5 தொகுதிகளில் தேர்தலை ரத்து செய்க.. "திமுக பணம் தருகிறது.." தேர்தல் ஆணையத்தில் அதிமுக அதிரடி புகார்

Updated: Monday, April 5, 2021, 23:01 [IST]

Subscribe to Oneindia Tamil

கொளத்தூர், சேப்பாக்கம் உட்பட ஐந்து தொகுதிகளில் திமுக பணப் பட்டுவாடா செய்வதாகவும், எனவே, அங்கு, தேர்தலை ரத்து செய்ய வேண்டும் என்று தேர்தல் ஆணையத்தில் அதிமுக சார்பில் அமைச்சர் ஜெயக்குமார் புகார் அளித்துள்ளார்.

தமிழகத்தில் இதுவரை 420 கோடிக்கும் மேலே பணம் பறிமுதல் செய்யப்பட்டுள்ளதாக தேர்தல் ஆணையம் அறிவித்துள்ளது.

இந்த நிலையில் திமுக பணப் பட்டுவாடா செய்வதாக குற்றம் சாட்டி 5 தொகுதிகளில் தேர்தலை ரத்து செய்யுமாறு அதிமுக தரப்பு கூறியுள்ளது பரபரப்பை ஏற்படுத்தியுள்ளது.

5 தொகுதிகள்

தமிழக தேர்தல் ஆணையத்தில் அதிமுக சார்பில் அமைச்சர் ஜெயக்குமார் இது தொடர்பாக புகார் கடிதம் அளித்துள்ளார். அதில், கொளத்தூர் , சேப்பாக்கம், திருச்சி மேற்கு, காட்பாடி மற்றும் திருவண்ணாமலை ஆகிய தொகுதிகளில் அதிகமாக பணப்பட்டுவாடா நடைபெறுவதால் தேர்தலை ரத்து செய்ய வேண்டும் என்று கோரிக்கை விடுக்கப்பட்டுள்ளது.

விஐபி தொகுதிகள்

கொளத்தூர் தொகுதியில் திமுக தலைவர் ஸ்டாலின் போட்டியிடுகிறார். சேப்பாக்கம் தொகுதியில் உதயநிதி ஸ்டாலின், திருச்சி மேற்கு தொகுதியில் முன்னாள் அமைச்சர் நேரு, காட்பாடி தொகுதியில் முன்னாள் அமைச்சர் துரைமுருகன், திருவண்ணாமலை தொகுதியில் முன்னாள் அமைச்சர் வேலு ஆகியோர் போட்டியிடுகின்றனர். எனவே இவை விஐபி தொகுதிகளாக பார்க்கப்படுகிறது.

ஜெயக்குமார் பேட்டி

புகாருக்கு பிறகு நிருபர்களிடம் அமைச்சர் ஜெயக்குமார் பேசியதாவது, திமுகவினர் ஜனநாயகப் படுகொலை செய்வதில் கைதேர்ந்தவர்கள் . எனவேதான் திருமங்கலம் பார்முலா என்பதை கொண்டு வந்தனர். வாக்காளர்களுக்கு பணம் தரும் கலாச்சாரம் தமிழகத்தில் இல்லாமல் இருந்தது. முதல் முறையாக திருமங்கலம் இடைத்தேர்தலில் திமுக வாக்காளர்களுக்கு பணம் கொடுத்தது. திருமங்கலம் பார்முலாப்படி ஒவ்வொரு தேர்தலிலும் வாக்காளர்களுக்கு பணம் கொடுத்து ஒரு சில தலைவர்களை அந்தக் கட்சி வெற்றி பெற வைக்கிறது. அவர்கள் எவ்வளவு பணம் செலவு செய்தாலும் சரி, பெரும்பாலான தொகுதிகளில் அதிமுகதான் வெற்றி பெறுகிறது. அதில் மாறுபட்ட கருத்து கிடையாது. ஆனால், அதிமுகவுக்கு மக்கள் ஆதரவு இருப்பதை தடுக்கும் வகையில் பணம் கொடுத்து வாக்குகளை பெறுகிறது திமுக.

கூகுள் பே பணம்

தமிழ்நாடு முழுவதும் திமுக ஜனநாயக படுகொலை செய்து பணநாயகம் என்பதை நிலைநிறுத்தி வருகிறது. பணம் மிக அதிகமாக விளையாடியிருக்கிறது. தேர்தல் ஆணையம் நியாயமாகவும் சுதந்திரமாகவும் அச்சமின்றியும் யாராக இருந்தாலும் நடவடிக்கை எடுக்க வேண்டும். நாம் புகாரில் குறிப்பிடப்பட்டுள்ள 5 தொகுதிகளிலும் நூதன முறையில் பணப்பட்டுவாடா செய்யப்படுகிறது. கூகுள் பே மூலமாக பணம் சப்ளை செய்கிறது திமுக. இவ்வாறு ஜெயக்குமார் தெரிவித்தார்.

கடந்த தேர்தல்

தமிழகத்தில் பணப்பட்டுவாடா அதிகரித்துள்ளதாக புகார் எழுந்துள்ள நிலையில் ஆளும் அதிமுக தரப்பு இதுபோன்ற ஒரு புகாரை வழங்கியுள்ளது முக்கியத்துவம் பெறுகிறது. இந்த புகாரை தொடர்ந்து ஐந்து தொகுதிகளில் தேர்தல் ரத்து செய்யப்படுமோ என்ற பரபரப்பு பேச்சுக்கள் எழுந்துள்ளன. கடந்த சட்டசபை தேர்தலின்போது தஞ்சை மற்றும் அரவக்குறிச்சி ஆகிய இரு சட்டசபை தேர்தலை ஒத்தி வைத்தது தேர்தல் ஆணையம். பணம் ஆறாக ஓடியதை கட்டுப்படுத்த முடியாமல் போனதுதான் காரணம் என்பது குறிப்பிடத்தக்கது.