உணவு மசோதாவை ஆதரிக்க கருணாநிதி நிபந்தனை
இது தொடர்பாக நேற்று அவர் வெளியிட்ட அறிக்கையில், மத்திய அரசின் புதிய சட்டம் மொத்த மக்கள் தொகையில் 67.5 சதவீத மக்களுக்கு பயன்பட வழிவகுக்கிறது. ஆனால் தமிழ்நாட்டில் தற்போது பொது விநியோக திட்டத்தின் மூலம், மாநிலத்தின் மக்கள் தொகையில் 90 சதவீதம் பேர் பயனடைந்து வரும் நிலையில், மத்திய அரசின் இந்த புதிய சட்டம் பாதிப்பை ஏற்படுத்திவிடுமே என்று தமிழக அரசு கூறுகிறது.
தமிழக முதல் அமைச்சர் தெரிவித்துள்ள குறைபாடுகளும், கோரிக்கைகளும் அலட்சியப்படுத்தப்பட கூடியவை அல்ல. அவரும்கூட, இந்த உணவு பாதுகாப்பு மசோதாவில் சில திருத்தங்கள் செய்யப்பட வேண்டுமென்றும், அவை என்னென்ன என்றும்தான் பட்டியலிட்டிருக்கிறார்.
தி.மு.க.வை பொறுத்தவரை இந்த மசோதா காரணமாக தமிழகத்தில் ஏற்கனவே நடைமுறையில் இருந்து வரும் பொது விநியோக திட்டத்திற்கு எந்த வகையிலும் ஊனம் ஏற்பட்டு விடக்கூடாது என்பதிலும்; யாருக்கும் பாதிப்பு கூடாது என்பதிலும்; வேளாண்மையை தொடர்ந்து மேம்படுத்தி வேளாண் பெருமக்களின் நலன் காத்து, அவர் தம் விளை பொருள்களுக்கு கட்டுப்படியாக கூடிய உரிய விலை கிடைத்திடவேண்டும் என்பதிலும்; மாநில உரிமைகள் பறிபோய் விடக்கூடாது என்பதிலும் உறுதியாக இருக்கிறது. அதே நேரத்தில் இந்த மசோதாவின் காரணமாக கிடைக்கக்கூடிய பயன்களையும் இழந்து விடக்கூடாது.
ஒட்டு மொத்தமாக மாநில அரசு தான் இந்த மசோதாவினால் நடைமுறையில் ஏற்படக்கூடிய விளைவுகளைச் சீர்தூக்கி பார்த்து கருத்துகளைத் தெரிவிக்க வேண்டும். இந்த மசோதாவினால் தமிழ்நாட்டிற்கு பாதகம் தான் ஏற்படும், சாதகம் ஏற்படாது என்பதில் ஜெயலலிதா உறுதியாக இருந்தால்; சில்லரை வணிகத்தில் அன்னிய முதலீட்டை தமிழ்நாடு ஏற்றுக்கொள்ளாது என்று அறிவித்ததை போல, இந்த உணவு பாதுகாப்பு மசோதாவை பொறுத்தவரை தமிழகம் ஏற்காது என்று அறிவித்துவிடலாம். ஆனால் முதல்-அமைச்சரே தன் கடிதத்தில் திருத்தங்கள் தான் தேவை என்று கூறியிருக்கிறார்.
எனவே உணவு பாதுகாப்பு சட்டத்தை முழுமையாக எதிர்த்திடாமல், அப்படியே ஆதரித்தும் விடாமல் அவசர அவசியமான திருத்தங்களுடன் மாநிலங்களில் உள்ள நடைமுறைக்கு ஏற்ப கொண்டு வர மத்திய அரசு முன்வர வேண்டும்.
தமிழகத்தை பொறுத்தவரை ஏற்கனவே இருக்கின்ற மாநில உரிமைகளுக்கு இம்மியளவும் பாதிப்பு ஏற்படாமல், இந்த உணவு பாதுகாப்பு மசோதா நிறைவேற்றப்பட்டால் மாத்திரமே தி.மு.க. அதனை ஆதரிக்கும் என்று கூறியுள்ளார்.
Click it and Unblock the Notifications
Sign in with Google