பாலியல் வழக்குகளை பெண் நீதிபதிகளைக் கொண்டு விசாரிக்க வேண்டும்: நீதிபதி வர்மா குழு பரிந்துரை

By Siva

Updated: Wednesday, January 23, 2013, 16:57 [IST]

Subscribe to Oneindia Tamil

டெல்லி: பெண்களின் பாதுகாப்பு குறித்து ஆய்வு செய்யவும், சட்ட திருத்தங்களை பரிந்துரைக்கவும் அமைக்கப்பட்ட நீதிபதி வர்மா குழு தனது அறிக்கையை உள்துறை அமைச்சகத்திடம் சமர்பித்துள்ளது.

டெல்லியில் ஓடும் பேருந்தில் 23 வயது மாணவி பாலியல் பலாத்காரம் செய்யப்பட்டு இறந்தார். இதையடுத்து பாலியல் வன்கொடுமைகளைத் தடுப்பது தொடர்பாக நாட்டிலுள்ள குற்றவியல் சட்டங்களில் மேற்கொள்ள வேண்டிய திருத்தங்களைப் பரிந்துரைக்க முன்னாள் உச்ச நீதிமன்ற தலைமை நீதிபதி ஜே.எஸ். வர்மா தலைமையில் மூன்று பேர் கொண்ட குழுவை மத்திய அரசு அமைத்தது. அந்த குழு தனது ஆய்வை முடித்து அறிக்கையை இன்று உள்துறை அமைச்சகத்திடம் சமர்பித்துள்ளது.

அதில் கூறப்பட்டுள்ள முக்கிய பரிந்துரைகள்:

- காவல் நிலையத்தில் 25 சதவீதம் பெண் போலீசாரை நியமிக்க வேண்டும்.

- சிறாருக்கான உச்ச வயது வரம்பை 18ல் இருந்து 16க குறைக்க வேண்டும்.

- பாலியல் பலாத்கார வழக்கில் தண்டனை அனுபவிப்பவர்களுக்கு மன்னிப்பு வழங்கக் கூடாது.

- பாலியல் வழக்குகளில் குற்றம்சாட்டப்படுபவர்கள் தேர்தலில் போட்டியிட தடை விதிக்க வேண்டும்.

- பாலியல் குற்றங்களைத் தடுக்க புதிய சட்டங்கள் தேவையில்லை நல்ல நிர்வாகம் தான் தேவை.

- பெண்களை பாதுகாக்க முடியாமல் போனால் போலீசார் குறைந்தபட்சம் மன்னிப்பாவது கேட்க வேண்டும்.

- பாலியல் வன்கொடுமை தொடர்பான வழக்குகளை பெண் நீதிபதிகள் தான் விசாரிக்க வேண்டும் உள்ளிட்ட பரிந்துரைகள் தெரிவிக்கப்பட்டுள்ளது.

இது குறித்து நீதிபதி வர்மா கூறுகையில்,

பெண்களின் பாதுகாப்பு குறித்த பரிந்துரைகள் நம் நாட்டில் இருந்து மட்டுமின்றி வெளிநாடுகளிலும் இருந்தும் வந்தது. ஆக்ஸ்போர்டு, ஹார்வர்டு பல்கலைக்கழகங்களின் பேராசிரியர்கள், ஆஸ்திரேலியாவைச் சேர்ந்த நீதிபதி மற்றும் கனடா நாட்டு உச்ச நீதிமன்ற தலைமை நீதிபதி ஆகியோரும் பரிந்துரைகள் அளித்தவர்களில் அடக்கம்.

இந்த அறிக்கையை 29 நாட்களில் முடித்துவிட்டோம் என்பதை என்னால் நம்ப முடியவில்லை. கிட்டத்தட்ட 80,000 பேர் பரிந்துரைகள் வழங்கினர். ஒரு மாதத்தில் எங்களால் செய்ய முடிந்ததை அரசு தனது அதிகாரத்தை வைத்து அதில் பாதி அளவு நேரத்தில் செய்து முடிக்க வேண்டும். பெண்களுக்கு எதிரான குற்றங்கள் அதிகரிக்க அரசின் நல்லாட்சியின்மையே காரணம். நாங்கள் அளித்துள்ள பரிந்துரைகளை வைத்து வரும் பட்ஜெட் கூட்டத் தொடரில் சட்ட திருத்தம் செய்யப்படும் என்று நினைக்கிறோம்.

பாலியல் பலாத்காரம் செய்பவர்களுக்கு அதிகபட்சம் ஆயுள் தண்டனையும் அரிய வழக்குகளில் தூக்கு தண்டனையும் அளிக்க வேண்டும் என்று இந்த குழுவிடம் காங்கிரஸ் பரிந்துரைத்துள்ளது.