ஒன்றிய அரசு திருந்தும் என நினைக்கிறேன்.. திருந்தவில்லை என்றால் நாங்கள் திருத்துவோம் -ஆ.ராசா

Updated: Monday, September 20, 2021, 14:52 [IST]

Subscribe to Oneindia Tamil

சென்னை: ஒன்றிய அரசு இனி மேல் தனது தவறை உணர்ந்து திருந்தும் என நம்புவதாகவும் இல்லையென்றால் திருத்தப்படும் எனவும் திமுக துணை பொதுச்செயலாளர் ஆ.ராசா கூறியிருக்கிறார்.

காங்கிரஸ் தலைவர் சோனியாகாந்தியின் முயற்சியால் ஒன்றிய அரசுக்கு எதிராக இன்று தொடங்கியுள்ள எதிர்க்கட்சிகள் போராட்டம் நாடு முழுவதும் வரும் 30-ம் தேதி வரை தொடரவுள்ளது.

இதனிடையே வரும் 27-ம் தேதியன்று கம்யூனிஸ்ட் கட்சி வேலை நிறுத்தப் போராட்டத்துக்கு அழைப்பு விடுத்திருப்பது குறிப்பிடத்தக்கது.

கருப்புக்கொடி

ஒன்றிய அரசை கண்டித்து தமிழகம் முழுவதும் திமுக மற்றும் அதன் கூட்டணிக் கட்சிகள் சார்பில் கருப்புக்கொடி ஏந்தி கண்டன ஆர்ப்பாட்டம் நடத்தப்பட்டன. சென்னையில் அண்ணா அறிவாலயம், திமுக இளைஞரணி அலுவலகமான அன்பகம், கருணாநிதியின் கோபாலபுரம் வீடு, கனிமொழியின் சி.ஐ.டி.காலனி இல்லம் ஆகிய 4 இடங்களில் கருப்புக் கொடி ஆர்ப்பாட்டம் நடைபெற்றது.

ஆர்ப்பாட்டம்

இதில் திமுக தலைமையகமான அண்ணா அறிவாலயத்தில் நடைபெற்ற ஆர்ப்பாட்டத்துக்கு முன்னாள் மத்திய அமைச்சரும், திமுக துணை பொதுச்செயலாளருமான ஆ.ராசா தலைமை தாங்கினார். அவருடன் அமைப்புச் செயலாளர் அன்பகம் கலை, டி.கே.எஸ்.இளங்கோவன் எம்.பி.ஆகியோர் பங்கேற்றனர். ஒன்றிய அரசுக்கு எதிரான ஆர்ப்பாட்ட வாசகங்களை ஆ.ராசாவே படித்து உரக்க குரல் எழுப்பினார்.

திருத்துவோம்

தொடர்ந்து செய்தியாளர்களை சந்தித்த அவர், ஒன்றிய அரசு மக்கள் விரோத நடவடிக்கைகளை தொடர்ந்து மேற்கொண்டு வருவதாகவும் நாடு முழுவதும் எதிர்க்கட்சிகள் நடத்தும் கருப்புக்கொடி ஆர்ப்பாட்டம், போராட்டத்தை பார்த்தாவது திருந்தும் என நம்புவதாகவும் கூறினார். ஒரு வேளை மத்திய அரசு தனது நடவடிக்கைகளை திருத்திக்கொள்ளாவிட்டால் திமுக தலைவர் மு.க.ஸ்டாலின் அதை திருத்துவார் என ஆ.ராசா தெரிவித்தார்.

குற்றச்சாட்டு

தாழ்த்தப்பட்ட மற்றும் சிறுபான்மையின மக்களின் வேலைவாய்ப்புகளை பறிக்கும் வகையில் மத்திய அரசின் செயல்பாடுகள் அமைந்துள்ளதாக அவர் குற்றஞ்சாட்டினார். பொதுத்துறை நிறுவனங்களை தனியாருக்கு விற்கக்கூடாது, விவசாயிகளின் போராட்டத்துக்கு மதிப்பளித்து 3 வேளாண் சட்டங்களை திரும்ப பெற வேண்டும், பெட்ரோல், டீசல், சமையல் எரிவாயு விலை உயர்வை கட்டுப்படுத்த வேண்டும், பொருளாதார சரிவை சரிசெய்ய வேண்டும், வேலைவாய்ப்புகளை ஏற்படுத்த வேண்டும் என்பது எதிர்க்கட்சிகளின் கோரிக்கைகளாகும்.