உயர் நீதிமன்ற உத்தரவால் கிடைத்த உரிமை....போலந்து புறப்பட்டுச் சென்றார் மாற்றுத்திறனாளி வீராங்கனை

சென்னை: போலந்துக்கு விளையாட்டுப் போட்டிக்கு அனுப்ப உயர்நீதிமன்றம் உத்தரவிட்டதையடுத்து மாற்றுத்திறனாளி வீராங்கனை சமீஹா பர்வீன் போலந்துச் செல்ல தனது தாயாருடன் டெல்லி புறப்பட்டுச் சென்றார்.

கன்னியாகுமரி மாவட்டம் கடையாலுமூடு பகுதியைச் சேர்ந்தவர் முஜீப் சலாமத் தம்பதியின் மகள் சமீஹா பர்வீன். இவர் தனது சிறு வயதில் ஏற்பட்ட காய்ச்சல் காரணமாக தனது செவித் திறனை இழந்தார். இவருக்கு விளையாட்டில் இருந்த ஆர்வத்தை கண்டுபிடித்த அவரது பெற்றோர் பல்வேறு தடகளப் போட்டிகளில் அவருக்கு பயிற்சி அளித்தனர்.

இதையடுத்து தேசிய அளவிலான காது கேளாதோருக்கான தடகள போட்டியில் மூன்று முறை தங்கப் பதக்கங்களை வென்றார். இந்த நிலையில் வரும் 22 ஆம் தேதி போலந்தில் சர்வதேச அளவிலான தடகள போட்டி நடைபெறுகிறது. இதற்காக இந்தியாவிலிருந்து கலந்து கொள்ளும் விளையாட்டு வீரர்களுக்கான தகுதி போட்டி டெல்லியில் நடைபெற்றது.

இந்த மாணவியை டெல்லிக்கு அழைத்துச் செல்லக் கூட இந்திய விளையாட்டு மேம்பாட்டு ஆணையம் முன்வராத நிலையில் திருச்சியைச் சேர்ந்த மற்றொரு மாணவருடன் இவருடைய பெற்றோர் தங்களுடைய ஏழ்மை நிலையை கருத்தில் கொண்டு அனுப்பி வைத்தனர். அந்த போட்டியில் கலந்து கொண்டு விளையாட்டு கழகம் நிர்ணயித்த 4.2 மீட்டர் நீளத்தை விட5 மீட்டர் தாண்டி சாதனை புரிந்தார்.

இதைத் தொடர்ந்து நடைபெற்ற விளையாட்டுப் போட்டியில் பங்கேற்பார் என மகிழ்ச்சி அடைந்த போது இந்திய விளையாட்டு ஆணையமோ " தனியாக ஒரு பெண்ணை அனுப்ப முடியாது" என காரணம் காட்டி இவரை அந்த போட்டியில் கலந்து கொள்ள நடவடிக்கை மேற்கொள்ளாமல் புறக்கணித்தது.

இந்த போட்டியில் கலந்து கொள்ள நடவடிக்கை எடுக்க வேண்டும் என ஒன்றிய அரசை பலமுறை வலியுறுத்தியும் உரிய தீர்வு கிடைக்காததால் இந்த மாணவியின் சார்பில் சென்னை உயர்நீதிமன்றத்தில் வழக்கு தொடரப்பட்டது. இந்த வழக்கை அவசர வழக்காக விசாரித்த நீதிபதி மகாதேவன், தடகள போட்டியில் பங்கேற்க நடவடிக்கை எடுக்க ஒன்றிய அரசுக்கு உத்தரவிட்டார்.

இதையடுத்து அவரது சொந்த கிராமமான கடையாலுமூட்டில் மக்கள் இனிப்பு வழங்கி கொண்டாடினர். நீதிமன்ற உத்தரவை சமர்ப்பிப்பதற்காக சமீஹா பர்வீன் தனது தாயார் சலாமத்துடன் நேற்று டெல்லி புறப்பட்டுச் சென்றார். ஒருவாரம் டெல்லியில் பயிற்சி மற்றும் முன்னேற்பாடுகளை மேற்கொண்ட பின்னர் தடகளப் போட்டியில் பங்கேற்பதற்காக அவர் போலந்து செல்கிறார்.

English summary

PWD Athelete Samiha Parveen should be allowed to participate in Poland games, Chennai HC orders.