மிஷலை ஒபாமா கட்டிப்பிடித்த படம் பேஸ்புக்கில் "சூப்பர் ஹிட்" ஆனது
சிகாகோ: தனது மனைவி மிஷலை, அதிபர் ஒபாமா வாஞ்சையுடன் கட்டிப்பிடித்தபடி நிற்கும் புகைப்படம் பேஸ்புக் மற்றும் டிவிட்டரில் பெரும் ஹிட் ஆகியுள்ளது. புதிய சாதனையையும் படைத்துள்ளது.
எங்கு பார்த்தாலும் ஒபாமா செய்திகள்தான். அதிபர் தேர்தலுக்கு முன்பு இருந்ததை விட இப்போதுதான் ஒபாமா ஜூரம் மீடியாக்களை ஆட்டிப்படைத்து வருகிறது. குறிப்பாக சமூகவலைத்தளங்களில் ஒபாமா குறித்த செய்திகள், விமர்சனங்களும், கருத்துக்களும் நிரம்பி வழிந்து வருகின்றன. அதிலும் மனைவி மிஷலை அரவணைக்கும் ஒபாமாவின் புகைப்படம்தான் சூப்பர் ஹிட் ஆகியுள்ளது.
பேஸ்புக் பக்கங்களில் அதிக அளவில் விரும்பப்பட்ட படமாக இது உருவெடுத்து புதிய சாதனையையும் படைத்துள்ளது. மேலும் நான்கு ஆண்டுகள் என்று இந்தப் படத்துக்கு கேப்ஷன் கொடுத்து அத்தனை பேரும் தங்களது பக்கங்களில் பிரசுரித்து வருகின்றனர்.
இதுவரை பேஸ்புக்கில் இந்தப் புகைப்படத்துக்கு லைக் கொடுத்தவர்களின் எண்ணிக்கை 30.5 லட்சம் ஆகும். இன்னும் இது அதிகரித்துக் கொண்டே போகிறதாம். இதுவரை பேஸ்புக்கில் எந்த ஒரு படத்துக்கும் இப்படி ஒரு லைக் கிடைத்ததில்லையாம்.
உண்மையில் இந்தப் படம் லேட்டஸ்டாக எடுக்கப்பட்டதல்லை. கடந்த ஆகஸ்ட் மாதம் அயோவாவில் எடுக்கப்பட்ட படமாகும். ஆனால் இப்போது இந்தப் படத்துக்கு தனி கிராக்கி ஏற்பட்டு விட்டது.
சிவப்பு, வெள்ளை நிறத்தில் கட்டம் போட்ட டிரஸ்ஸில் மிஷல் இருக்கிறார். சாதாரணமான சட்டையில் ஒபாமா இருக்கிறார். இருவரது இந்த அரவணைப்புப் படம் ஓராயிரம் சேதிகளைச் சொல்வதாக உள்ளதாக இதைப் பார்த்தவர்கள் சிலாகித்துக் கூறியுள்ளனர். இந்தப் படம் எடுக்கப்பட்டபோது பிரசாரத்தில் தீவிரமாகவும், அதே சமயம் டென்ஷனாகவும் இருந்தார் ஒபாமா என்பது குறிப்பிடத்தக்கது.
இந்தப் படத்தைப் பற்றி கமென்ட் அடித்து வருபவர்கள் கூடவே ஒரு தமாஷான கமெண்ட்டையும் தட்டி விடுகின்றனர். அதாவது மிஷல் போட்டுள்ள டிரஸ் ரொம்ப விலை மலிவான டிரஸ்ஸாம். அதாவது 90 டாலர்தானாம். ஆன்லைன் ஷாப்பிங் மூலம் இதை வாங்கினாராம் மிஷல்.
பேஸ்புக் மட்டுமல்லாமல், டிவிட்டரிலும் கூட இந்தப் படம் சூப்பர் டூப்பர் ஹிட் ஆகியுள்ளது. இதுவரை 7 லட்சத்து 14 ஆயிரத்து 800 வாட்டி இதை ரீட்விட் செய்து விட்டனராம்.
Click it and Unblock the Notifications
Sign in with Google