Thakkali Srinivasan Death: திகிலூட்டிய "ஜென்ம நட்சத்திரம்" பட இயக்குநர் தக்காளி சீனிவாசன் மறைவு!

Updated: Wednesday, March 11, 2026, 9:19 [IST]

Subscribe to Oneindia Tamil

பெங்களூர்: திரைப்பட தயாரிப்பாளரும் நடிகருமான தக்காளி சீனிவாசன் உடல்நலக் குறைவு காரணமாக பெங்களூரில் காலமானார். அவரது இறுதி சடங்குகள் இன்று நடைபெறுவதாக அவரது குடும்பத்தினர் தெரிவித்துள்ளனர்.

தமிழ்த் திரையுலகில் படத் தயாரிப்பு, இயக்கம், நடிப்பு, இசை, வசனம் என பன்முகத் திறமை கொண்டவர்களில் தக்காளி சீனிவாசனும் ஒருவர். இவர் கடந்த 1987ஆம் ஆண்டு பிரபு, அம்பிகா நடிப்பில் வெளியான "இவர்கள் வருங்கால தூண்கள்" என்ற திரைப்படத்தை தயாரித்திருந்தார்.

அதைத் தொடர்ந்து கதாநாயகனாக பிரபு, சரண்யாவை வைத்து "மனசுக்குள் மத்தாப்பு" படத்தையும் தயாரித்திருந்தார். அந்த படம் வெற்றி அடைந்தது. வேலு பிரபாகரன் இயக்கிய "நாளைய மனிதன்" படத்தில் முதல்முறையாக இசையமைப்பாளராக அறிமுகமானார்.

அதைத் தொடர்ந்து வேலுபிரபாகரனின் "நாளைய மனிதனின்" இரண்டாம் பாகமான "அதிசய மனிதன்" படத்திலும் இசையமைத்தார். தயாரிப்பாளர், இசையமைப்பாளர் என இரு துறைகளிலும் வென்ற சீனிவாசன் திடீரென படத்தின் இயக்குநர் அவதாரம் எடுத்தார்.

"ஜென்ம நட்சத்திரம்" என்ற திரில்லிங் படத்தை இயக்கினார். இந்த படத்தை பார்த்த பல சிறுவர்கள் இரவு நேரத்தில் தனியாக எழுந்து சிறுநீர் கழிக்க கூட பயந்தார்கள். அந்த அளவுக்கு ஸ்லோவாக படம் போனாலும் அதில் திகில் காட்சிகள் இருந்தன.

"விட்னஸ்" என்ற படத்தையும் தயாரித்த சீனிவாசன், அந்த படத்தில் நடித்திருந்தார். இயக்குநர் சித்ரா லட்சுமணன் இயக்கத்தில் நடிகர் கமல் நடித்த "சூரசம்ஹாரம்" படத்தில் முக்கிய கதாபாத்திரத்தில் நடித்திருந்தார்.

அதன் பிறகு படங்கள் தயாரிப்பதை நிறுத்திக் கொண்ட அவர் பெங்களூரில் ஒரு ஆசிரமத்தை நடத்தி அங்கு தத்தெடுத்த குழந்தைகளுடன் சேவை செய்து வந்தார். இந்த நிலையில் அவர் உடல்நலக் குறைவு காரணமாக பெங்களூரில் காலமானார். அவரது இறுதிச் சடங்கு இன்று நடைபெறுகிறது.

இவர் தக்காளி போல் செக்கசெவேல் என இருந்ததால் இவரை தக்காளி சீனிவாசன் என அழைத்தனர் என சொல்கிறார்கள். ஆனால் மற்றும் சிலரோ, சீனிவாசன் என்ற பெயரில் அப்போது நிறைய பேர் சினிமா துறையில் இருந்ததால் வேறுப்படுத்திக் காட்ட தக்காளி என்ற அடைமொழியுடன் அழைக்கப்பட்டதாகவும் சொல்லப்படுகிறது.