிவாரணத் தொகை போதாது என்றும் மீனவர்கள் தெரிவித்துள்ளனர்.

புதுவையில் புயலால் சேதமடைந்த அனைத்து படகுகளுக்கும் அம்மாநில அரசு நிவராணம் வழங்கியுள்ளது. அதே போன்று கடலூரிலும் சேதமடைந்த அனைத்து படகுகளுக்கும் நிவாரணம் வழங்கும் வரை கடலுக்கு மீன்பிடிக்கச் செல்லப்போவதில்லை என்று அம்மாவட்ட மீனவர்கள் அறிவித்துள்ளனர்.

இது குறித்து கடலூர் சார் ஆட்சியர் கிரண் குராலா முன்னிலையில் கடந்த திங்கட்கிழமை பேச்சுவார்த்தை நடந்தது. இதில் மீன்பிடி படகு உரிமையாளர்கள் பலர் கலந்து கொண்டனர். அப்போது மீனவர்கள் கேட்பது போன்று நிவாரணம் வழங்க அரசாணையில் இடமில்லை என்று சார் ஆட்சியர் தெரிவித்தார். மேலும் கோரிக்கைகளை எழுதது மூலம் கொடுத்தால் அரசுக்கு அனுப்பி வைப்பதாக அவர் தெரிவித்தார். இதையடு்தது மீனவர்கள் தங்கள் கோரிக்கைகளை எழுதிக் கொடுத்தனர். இந்த பேச்சுவார்த்தையில் உடன்பாடு எதுவும் எட்டப்படவில்லை.

இது குறித்துத் தமிழ்நாடு மீனவர் பேரவை கடலூர் மாவட்டத் தலைவர் சுப்புராயன் கூறியதாவது,

டி.எஸ்.பேட்டை முதல் நல்லவாடு வரையிலான 48 கிராமங்களைச் சேர்ந்த மீனவர்களில் பலர் கடல் நீரோட்டத்தில் மாற்றம், சுனாமி நினைவு தினம் உள்பட பல காரணங்களால் கடந்த டிசம்பர் 23ம் தேதி முதலே கடலுக்கு செல்லவில்லை. புயலால் சேதமடைந்த அனைத்து படகுகளுக்கும் அரசு நிவாரணம் வழங்கும் வரை நாங்கள் யாரும் கடலுக்கு மீன்பிடிக்கச் செல்ல மாட்டோம். எங்களுக்கு ஆதரவு தெரிவிக்கும் வகையில் புதுவை மாநில மீனவர்களுகம் மீன்பிடிக்க செல்லவில்லை என்றார்.

கடலூரில் மீனவர்களின் போராட்டம் காரணமாக மீன்கடைகள் மூடிக்கிடந்தன. சில பகுதிகளில் வெளியூர்களில் இருந்து மீன்கள் கொண்டு வரப்பட்டு கிலோ ரூ.500க்கு விற்கப்பட்டது.

English summary

Cuddalore fishermen are on strike till the government gives relief fund to all the boats damaged by thane cyclone. They are not happy with the relief fund announced by the government. Puducherry fishermen haven't gone to the sea inorder to support Cuddalore fishermen.