வேற லெவலில் மாறும் மெரினா பீச்! 4 கடற்கரைகளுக்கு நீலக்கொடி சான்றிதழ் பெற.. பணிகளை மேற்கொள்ள அனுமதி!

சென்னை: சென்னை மெரினா கடற்கரை உள்ளிட்ட தமிழகத்தின் 4 கடற்கரைகளுக்கு நீலக்கொடி சான்றிதழ் பெறுவதற்கான உட்டகட்டமைப்பு பணிகளை மேற்கொள்ள தமிழ்நாடு கடலோர ஒழுங்குமுறை ஆணையம் அனுமதி அளித்துள்ளது.

டென்மாா்க் நாட்டின் சுற்றுச்சூழல் கல்வி அறக்கட்டளை, உலகம் முழுவதும் கடற்கரைகளை ஆய்வு செய்து அதற்கு நீலக்கொடி கடற்கரை தகுதியை வழங்கி வருகிறது. நீலக்கொடி சான்றிதழ் என்பது தூய்மை, சுத்தமான மனல், சுற்றுச்சூழல் மேலாண்மை பாதுகாப்பு மற்றும் கடற்கரையின் நிலை உள்ளிட்ட சர்வதேச தரங்களைப் பூர்த்தி செய்யும் கடற்கரைகளுக்கு மட்டுமே வழங்கப்படும்.

அந்த வகையில், இந்தியாவில் 8 கடற்கரைகளுக்கு நீலக்கொடி சான்றிதழ் இதுவரை வழங்கப்பட்டுள்ளது. தமிழகத்தில் ஏற்கெனவே செங்கல்பட்டில் உள்ள கோவளம் கடற்கரைக்கு நீலக்கொடி சான்றிதழ் வழங்கப்பட்டுள்ளது. அதனைத் தொடர்ந்து பல்வேறு கடற்கரைகளுக்கு இந்த நீலக்கொடி சான்றிதழ் வாங்க தமிழக அரசு நடவடிக்கை எடுத்து வருகிறது.

ஆறு கடற்கரைகள் நீலக்கொடி சான்றிதழ் பெறுவதற்கு நடவடிக்கை எடுக்கப்படும் என தமிழ்நாடு பட்ஜெட்டில் அறிவிக்கப்பட்டது. அந்த வகையில், சென்னை மெரினா உள்ளிட்ட தமிழகத்தின் 4 கடற்கரைகளில் 18 கோடி செலவில் நீலக்கொடி சான்றிதழ் பெறுவதற்கான உட்டகட்டமைப்பு பணிகளை மேற்கொள்ள தமிழ்நாடு கடலோர ஒழுங்குமுறை ஆணையம் அனுமதி அளித்துள்ளது.

ரூபாய் 6 கோடியில் மெரினா கடற்கரை, 4 கோடியில் கடலூர் சில்வர் கடற்கரை, 4 கோடியில் நாகை காமேஸ்வரம் கடற்கரை, 4 கோடியில் ராமநாதபுரம் அரியமான் கடற்கரை ஆகிய 4 கடற்கரையில் இந்தப் பணிகளை மேற்கொள்ள அனுமதி வழங்கப்பட்டுள்ளது.

இதன் மூலம் கடற்கரையை சுற்றியுள்ள பகுதிகள் பொதுமக்கள் எளிதில் அணுகும் வகையிலும் பாதுகாப்புடனும் சுற்றுச்சூழலுக்கு ஏற்ற வகையிலும் அமைக்கப்படும். மேலும், கடற்கரையில் நடைபாதை, மிதிவண்டி தடங்கள், விளையாட்டு பகுதி, படகுத் துறை, கண்காணிப்பு கோபுரம், பாரம்பரியத் தாவரங்கள் குறித்த ஆய்வு போன்ற திட்டங்களும் செயல்படுத்தப்பட உள்ளது. மேலும் கடற்கரை கண்காணிப்பு குழுவும் அமைக்கப்படும்.

இந்த பணிகள் முடிந்த பின்னர், கடற்கரையை ஆய்வு செய்து டென்மார்க்கைச் சேர்ந்த சுற்றுச்சூழல் கல்வி அறக்கட்டளை நிறுவனம் இந்த கடற்கரைகளுக்கு நீலக்கொடி சான்றிதழ் வழங்கும் என்று எதிர்பார்க்கப்படுகிறது.

English summary

The Tamil Nadu Coastal Regulatory Authority has granted permission to carry out infrastructure work to obtain Blue Flag certification for 4 beaches in Tamil Nadu, including Chennai Marina Beach.