தங்கப் பிரியர்களுக்குத் தங்கமான நியூஸ்! அடுத்த 6 ஆண்டுகளில் 1 சவரன் தங்கம் ஒரு லட்சம் ரூபாய்!

சென்னை: இன்னும் 6 ஆண்டுகளில் ஒரு சவரன் தங்கத்தின் விலை 1 லட்ச ரூபாயை எட்டிவிடும் என்ற தகவல் வெளியாகியுள்ளது.

எங்குப் பார்த்தாலும் அக்ஷய திருதியை விளம்பரங்கள் களைக்கட்டத் தொடங்கி இருக்கிறது. தங்கம் வாங்குங்கள், வைரங்கள் வாங்குங்கள் என்று திரை நட்சத்திரங்கள் ஆளுக்கு ஒரு கடைக்கு முன்னதாக நின்று கொண்டு மக்களை உசுப்பேற்றிக் கொண்டிருக்கிறார்கள்.

தங்கம் எனது இந்தியாவைப் பொறுத்தவரை ஏழைகளின் எட்டாக்கனியாக மாறி இருக்கிறது. முன்பு எல்லாம் மாதத்திற்கு ஒருமுறை விலை ஏறும். இப்போது எல்லாம் நொடிக்கு ஒரு விலை என்ற நிலையை நோக்கி விர்ர்ர்ர்ர் என்று விண்ணை எட்டி வருகின்றது.

இன்றைய கணக்குப்படி ஒரு சவரன் கிட்டத்தட்ட 6,650 என்ற அளவை எட்டி உள்ளது. அதற்குப் பிறகு செய்கூலி, செய்யாத கூலி என்று ஒரு பில் வேறு போடுவார்கள்.

அந்த விலையைப் பார்த்தால் தலையே சுற்றிவிடும். அப்புறம் அதைக் குறைக்க மேனேஜரை பார்க்க வேண்டும். அவர் ஒரு பர்சண்டேஜ் குறைப்பார். அதற்கு அப்புறம் அவருக்கு மேல் உள்ள அதிகாரி அரை பர்சண்டேஜ் குறைப்பார்.

இப்படி, தங்கம் வாங்குவது என்பதே ஏதோ ரேசில் கார் ஓட்டுவதைப் போலச் சாகசமான விசயமாக மாறிப்போய்விட்டது.

நிலைமை இப்படி டாப் கியரில் உயர்ந்து கொண்டிருக்கும் போது, அடுத்து வரப்போகும் 6 ஆண்டுகளில் ஒரு சவரன் தங்கத்தின் விலை ஒரு லட்சம் ரூபாய் அளவுக்கு உயர்ந்துவிடும் என்கிறார் தங்க நகை வியாபாரிகள் சங்கத் தலைவர்.

தங்கத்தின் விலை உயர்வு குறித்து ஜெயந்திலால் சலானி, “தங்கம் விலை உயர்ந்தாலும் விற்பனையில் அதனால் எந்தப் பாதிப்பும் இல்லை. கடந்த ஆண்டுடன் ஒப்பிடுகையில் இந்த ஆண்டு தங்கம் விற்பனையானது 30% கூடுதலாகவே நடந்துள்ளது.

கடந்த அக்ஷய திருதியை அன்று விற்பனையானதைவிட இந்த ஆண்டு இத்தனை சதவீதம் விற்பனை அதிகரித்துள்ளது.

கடந்த அக்ஷய திருதிக்கு ஒரு கிராம் தங்கத்தின் விலை 5605 ரூபாய் இருந்தது. அதே இந்த ஆண்டு ஒரு கிராம் விலையானது 6770 ரூபாய். கிட்டத்தட்ட ஒரு சவரனுக்கு 9 ஆயிரம் ரூபாய் விலை ஏறியுள்ளது.

இப்படிக் கணக்கிட்டுப் பார்த்தால் ஒவ்வொரு ஆண்டு அக்ஷய திருதிக்கு ரூ.6 ஆயிரம் முதல் 9 ஆயிரம் வரை விலையானது கூடிக்கொண்டேதான் செல்கிறது.

அப்படிப் பார்த்தால் வரும் 2030க்குள் ஒரு சவரன் தங்கத்தின் விலையானது ஒரு லட்சம் ரூபாயை மிக எளிதாகத் தொட்டுவிடும் என்பதுதான் கணிப்பு. அதாவது இன்னும் 6 ஆண்டுகளில் இந்த விலை உயர்வை நிச்சயம் எதிர்பார்க்கலாம்.

முதலீட்டாளர்கள், வாடிக்கையாளர்கள் இவர்கள் தங்கத்தில் முதலீடு செய்வதைத் தாண்டி, சில ஆண்டுகளாகச் சீனா போன்ற நாடுகளும் தங்களின் கஜானாவில் தங்கத்தை வாங்கி சேமிக்க ஆரம்பித்துள்ளன. பத்திரங்கள் மூலமும் தங்கமாகவும் இந்த முதலீடு நடைபெறுகிறது.

எனவே தங்கத்தின் மதிப்பு என்பது வரும் ஆண்டுகளில் உயரவே செய்யும். கீழே இறங்க வாய்ப்பே இல்லை.

கடந்த 10 ஆண்டுகளுக்கு முன்பு தங்கத்தின் விலை எப்படி இருந்தது என்று ஆராய்ந்து பார்த்துக் கணக்கிட்டால் நான் சொல்வது உண்மை என்பது விளங்கும்.

2013 அல்லது 2014இல் ஒரு கிராம் தங்கத்தின் விலை வெறும் 1500 ரூபாய்தான் இருந்தது. ஒரு சவரன் 12 ஆயிரம் ரூபாய்தான் இருந்தது. இன்றைக்கு 55 ஆயிரம் ரூபாயைக் கடந்து சென்றுகொண்டே உள்ளது. அப்படி என்றால் இந்த 10 ஆண்டுகளில் தங்கத்தின் விலையானது 4 மடங்கு உயர்ந்துள்ளது.

அதை வைத்து கணித்துத்தான் இன்னும் 6 ஆண்டுகளில் 1 சவரன் 1 லட்சம் ரூபாயைத் தொட்டுவிடும். அது ஒரு பெரிய விசயமே இல்லை. இன்னும் ஆழமாகப் பார்த்துக் கணக்கிட்டால், 2030க்கு முன்பே இந்த 1 லட்சத்தைத் தங்கம் தொட்டு விடும்.

இனிமேல் தங்கம் விலை குறைவதற்கான வாய்ப்பு மிகவும் குறைவு. சொல்லப் போனால் இல்லை என்றுதான் சொல்ல வேண்டும்.

காரணம், உலகப் பொருளாதாரம் மந்தநிலையில் உள்ளது. இந்த நிலை சீராக சில ஆண்டுகள் ஆகும். அது மட்டுமல்லாமல் போர் பாதிப்புகளால் தங்கத்தின் விலையில் ஒரு நீடித்த நிலைத்தன்மை வந்துள்ளது.

ஆகவே, தங்கத்தில் முதலீடு செய்வது என்பது மிகமிக பாதுகாப்பானது. வாடிக்கையாளர்களின் எண்ணிக்கையும் ஆண்டுக்கு ஆண்டு கூடிக்கொண்டுதான் போகிறது. இந்தக் கணிப்புகள் வீழ்ச்சிக்கான அறிகுறிகள் அல்ல. வளர்ச்சிக்கான அறிகுறிகள்தான்” என்கிறார்

English summary

Says Jayantilal Challani, the average price of one Savaran gold is rising by Rs 9,000 per year