குஜராத்திலிருந்து தமிழகத்துக்கு 200 மெகாவாட் மின்சாரம் மட்டுமே கிடைக்கும்!

சென்னை: குஜராத்திலிருந்து தமிழகத்துக்கு 200 மெகாவாட் மின்சாரம் மட்டுமே கிடைக்கும் என்று மின் ஆராய்ச்சி மற்றும் மேம்பாட்டு நிறுவனத்தின் தலைமை பொதுமேலாளர் பலராமன் தெரிவித்துள்ளார்.

எரிசக்தி கொள்கை தொடர்பான கருத்தரங்க தொடக்க விழா சென்னையில் நடந்தது. அதில் அவர் பேசுகையில், தமிழகத்தின் மின் பற்றாக்குறையைப் போக்குவதற்காக குஜராத்திடம் இருந்து 500 மெகாவாட் மின்சாரத்தை தமிழக அரசு கோரியுள்ளது. ஆனால், தென் மண்டல மின் கிரிட்டுடன் மத்திய கிரிட்டை இணைக்கும் பணி இன்னும் முடியாததால் இப்போதைக்கு 200 மெகாவாட் மட்டுமே கிடைக்கும்.

இப்போது மகாராஷ்டிரத்தில் உள்ள சோலாப்பூர், கர்நாடகத்தில் உள்ள ராய்ச்சூர் இடையே புதிய மின் கிரிட் பாதை அமைக்கும் பணி நடைபெற்று வருகிறது. இந்தப் பணிகள் அடுத்த ஆண்டு டிசம்பரில் முடிவடையும் என எதிர்பார்க்கப்படுகிறது.

அதன்பிறகு, தென் மாநிலங்கள் நாட்டில் உள்ள பிற மின் தொகுப்புகளோடு இணைக்கப்படும். இந்த இணைப்புக்குப் பிறகு தமிழகத்துக்கு குஜராத்திடம் இருந்து 500 மெகாவாட் மின்சாரம் முழுமையாகக் கிடைக்கும் என்பதால், அப்போது மின் பற்றாக்குறை தீர வாய்ப்புள்ளது.

மேலும் இந்த புதிய கிரிட் இணைப்புப் பணிகள் முடிந்துவிட்டால் குஜராத் மட்டுமின்றி பிற மின் மிகை மாநிலங்களும் கூட தமிழகத்துக்கு மின்சாரம் வழங்க முடியும் என்றார்.

English summary

Tamil Nadu will get only 200 MW of power from Gujarat against the demand of 500 MW due to the non-connectivity of the southern grid with the new grid. TN has sought 500 MW power to tide over the crisis, but currently it will be getting only 200 MW of power through the link and it will not be able to avail of 300 MW of additional power due to lack of connectivity between the southern and the new grid which can come into being only in 2014 after the laying of 765 KV line between Raichur in Karnataka to Solapur in Maharashtra