சிபிஎஸ்இ 9 வகுப்புக்கு மும்மொழி கட்டாயம்.. பாடத்திட்டத்தில் என்ன மாற்றம் இருக்கும்? முழு விளக்கம்
சென்னை: மத்திய இடைநிலைக் கல்வி வாரியமான சிபிஎஸ்இ பாடத்திட்டத்தில் பயிலும் 9 ஆம் வகுப்பு மாணவர்களுக்கு மும்மொழிப் பாடத்திட்டம் கட்டாயமாக்கப்பட்டுள்ளது. நடப்பு கல்வியாண்டு முதல் இந்த மும்மொழித் திட்டம் அமல்படுத்தப்பட்டுள்ளது. இரண்டு இந்திய மொழிகளை மாணவர்கள் தேர்வு செய்ய வேண்டும். வெளிநாட்டு மொழியை மூன்றாவது மொழியாக தேர்வு செய்யலாம். சிபிஎஸ்இ மும்மொழிக் கல்வித் திட்டத்தின் கீழ் 9 ஆம் வகுப்பு மாணவர்களுக்கு என்ன மாற்றங்கள் இருக்கும் என்பது பற்றியும், மும்மொழி குறித்த விவரங்களையும் விரிவாக பார்க்கலாம்.
தேசிய கல்விக் கொள்கை 2020-ன் (NEP 2020) படி, மாணவர்கள் மூன்று மொழிகளை கற்க வேண்டும் என்று பரிந்துரைக்கப்படுகிறது. இதில் குறைந்தபட்சம் இரண்டு மொழிகள் இந்திய மொழிகளாக இருக்க வேண்டும் என்பதும் குறிப்பிடப்பட்டுள்ளது. இந்த மும்மொழிக் கொள்கை அரசு மற்றும் தனியார் பள்ளிகள் இரண்டிற்கும் பொருந்தும்.
அதே நேரத்தில், எந்த மொழிகளை தேர்வு செய்வது என்பது தொடர்பாக மாநிலங்களுக்கு சுதந்திரம் வழங்கப்பட்டுள்ளது. எந்த ஒரு மொழியும் கட்டாயமாக திணிக்கப்படாது என்றும் கல்விக் கொள்கையில் தெரிவிக்கப்பட்டுள்ளது.
மும்மொழிக் கொள்கையின் வரலாறு
மும்மொழிக் கொள்கை முதன்முதலில் 1964-66 காலகட்டத்தில் செயல்பட்ட கல்விக் குழுவான கோத்தாரி ஆணையத்தால் பரிந்துரைக்கப்பட்டது. பின்னர், முன்னாள் பிரதமர் இந்திரா காந்தி தலைமையிலான அரசின் போது, 1968-ம் ஆண்டின் தேசிய கல்விக் கொள்கையில் (NPE 1968) இது அதிகாரப்பூர்வமாக ஏற்கப்பட்டது.
அதனைத் தொடர்ந்து, முன்னாள் பிரதமர் ராஜீவ் காந்தி தலைமையிலான அரசின் போது 1986-ம் ஆண்டின் தேசிய கல்விக் கொள்கையில் மீண்டும் உறுதிப்படுத்தப்பட்டது. பின்னர், பி.வி. நரசிம்ம ராவ் தலைமையிலான காங்கிரஸ் அரசால் 1992-ல் திருத்தங்கள் செய்யப்பட்டன. மொழிப் பன்முகத்தன்மையும் தேசிய ஒருமைப்பாட்டையும் ஊக்குவிக்கும் நோக்கில் இந்த மும்மொழிக் கொள்கை தொடர்ந்து முன்னெடுக்கப்பட்டு வருகிறது.
தேசிய கல்விக் கொள்கை கூறியது என்ன?
தேசிய கல்விக் கொள்கை 2020 (NEP 2020), பள்ளிக் கல்வி நிலையிலிருந்தே பன்மொழித் திறனை ஊக்குவிக்கும் வகையில் மும்மொழிக் கொள்கையை விரைவாக அமல்படுத்த வேண்டும் என்று பரிந்துரைக்கிறது. மேலும், "அரசியலமைப்பு விதிகள், மக்களின் விருப்பங்கள், மாநிலங்களின் தேவைகள் மற்றும் மத்திய அரசின் நோக்கங்களை கருத்தில் கொண்டு, பன்மொழித் திறனையும் தேசிய ஒருமைப்பாட்டையும் மேம்படுத்தும் வகையில் மும்மொழிக் கொள்கை தொடர்ந்து நடைமுறைப்படுத்தப்படும்" என்று கல்விக் கொள்கை ஆவணத்தில் குறிப்பிடப்பட்டுள்ளது.
அதே நேரத்தில், மும்மொழிக் கொள்கையில் அதிக நெகிழ்வுத்தன்மையும் வழங்கப்பட்டுள்ளதாக NEP 2020 தெரிவிக்கிறது. எந்த ஒரு மொழியும் எந்த மாநிலத்திற்கும் கட்டாயமாக திணிக்கப்படாது என்றும் அதில் வலியுறுத்தப்பட்டுள்ளது. மாணவர்கள் கற்கும் மூன்று மொழிகளையும் மாநிலங்கள், பிராந்தியங்கள் மற்றும் மாணவர்கள் தாங்களே தேர்வு செய்யலாம். ஆனால், அந்த மூன்று மொழிகளில் குறைந்தபட்சம் இரண்டு மொழிகள் இந்திய மொழிகளாக இருக்க வேண்டும் என்பதும் கல்விக் கொள்கையில் குறிப்பிடப்பட்டுள்ளது.
வெளிநாட்டு மொழிகள் குறித்து என்ன கூறுகிறது?
தேசிய கல்விக் கொள்கை 2020-ன் படி, இந்திய மொழிகள் மற்றும் ஆங்கிலத்துடன் சேர்த்து, மேல்நிலை வகுப்புகளில் மாணவர்கள் கொரியன், ஜப்பானியம், பிரெஞ்சு, ஜெர்மன், ஸ்பானிஷ் உள்ளிட்ட வெளிநாட்டு மொழிகளையும் கற்கலாம். ஆனால், புதிய பாடத்திட்ட மாற்றத்தில் ஆங்கிலம் ஒரு வெளிநாட்டு மொழியாக வகைப்படுத்தப்பட்டுள்ளது.
மேலும், மும்மொழிக் கட்டமைப்பில் ஒரு வெளிநாட்டு மொழிக்கு மட்டுமே அனுமதி வழங்கப்படும் என கூறப்பட்டுள்ளது. இதனால், மாணவர்கள் ஆங்கிலத்துடன் மேலும் ஒரு வெளிநாட்டு மொழியை இரண்டாம் மற்றும் மூன்றாம் மொழிகளாக தேர்வு செய்வதில் சிக்கல் ஏற்படலாம் என கூறப்படுகிறது.
பாடப்புத்தகங்கள் தயாராக உள்ளனவா?
மும்மொழிக் கொள்கைக்கான பாடப்புத்தகங்கள் தயாராகும் வரை, 9-ம் வகுப்பு மாணவர்கள் தேர்வு செய்யும் மொழிக்கான 6-ம் வகுப்பு R3 பாடப்புத்தகங்களின் 2026-27 பதிப்பை பயன்படுத்தலாம் என்று கல்வி வாரியம் தெரிவித்துள்ளது. மேலும், இந்திய மொழிகளை கற்பிக்க தகுதியான ஆசிரியர்கள் பற்றாக்குறை உள்ள பள்ளிகளில், இடைக்கால ஏற்பாடாக அந்த மொழியில் அடிப்படை அறிவு கொண்ட பிற பாட ஆசிரியர்களை பயன்படுத்தலாம் என்றும் வாரியம் கூறியுள்ளது.
மும்மொழிக் கொள்கை சர்ச்சை என்ன?
மும்மொழிக் கொள்கை தென் மாநிலங்களில், குறிப்பாக தமிழகத்தில், மாநில அரசுக்கும் மத்திய அரசுக்கும் இடையிலான முக்கிய அரசியல் விவாதமாக இருந்து வருகிறது. தமிழ்நாடு மும்மொழிக் கொள்கைக்கு நீண்ட காலமாக எதிர்ப்பு தெரிவித்து வந்துள்ளது. 1937-ம் ஆண்டு, அன்றைய மதராஸ் மாகாண அரசை தலைமையேற்ற சி. ராஜகோபாலாச்சாரி பள்ளிகளில் கட்டாய இந்தி கற்பித்தலை அறிமுகப்படுத்தினார்.
இதற்கு எதிராக நீதிக்கட்சி மற்றும் பெரியார் உள்ளிட்ட திராவிட இயக்கத் தலைவர்கள் கடும் போராட்டங்களை நடத்தினர். இதையடுத்து அந்த கொள்கை 1940-ல் திரும்பப் பெறப்பட்டது. இருந்தபோதிலும், இந்தி எதிர்ப்பு உணர்வு தொடர்ந்து நீடித்தது. 1968-ல் மும்மொழிக் கொள்கை அறிமுகப்படுத்தப்பட்டபோது, அதை இந்தி திணிப்பு முயற்சியாக தமிழ்நாடு எதிர்த்தது.
மும்மொழி கொள்கை அமல்படுத்தாத மாநிலம்
அப்போது முதலமைச்சராக இருந்த சி.என். அண்ணாதுரை தலைமையில், தமிழ்நாடு தமிழ் மற்றும் ஆங்கிலம் மட்டும் கற்பிக்கும் இருமொழிக் கொள்கையை நடைமுறைப்படுத்தியது. இந்தி உள்ளிட்ட பிற இந்திய மொழிகளுக்கு பதிலாக ஆங்கிலத்துக்கு முக்கியத்துவம் அளித்து, மும்மொழிக் கொள்கையை இதுவரை அமல்படுத்தாத ஒரே மாநிலமாக தமிழ்நாடு தொடர்ந்து இருந்து வருகிறது.
Click it and Unblock the Notifications
Sign in with Google