சென்னை கிண்டி மேம்பாலத்தில் ஒரே பரபரப்பு..அரை நிர்வாண கோலத்தில் கத்தியுடன் கலாட்டா செய்த நபர்

சென்னை : சென்னை கிண்டி ரயில்வே மேம்பாலத்தில், அரை நிர்வாணமாக, கத்தியால் தன்னைத்தானே காயப்படுத்திக்கொண்டு, வாகன ஒட்டிகளை மிரட்டிய நபரால் பரபரப்பு ஏற்பட்டது.

எப்போதும் வாகன போக்குவரத்தால் பரபரப்பாக காணப்படும் கிண்டியில், அங்கு உள்ள ரயில்வே மேம்பாலத்தில், 40 வயது மதிக்கத்தக்க நபர், அரை நிர்வாணத்துடன் நடந்து சென்றார். அப்போது அவர் திடீரென தனது கையில் வைத்திருந்த கத்தியால், தன்னைத்தானே உடம்பில் காயம் ஏற்படுத்திக் கொண்டார். பின்னர், கத்தியை கையில் சுழற்றியபடியே, வாகன ஓட்டிகளையும் அச்சுறுத்தினார். இதனால், அவ்வழியே சென்ற வாகன ஓட்டிகள், அச்சமடைந்து வாகனங்களை சாலையில் ஆங்காங்கே நிறுத்திவிட்டு, நாலாபுறமும் சிதறி ஓடினர்.

வாகன ஓட்டிகள் சாலையில் ஆங்காங்கே நிறுத்தியதால், பரபரப்பாக காட்சியளிக்கும் கிண்டி பகுதியில் திடீரென போக்குவரது நெரிசல் ஏற்பட்டது. இதுகுறித்து தகவலின்பேரில் சம்பவ இடத்திற்கு போலீசார் வந்ததும், அந்த நபர் அங்கிருந்து ரத்தம் சொட்ட சொட்ட ஓட முயன்றார்.

எனினும், போலீசார் அவரை நிற்க வேண்டும் என்று குரல் கொடுத்தவாறு பின்தொடர்ந்தனர். எனினும் அந்த நபர் அதனையெல்லாம் காதில் வாங்கிக் கொள்ளாமல் அங்கிருந்து தப்பிச் செல்ல முயன்றார். ரத்தம் சொட்ட சொட்ட சென்ற அந்த நபரை, மருத்துவமனைக்கு அழைத்துச் செல்வதாகக் கூறியும் அங்கிருந்து தப்பிச் செல்வதிலேயே அவர் குறியாக இருந்தார்.

ஒருகட்டத்தில் பொறுமையிழந்த போலீசார், அந்த நபரை விரட்டிச் சென்று மடக்கிப் பிடித்தனர். பின்னர், அவரிடம் இருந்த கத்தியை பறிமுதல் செய்தனர். மேலும், ரத்தக்காயங்களுடன் இருந்த அவரை, உடனடியாக சைதாப்பேட்டை அரசு மருத்துவமனைக்கு, முதலதவி சிகிச்சைக்காக அழைத்து சென்றனர். பின்னர் போலீசார் விசாரணை நடத்தியபோது, கத்தியைக் காட்டி மிரட்டிய அந்த நபர், மனநலம் பாதிக்கப்பட்ட நிலையில் இருந்ததால், இந்த சம்பவம் தொடர்பாக எந்த நடவடிக்கையும் எடுக்க இயலவில்லை. இதனையடுத்து, அவரின் காயத்துக்கு சிகிச்சை அளிக்கப்பட்டு, கீழ்ப்பாக்கம் மனநல மருத்துவமனையில் சேர்த்தனர்.

எப்போதும் பரபரப்பாக காணப்படும் சென்னை கிண்டியில், வாகன ஓட்டிகளை கத்தியைக் காட்டி மிரட்டியதோடு, தன்னைத்தானே தாக்கி கொண்டு, ரத்தம் சொட்ட சொட்ட சாலையில் சென்ற நபரால், அப்பகுதியில் சிறிதும் நேரம் பரபரப்பு ஏற்பட்டது.

English summary

Threatening motorists with a knife... Half naked person created a stir in Guindy