பட்ஜெட் 2026: சாமானியர்களுக்கு வரப்பிரசாதம்- வருமான வரி முதல் சுற்றுலா வரை .. முழு விவரம்

டெல்லி: மத்திய நிதி அமைச்சர் நிர்மலா சீதாராமன் அவர்கள் இன்று = நாடாளுமன்றத்தில் 2026-27 நிதியாண்டிற்கான பட்ஜெட்டைத் தாக்கல் செய்தார். "புதிய வருமான வரிச் சட்டம் 2025, வரும் ஏப்ரல் 1, 2026 முதல் அமலுக்கு வரும்" என்று உறுதியளித்த அவர், வரி செலுத்தும் முறையை எளிமையாக்குவதே இந்த பட்ஜெட்டின் நோக்கம் என்று கூறியுள்ளார். இந்த பட்ஜெட் நடுத்தர மக்கள் மற்றும் சிறு வரிதாரர்களுக்குத் தலைவலியைத் தரும் "சிக்கலான வரி நடைமுறைகளை" ஒழித்து, டிஜிட்டல் முறையிலான வெளிப்படையான தீர்வுகளை வழங்கியுள்ளது.

சாமானிய இந்தியர்களைக் கவரும் வகையில் பட்ஜெட்டில் இடம்பெற்றுள்ள 10 முக்கிய அறிவிப்புகள் முழு விவரம்:

1. மிக எளிமையான வரிப் படிவங்கள்

வருமான வரி செலுத்தும் முறையை எளிதாக்க புதிய படிவங்கள் மற்றும் விதிகள் விரைவில் அறிமுகப்படுத்தப்படும். சாமானிய மக்களும் வரி விதிகளை எளிதாகப் புரிந்து கொண்டு, தாமாகவே முன்வந்து வரி செலுத்துவதை ஊக்குவிக்க இந்த நடவடிக்கை எடுக்கப்பட்டிருக்கிறது.

2. விபத்து இழப்பீடு வட்டிக்கு வரி விலக்கு

மோட்டார் வாகன விபத்து இழப்பீடு தீர்ப்பாயம் வழங்கும் இழப்பீட்டுத் தொகைக்கான வட்டிக்கு இனி வருமான வரி கிடையாது. மேலும், அந்த வட்டித் தொகையில் பிடிக்கப்பட்டு வந்த TDS முறையும் முழுமையாக ரத்து செய்யப்படுகிறது.

3. வெளிநாட்டுச் சுற்றுலா இனி மலிவாகும்

வெளிநாட்டுச் சுற்றுலாப் பயணங்களுக்கான பேக்கேஜ்களை வாங்கும் போது விதிக்கப்படும் டிசிஎஸ் வரி, தற்போதுள்ள 5% மற்றும் 20% என்ற நிலையிலிருந்து ஒட்டுமொத்தமாக 2 சதவீதமாகக் குறைக்கப்பட்டுள்ளது. இதற்குத் தொகை வரம்பு எதுவும் கிடையாது.

4. கல்வி மற்றும் மருத்துவச் செலவுகள் குறைப்பு

வெளிநாட்டிற்குப் பணம் அனுப்பும் திட்டத்தின் (LRS) கீழ், கல்வி மற்றும் மருத்துவத் தேவைகளுக்காக வெளிநாட்டிற்கு அனுப்பப்படும் பணத்திற்கான வரி , 5 சதவீதத்திலிருந்து 2 சதவீதமாகக் குறைக்கப்பட்டிருக்கிறது.

5. சிறு வரிதாரர்களுக்குத் தானியங்கிச் சான்றிதழ்

குறைந்த வரிப் பிடித்தம் அல்லது வரிப் பிடித்தம் இல்லா சான்றிதழ் பெற இனி அதிகாரிகளை நாடி விண்ணப்பிக்க வேண்டிய அவசியமில்லை. இதற்கென விதிகள் அடிப்படையிலான தானியங்கி முறை அறிமுகப்படுத்தப்பட்டுள்ளது.

6. முதலீட்டாளர்களுக்குப் படிவம் 15G / 15H எளிமை

பல நிறுவனங்களில் பங்குகள் வைத்திருக்கும் முதலீட்டாளர்கள், தங்களது 15G அல்லது 15H படிவங்களை இனி ஒரு முறையே சமர்ப்பித்தால் போதும். அந்தத் தகவலைப் பொதுக் காப்பகங்கள் நேரடியாகச் சம்பந்தப்பட்ட நிறுவனங்களுக்குக் கொண்டு சேர்த்துவிடும்.

7. வரித் தாக்கல் திருத்தம் செய்ய கூடுதல் அவகாசம்

தாக்கல் செய்யப்பட்ட வருமான வரி கணக்குகளைத் திருத்தம் செய்வதற்கான காலக்கெடு டிசம்பர் 31-லிருந்து மார்ச் 31 வரை நீட்டிக்கப்பட்டுள்ளது. இதற்கு ஒரு சிறிய கட்டணம் மட்டும் செலுத்தினால் போதும்.

8. வரி தாக்கல் செய்யப் புதிய காலவரிசை

ஒரே நேரத்தில் இணையதளம் முடங்குவதைத் தவிர்க்க, வரி தாக்கல் செய்யப் வெவ்வேறு தேதிகள் அறிவிக்கப்பட்டுள்ளன:

ITR 1 மற்றும் ITR 2: ஜூலை 31 வரை.

வணிக நிறுவனங்கள் (Non-audit) மற்றும் அறக்கட்டளைகள்: ஆகஸ்ட் 31 வரை.

9. வெளிநாடு வாழ் இந்தியர்களுக்கு சொத்து விற்பனை எளிமை

ஒரு வெளிநாடு வாழ் இந்தியரிடமிருந்து இந்தியாவில் இருக்கும் சொத்தை வாங்கும் போது, வாங்குபவர் தனது PAN கார்டு மூலமே வரியைச் செலுத்திவிடலாம். இதற்காகத் தனியாக TAN (Tax Deduction and Collection Account Number) எடுக்க வேண்டிய அவசியமில்லை.

10. வெளிநாட்டுச் சொத்துக்களைப் பதிவு செய்ய ஒருமுறை வாய்ப்பு

இளம் வல்லுநர்கள், மாணவர்கள், மென்பொருள் ஊழியர்கள் மற்றும் இடம்பெயர்ந்த NRI-கள் தாங்கள் வெளிநாட்டில் வாங்கிய சொத்துக்களைத் தெரியாமல் அறிவிக்கத் தவறியிருந்தால், அவர்களுக்கு ஒருமுறை மட்டும் 6 மாத கால அவகாசம் வழங்கப்படுகிறது. வெளிநாட்டு வருமானம்/சொத்துக்கள் ₹1 கோடி வரை உள்ளவர்களுக்கும்,வருமானத்தை அறிவித்துச் சொத்துக்களைப் பதிவு செய்யாத ₹5 கோடி வரை உள்ளவர்களுக்கும் இந்தச் சலுகை பொருந்தும்.

English summary

The Union Budget 2026-27, presented by Finance Minister Nirmala Sitharaman, is a breath of fresh air for the average Indian taxpayer. Moving away from complex jargon, the government has focused on "Ease of Compliance" and "Direct Relief."