இந்தியாவையே விமர்சிக்கிறீர்களா? - அமெரிக்காவுக்கு வெளியுறவுத்துறை அமைச்சர் மறைமுக பதிலடி

டெல்லி : ரஷ்யா - உக்ரைன் போர் விவகாரத்தில் இந்தியாவுக்கு எதிரான பிரச்சாரத்தை அண்மைக் காலமாக கேட்டு வருவதாக இந்திய வெளியுறவுத்துறை அமைச்சர் ஜெய்ஷங்கர் தெரிவித்து உள்ளார்.

இந்தியா - பிரிட்டன் வியூக வகுப்பு மன்றத்தின் முதல் கூட்டம் டெல்லியில் நேற்று நடைபெற்றது.

இதில் 2 நாள் பயணமாக இந்தியா வந்துள்ள பிரிட்டன் வெளியுறவுத் துறை செயலாளர் லிஸ் ட்ரஸ் கலந்துகொண்டார்.

ரஷ்யா - உக்ரைன் இடையிலான போர் தொடர்ந்து வரும் நிலையில், நோட்டோ கூட்டமைப்பில் உள்ள மிக முக்கிய நாடான பிரிட்டன் வெளியுறவுத் துறை செயலாளரின் இந்திய பயணம் முக்கியத்துவம் வாய்ந்ததாக உள்ளது.

இந்தியாவுக்கு எதிராக பிரச்சாரம்

இந்த கூட்டத்தில் பேசிய இந்திய வெளியுறவுத்துறை அமைச்சர் ஜெய்ஷங்கர், "அண்மை காலங்களாக இந்தியாவுக்கு எதிராக நடைபெற்று கொண்டிருக்கும் பிரச்சாரத்தை நான் கவனித்து வருகிறேன். ரஷ்யாவிடம் அதிகளவில் எண்ணெய் மற்றும் எரிவாயு வாங்குவது ஐரோப்பிய நாடுகள்தான். கடந்த மார்ச் மாதத்தில் மட்டும் ஐரோப்பிய நாடுகள் ரஷ்யாவிடமே 15% கூடுதலாக எண்ணெய் வாங்கி இருக்கின்றன.

அரபு நாடுகளிடம்தான் அதிக எண்ணெய் இறக்குமதி

இந்தியாவுக்கு தேவையான எண்ணெய்யின் கணிசமான அளவை மத்திய கிழக்கு நாடுகளிடம் இருந்தே வாங்கி வருகிறோம். 7 முதல் 8% வரை அமெரிக்காவிடம் இருந்து இந்தியா எண்ணெய் வாங்கி வருகிறது. ரஷ்யாவிடம் இருந்து ஒரு சதவீதத்திற்கு குறைவான அளவிலேயே இந்தியா எண்ணெய் வாங்குகிறது.

மாற்று சந்தையை தேடுவது இயற்கைதான்

ரஷ்யாவிடம் எண்ணெய் வாங்கும் முதல் 10 நாடுகளில் இந்தியா இல்லை. இந்த பட்டியலில் எப்போதும் இந்தியா இருக்காது என்பதை உறுதியாக என்னால் சொல்ல முடியும். எண்ணெய் விலை உயரும்போது நாடுகள் பொதுமக்களின் நலனில் கருத்தில் கொண்டு, குறைவான விலையில் பெட்ரோல், டீசல் கிடைக்கும் சந்தைகளை பார்ப்பது இயற்கையானதே! இன்னும் 2 அல்லது 3 மாதங்கள் காத்திருந்தால், ரஷ்யாவிடம் யார் அதிகளவில் எண்ணெய்யையும் எரிவாயுவையும் இறக்குமதி செய்கிறார்கள் என்பதை என்னால் உறுதியாக கூற முடியும்.

பிரிட்டன் வெளியுறவுத்துறை செயலாளர் கருத்து

ரஷ்யாவிடம் இந்தியா எண்ணெய் வாங்குவது குறித்து கருத்து தெரிவித்துள்ள பிரிட்டன் வெளியுறவுத்துறை செயலாளர், "இந்தியா இறையாண்மை மிக்க ஒரு நாடு. இந்தியா என்ன செய்ய வேண்டும், என்ன செய்யக்கூடாது என்று நான் எதுவும் சொல்ல மாட்டேன். இந்தியாவிடம் இருந்து உக்ரைனுக்கு ஆதரவு இருக்கிறது என வலுவாக நம்புகிறேன். ஆனால் இதுவும் மற்ற நாடுகள் என்ன செய்ய வேண்டும் என்று சொல்வதும் ஒன்றல்ல." என்றார்.

English summary

India foriegn minister jaishankar answer to US: ரஷ்யா - உக்ரைன் போர் விவகாரத்தில் இந்தியாவுக்கு எதிரான பிரச்சாரத்தை அண்மைக்காலமாக கேட்டு வருவதாக இந்திய வெளியுறவுத்துறை அமைச்சர் ஜெய்ஷங்கர் தெரிவித்து உள்ளார்.