தமிழக பட்ஜெட்டில் மாற்றுத்திறனாளிகளுக்கு நல்ல செய்தி! ஓய்வூதியம் & பராமரிப்பு உதவித்தொகை அதிகரிப்பு

Updated: Monday, March 20, 2023, 11:25 [IST]

Subscribe to Oneindia Tamil

சென்னை: இன்று தமிழக பட்ஜெட்டை அமைச்சர் பிடிஆர் தாக்கல் செய்தார். இதில் மாற்றுத்திறனாளிகள் நலன் குறித்து பல முக்கிய அறிவிப்புகள் இடம் பெற்றுள்ளது.

இன்று திமுக அரசு தமிழக அரசின் பட்ஜெட்டை தாக்கல் செய்கிறது. நிதியமைச்சர் பழனிவேல் தியாகராஜன் மூன்றாவது முறையாக இந்தப் பட்ஜெட்டை தாக்கல் செய்கிறார்.

கடந்த இரண்டு ஆண்டுகளைப் போலவே. இந்தாண்டும் காகிதம் இல்லாத பட்ஜெட்டாக இருக்கிறது. காலை 10 மணிக்குத் தமிழ்நாடு சட்டசபையில் நிதியமைச்சர் பிடிஆர் தனது பட்ஜெட் உரையை வாசிக்க தொடங்கினார்..

மாற்றுத்திறனாளிகள்

தமிழக அரசின் இந்த பட்ஜெட்டில் பல்வேறு முக்கிய அறிவிப்புகள் இடம்பெற்றுள்ளது. குறிப்பாக மாற்றுத்திறனாளிகள் நலன் குறித்து அமைச்சர் பிடிஆர், "மாற்றுத்திறனாளிகள் என்ற பெயரைக் கருணாநிதி தான் சூட்டினார் என்பது அனைவருக்கும் தெரியும். இந்த துறை முக்கியமானது என்பதால் முதல்வர் இதைத் தனது நேரடிக் கட்டுப்பாட்டில் வைத்து, கண்காணித்து வருகிறார்.

ரைட்ஸ் திட்டம்

உலக வங்கியின் நிதியுதவியுடன் 1763 கோடி மதிப்பில் மாற்றுத்திறனாளிகளுக்கு ரைட்ஸ் திட்டம் எனப்படும் உரிமைத் திட்டம் செயல்படுத்தப்பட்டு வருகிறது. மாற்றுத்திறனாளிகளுக்கு வேலைவாய்ப்பு அளித்து அனைவரையும் உள்ளடக்கிய சமூகத்தை உருவாக்குவதே இதன் நோக்கமாகும். இத்திட்டம் வரும் ஆண்டில் 15 மாவட்டங்களில் செயல்படுத்தப்படும். உடல் குறைபாடு மதிப்பீடு சான்றிதழ், ஆரம்பக்கட்ட சிகிச்சை கோட்ட அளவிலேயே வழங்க 39 ஒருங்கிணைந்த சேவை மையங்கள் அமைக்கப்படும்.

ஓய்வூதியம் உயர்வு

வீடுகளிலேயே சிகிச்சை அளிக்கவும், பல உதவிகளைப் பெறவும் தன்னார்வ உறுப்பினர்களைக் கொண்ட 150 மையங்கள் உருவாக்கப்படும். 6.8 லட்சம் மாற்றுத் திறனாளிகள் பயன் பெறும் வகையில் அவர்களுக்கான ஓய்வூதியம் மாதம் 1000 ரூபாயில் இருந்து 1500 ரூபாயாக உயர்த்தப்படுகிறது. கடுமையான பாதிப்பு கொண்ட மாற்றுத் திறனாளிகளுக்கான பராமரிப்பு தொகை 1,500 ரூபாயில் இருந்து 2000ஆக உயர்த்த முதல்வர் ஏற்கனவே ஆணையிட்டுள்ளார். இதற்காக 1443 கோடி ரூபாய் ஒதுக்கீடு செய்யப்பட்டுள்ளது.

நாட்டிலேயே முதலிடம்

மாற்றுத் திறனாளிகள் தொழில் முன்னேற்றத்திற்குக் கடன் உத்தரவாதம், வட்டி மானியத்தை மாநில அரசு வழங்குகிறது. இதன் மூலம் 11,155 மாற்றுத் திறனாளிகளுக்கு 50 கோடி கடனுதவி வழங்கி நாட்டிலேயே முதல் இடத்தில் தமிழ்நாடு உள்ளது. அரசு பலன்கள் மாற்றுத் திறனாளிகளுக்கு முழுமையாகச் சென்றடைய மாற்றுத் திறனாளிகள் குறித்த விரிவான டேட்டா பேஸை உருவாக்கியுள்ளோம். இதன் முதற்கட்டமாக பல்வேறு அரசு நலத்திட்டங்களில் பலன் பெறும் 9 லட்சம் பேரின் தரவுகள் இதில் இடம்பெற்றுள்ளது" என்றார்.