ராஜ்தானி, சதாப்தி, துரந்தோ ரயில் கட்டணம் இன்று முதல் உயர்வு

டெல்லி: ராஜ்தானி, துரந்தோ மற்றும் சதாப்தி ரயில்களுக்கான கட்டணம் இன்று முதல் உயர்த்தப்பட்டுள்ளது.

ராஜ்தானி, துரந்தோ மற்றும் சதாப்தி ரயில்களில் வழங்கப்படும் உணவுக் கட்டணம் 2 முதல் 4 சதவீதம் வரை உயர்த்தப்பட்டுள்ளது. இதனால் இந்த ரயில்களில் பயணம் செய்யும் கட்டணம் இன்று முதல் உயர்த்தப்பட்டுள்ளது.

எரிபொருள் விலை உயர்வை சமன்செய்ய குறிப்பிட்ட ரயில்களில் கடந்த 7ம் தேதி தான் கட்டணம் உயர்த்தப்பட்டது. இந்நிலையில் தற்போது மீண்டும் கட்டணம் உயர்த்தப்பட்டுள்ளது. ஏற்கனவே டிக்கெட் எடுத்தவர்கள் புதிய கட்டணத்தின்படி உள்ள கூடுதல் தொகையை டிடிஇயிடம் அளிக்க வேண்டும்.

மெட்ராஸ் ராஜ்தானி

புதிய கட்டணத்தின்படி டெல்லியில் இருந்து திருவனந்தபுரத்திற்கு இரண்டாம் வகுப்பு ஏசி பெட்டியில் செல்ல ரூ. 4,289 செலவாகும். முன்னதாக இந்த கட்டணம் ரூ.3,980 ஆக இருந்தது. மெட்ராஸ் ராஜ்தானி மூலம் சென்னை செல்ல ரூ. 3,385 கட்டணம் செலுத்த வேண்டும். முன்னதாக இந்த கட்டணம் ரூ.3,285 ஆக இருந்தது.

14 ஆண்டுகள் கழித்து

முன்னதாக கடந்த 1999ம் ஆண்டு தான் ரயிலில் வழங்கப்படும் உணவுக் கட்டணம் உயர்த்தப்பட்டது. இந்நிலையில் 14 ஆண்டுகள் கழித்து தற்போது உணவுக் கட்டணம் உயர்த்தப்பட்டுள்ளது என்பது குறிப்பிடத்தக்கது.

மும்பை ராஜ்தானி

மும்பை ராஜ்தானியின் இரண்டாம் வகுப்பு ஏசி கட்டணம் ரூ.2,435ல் இருந்து ரூ. 2,510 ஆக உயர்த்தப்பட்டுள்ளது. மேலும் ஹவ்ரா ராஜ்தானியின் இரண்டாம் வகுப்பு ஏசி கட்டணம் ரூ.2,4390ல் இருந்து ரூ. 2,554 ஆக உயர்த்தப்பட்டுள்ளது. டெல்லியில் இருந்து புவனேஸ்வர் செல்லும் புவனேஸ்வர் ராஜ்தானியின் கட்டணம் ரூ.14 உயர்த்தப்பட்டுள்ளது. அதுவே அங்கிருந்து டெல்லி திரும்புகையில் ரூ. 87 கூடுதலாக செலுத்த வேண்டும்.

மீன் வருவல்

முதல் வகுப்பு ஏசி பெட்டி மற்றும் எக்சிகியூட்டிவ் வகுப்பில் மீன் வருவல், மற்றும் மீதமுள்ள பிரீமியர் ரயில்களின் அனைத்து வகுப்புகளிலும் ஸ்டப்டு பரோட்டா, சன்னா குல்சா, பிளேவர்டு பால் புதிதாக வழங்கப்படும். புதிய மெனுவில் சாக்லேட், டாஃபி, பழ ரசம் உள்ளிட்டவையும் சேர்க்கப்பட்டுள்ளது.

டீ விலை குறைவு

காலை மற்றும் மாலை வேளையில் வழங்கப்படும் டீயின் விலை 30 முதல் 40 சதவீதம் வரை குறைக்கப்பட்டுள்ளது. ஆனால் மூன்று வேளை வழங்கப்படும் உணவின் விலை 50 முதல் 60 சதவீதம் வரை உயர்த்தப்பட்டுள்ளது.

காம்போ மீல்

ராஜ்தானி மற்றும் துரந்தோ ரயில்களில் வழக்கமாக வழங்கப்படும் மதியம் மற்றும் இரவு உணவின் விலையில் பாதி விலையில் காம்போ மீல் வழங்கப்படுகிறது.

English summary

Indian Railways fare hike means passengers have to shell out more for travelling in Rajdhani, Duronto and Shatabdi trains from today as catering charges have been raised in these premier trains by about two to four per cent. The revision in food tariff, which is included in the total fare in premier trains, also comes with a revised menu.