பழங்குடியின ஜாதி சான்றிதழ்! நீதிமன்ற அவமதிப்பு வழக்கில் திருப்பத்தூர் ஆட்சியர் ஆஜராக ஐகோர்ட் உத்தரவு

Updated: Saturday, July 27, 2024, 16:01 [IST]

Subscribe to Oneindia Tamil

சென்னை: பழங்குடியின சாதி சான்றிதழ் வழங்க கோரியது தொடர்பான நீதிமன்ற அவமதிப்பு வழக்கில் திருப்பத்தூர் மாவட்ட ஆட்சியர் வரும் ஆகஸ்ட் 22-ம் தேதி நேரில் ஆஜராக சென்னை உயர் நீதிமன்றம் உத்தரவிட்டுள்ளது.

திருப்பத்தூர் மாவட்டத்தை சேர்ந்த உமா என்பவர் பழங்குடியின பெண், தனக்கும், தனது 3 குழந்தைகளுக்கும் குருமன்ஸ் பழங்குடியின சாதி சான்றிதழ் வழங்க கோரி மாவட்ட ஆட்சியருக்கு விண்ணப்பித்துள்ளார்.

அந்த விண்ணப்பத்துடன், தான் குருமன்ஸ் இனத்தை சார்ந்தவர் என்பதற்கான ஆவணமாக அவரின் சகோதரர் மாதவன் நீதிமன்ற உத்தரவின் மூலம் பெற்ற சாதி சான்று நகலையும் இணைத்திருந்தார்.

இந்நிலையில் இந்த விண்ணப்பமானது மாவட்ட ஆட்சியரால் கடந்த 2019 ம் ஆண்டு நிராகரிக்கப்பட்டுள்ளது.

இதை எதிர்த்து 2021 ம் ஆண்டு தொடர்ந்த வழக்கில், மாவட்ட ஆட்சியரை அணுகி, சாதி சான்று கோரி மேல் முறையீடு செய்யலாம் என்றும் அதில் 6 மாதத்தில் அவர் முடிவெடுப்பார் என அறிவுறுத்தல்களை வழங்கி வழக்கு மனுக்கள் தள்ளுபடி செய்யப்பட்டது.

இந்த உத்தரவை எதிர்த்து கடந்த 2022 ஆண்டு சாதி சான்று அளிக்க உத்தரவிடக் கோரி மேல்முறையீடு வழக்கு தாக்கல் செய்தார். அதில் மனுதாரர் தாக்கல் செய்த ஆவணங்கள் அடிப்படையில் முடிவெடுக்க உத்தரவிட்டு வழக்கை முடித்து வைத்தனர்.

நீதிமன்ற உத்தரவை தொடர்ந்து நிறைவேற்றாமல் இருப்பதால் தனக்கு இதுவரை சாதி சான்றிதழ் வழங்கப்படவில்லை எனக் கூறி உமா சென்னை உயர் நீதிமன்றத்தில் நீதிமன்ற அவமதிப்பு வழக்கு தொடர்ந்திருந்தார்.

இந்த வழக்கை விசாரித்த நீதிபதிகள் ஆர். சுப்பிரமணியன், குமரேஷ்பாபு அடங்கிய அமர்வானது, திருப்பூர் மாவட்ட ஆட்சியர் வரும் ஆகஸ்ட் 22 ம் தேதி நேரில் ஆஜராகி விளக்கமளிக்க உத்தரவிட்டு, வழக்கின் விசாரணையை ஒத்திவைத்தனர்.