தமிழகத்தின் பக்கத்தில்.. பிரமாண்டமாக வருது பெங்களூரின் 2வது கிரிக்கெட் மைதானம்! அடிக்கல்லுக்கு தயார்

பெங்களூர்: பெங்களூரில் 2வது பிரமாண்ட கிரிக்கெட் மைதானம் தமிழ்நாட்டின் எல்லையில் அமைய உள்ளது. சுமார் 80 ஆயிரம் பேர் அமர்ந்து பார்க்கூடிய வகையில் உருவாக்கப்படும் இந்த கிரிக்கெட் மைதானத்துக்கு வரும் 23ம் தேதி கர்நாடகா முதல்வர் சித்தராமையா அடிக்கல் நாட்டுகிறார். இந்த ஸ்டேடியம் குறித்த முக்கிய தகவல்கள் தற்போது வெளியாகி உள்ளது.

கடந்த ஆண்டு ஐபிஎல் சாம்பியன் பட்டத்தை முதன் முதலாக ஆர்சிபி எனும் ராயல் சேலஞ்சர்ஸ் பெங்களூர் அணி வாங்கியது. அதன்பிறகு பெங்களூர் சின்னச்சாமி கிரிக்கெட் மைதானத்தில் நடந்த கொண்டாட்டத்தின்போது கூட்ட நெரிசல் ஏற்பட்டு 11 பேர் உயிரிழநதனர். இதுபற்றி ஓய்வு நீதிபதி ஜான் மைக்கேல் டி குன்ஹா ஆணையம் விசாரணை நடத்தினார்.

Photo Credit:

AI

அப்போது இடநெருக்கடி தான் முக்கிய காரணம் என்பதும், சின்னச்சாமி கிரிக்கெட் மைதானத்தில் 33 ஆயிரம் இருக்கைகள் மட்டுமே உள்ளன. இதனால் நெருக்கடியில் கூட்ட நெரிசல் ஏற்பட்டது தெரியவந்தது. இதையடுத்து சின்னச்சாமி கிரிக்கெட் மைதானத்துக்கு மாற்றாக பெங்களூரில் பிரமாண்டமான கிரிக்கெட் மைதானம் அமைக்க முடிவு செய்யப்பட்டுள்ளது.

அதன்படி பெங்களூர் புறநகர் மாவட்டம் ஆனேக்கல் தாலுகாவில் உள்ள சூர்யா சிட்டியில் 2வது கிரிக்கெட் மைதானம் அமைக்கப்படுகிறது. இதற்கு முதல்வர் சித்தராமையா வரும் 23ம் தேதி அடிக்கல் நாட்ட உள்ளார். இந்த சூர்யா சிட்டி என்பது எலக்ட்ரானிக் சிட்டி, பொம்மசந்திரா மற்றும் ஓசூர் ரோட்டில் இருந்து மிகவும் பக்கத்தில் உள்ளது. மொத்தம் 80000 இருக்கைகளுடன் மைதானம் அமைய உள்ளது. இதனால் இந்த மைதானம் கட்டி முடிக்கப்படும்போது இது இந்தியாவின் 2வது பெரிய மைதானமாக இருக்கும் என்று எதிர்பார்க்கப்படுகிறது.

முதற்கட்டமாக இந்த மைதானம் பணிக்கு கர்நாடகா வீட்டு வசதி வாரியம் டெண்டர் கோரியது. இதன் மதிப்பு ரூ.943.46 கோடியாகும். இந்த தொகை முதற்கட்ட பணிக்கானது தான். முதறகட்ட பணி என்பது கிரிக்கெட் மைதானம் மற்றும் மைதானத்தின் உள்கட்டமைப்பு, மைதானத்தை இணைக்கும் ரோடு மற்றும் அதனை சார்ந்த பணிகளை உள்ளடக்கி உள்ளது. இந்த பணி தொடங்கும் பட்சத்தில் அடுத்த 3 ஆண்டுகளில் முடிக்கப்பட உள்ளது.

மைதானம் அமையும் சூர்யா சிட்டி என்பது தமிழ்நாட்டின் கிருஷ்ணகிரி மாவட்டம் ஓசூரில் இருந்து வெறும் 19 கிலோமீட்டர் தொலைவில் தான் உள்ளது. இது ஓசூரில் இருந்து தற்போதைய சின்னச்சாமி மைதானத்துக்கு செல்வதை விட குறைந்த தொலைவிலேயே அமைந்துள்ளது.

திட்ட ஆவணங்களின்படி இந்த கிரிக்கெட் மைதானம் மொத்தம் 1 லட்சத்து 8 ஆயிரத்து 963 சதுர மீட்டர் தொலைவுக்கு பரவி இருக்கும். இதில் போடியம் மட்டும் 1 லடசத்து 21 ஆயிரத்து 713 சதுர மீட்டராக இருக்கும். இருக்கைகளை எடுத்து கொண்டால் 76,500 சீட்டுகள் பொதுமக்களுககானது. 2 ஆயிரம் இருக்கைகள் விஐபிக்களுக்கானது. 1,000 இருக்கைகள் விவிஐபிக்களுக்கானது. 800 இருக்கைகள் மாற்றுத்திறனாளிகளுக்கானது என கூறப்பட்டுள்ளது.

இந்த மைதானம் என்பது வெறும் கிரிக்கெட் தாண்டி பிற பயன்பாட்டுக்கும் பயன்படுத்தும் வகையில் திட்டமிடப்பட்டு வருகிறது. அதன்படி சர்வதேச மற்றும் உள்ளூர் கிரிக்கெட் போட்டிகளை நடத்தும், கான்சர்ட், விழாக்கள் மற்றும் என்டர்டெயின்மென்ட் நிகழ்ச்சிகளை நடத்துவதற்கு ஏற்ப வடிவமைக்கப்பட உள்ளது.

English summary

Bengaluru 2nd cricket stadium is set to be established right on the Tamil Nadu border. Karnataka Chief Minister Siddaramaiah will lay the foundation stone on the 23rd of this month for this cricket stadium, which is being designed to accommodate a seating capacity of approximately 80,000 spectators. Key details regarding this stadium have now been released.