பக்ரீத் பண்டிகை.. சென்னையில் இருந்து இன்று சொந்த ஊர் போறீங்களா.. மகிழ்ச்சியான செய்தி
சென்னை: பக்ரீத் பண்டிகையை முன்னிட்டு சென்னை, கோவை, பெங்களூரு, சேலம், திருச்சி போன்ற பகுதிகளில் இருந்து மற்ற பகுதிகளுக்கு சிறப்பு பேருந்துகள் இயக்கப்படும் என்று அறிவிக்கப்பட்டுள்ளது.
நாளை பக்ரீத் பண்டிகை உற்சாகமாக கொண்டாடப்பட உள்ளது. 30ம் தேதி வெள்ளிக்கிழமை என்பதால் அன்று ஒரு நாள் கூடுதலாக விடுமுறை எடுத்தால், அடுத்ததாக சனி மற்றும் ஞாயிறு கிழமைகள் வருகிறது. அடுத்த நான்கு நாட்கள் பலரும் சென்னை,பெங்களூரு போன்ற நகரங்களில் இருந்து சொந்த ஊர் செல்ல ஆர்வம் காட்டுவார்கள்.
இதனால் பேருந்து நிலையங்களில் இன்று வழக்கத்தை விட மக்கள் கூட்டம் அதிகமாக இருக்கும். இதனை கருத்தில் கொண்டு சென்னை, பெங்களூரு போன்ற நகரங்களில் இருந்து மாநிலத்தின் பிற பகுதிகளுக்கு சிறப்பு பேருந்துகள் இயக்க அரசு போக்குவரத்து கழகம் முடிவு செய்துள்ளது. பொதுவாக விடுமுறை காலங்களில் மக்கள் கூட்டம் அலைமோதும். அதுபோன்ற சமயங்களில் மக்கள் அரசு பேருந்துகளையே அதிகம் சார்ந்துள்ளனர். ஏனெனில் தனியார் பேருந்துகளில் கட்டணம் அப்போது நினைத்து பார்க்க முடியாத அளவிற்கு இருக்கும்.அந்த வகையில் இப்போதும் ஆம்னி பேருந்துகளில் டிக்கெட் கட்டணம் வழக்கத்தை விட அதிகமாக உள்ளது,.
இந்நிலையில் பக்ரீத் பண்டிகையை முன்னிட்டு சென்னை, கோவை, பெங்களூரு, சேலம், திருச்சி போன்ற பகுதிகளில் இருந்து மற்ற பகுதிகளுக்கு சிறப்பு பேருந்துகள் இயக்கப்படும் என்று அறிவிக்கப்பட்டுள்ளது.
விரைவு போக்குவரத்துக் கழக மேலாண் இயக்குநர் கே.இளங்கோவன் செவ்வாய்கிழமை வெளியிட்ட அறிவிப்பில் கூறியிருந்ததாவது: பக்ரீத் மற்றும் தொடர் விடுமுறையை முன்னிட்டு இன்று (ஜூன் 28) சென்னையிலிருந்தும், பிற இடங்களிலிருந்தும் கூடுதலான பயணிகள் தமிழகம் முழுவதும் பயணம் மேற்கொள்வார்கள் என எதிர்பார்க்கப்படுகிறது.
இதைக் கருத்தில் கொண்டு, கூடுதலாக சிறப்புப் பேருந்துகளை இயக்க திட்டமிடப்பட்டுள்ளது. அதன்படி, சென்னையிலிருந்து தமிழகத்தின் முக்கிய இடங்களுக்கு இன்று இயக்கக்கூடிய பேருந்துகளுடன் கூடுதலாக 400 சிறப்புப் பேருந்துகளும், கோவை, மதுரை, நெல்லை, திருச்சி, சேலம் போன்ற இடங்களிலிருந்து பெங்களூரு உள்ளிட்ட பிற முக்கிய இடங்களுக்கு 400 சிறப்புப் பேருந்துகளும் என மொத்தம் 800 சிறப்புப் பேருந்துகள் இயக்க திட்டமிடப்பட்டுள்ளது. இவ்வாறு அதில் கூறப்பட்டுள்ளது.
Click it and Unblock the Notifications
Sign in with Google