சோனியா காந்திக்கு முதலமைச்சர் ஸ்டாலின் கொடுக்கும் மதிய விருந்து! சென்னையில் குவியும் காங்கிரஸார்!
சென்னை: திமுக மகளிர் உரிமை மாநாட்டில் கலந்துகொள்வதற்காக சென்னைக்கு வருகை தரும் சோனியா காந்திக்கு முதலமைச்சர் ஸ்டாலின் நாளை மதிய விருந்து கொடுக்கிறார்.
இந்த விருந்தில் இந்தியா கூட்டணி கட்சிகளை சேர்ந்த பெண் தலைவர்களும் பங்கேற்பார்கள் எனத் தெரிகிறது. இதனிடையே நாளை காலை சென்னை கிண்டியில் உள்ள நட்சத்திர விடுதியில் வைத்து தமிழக காங்கிரஸ் நிர்வாகிகளை சோனியா சந்திக்கவுள்ளதால் காங்கிரஸார் சென்னையில் குவிந்து வருகின்றனர்.
டெல்லி டூ சென்னை: ஒன் இந்திய தமிழ் ஏற்கனவே கூறியிருந்ததை போல் நீண்ட நாட்களுக்கு பிறகு சென்னை வரும் சோனியா காந்தியை வரவேற்க தமிழக காங்கிரஸ் கமிட்டி சார்பில் எழுச்சிமிகு ஏற்பாடுகள் செய்யப்பட்டுள்ளன. டெல்லி இல்லத்திலிருந்து இன்று மாலை 6.45 மணிக்கு புறப்படும் சோனியா காந்தி இரவு 7.25 மணிக்கு டெல்லி இந்திராகாந்தி சர்வதேச விமான நிலையத்தை சென்றடைகிறார்.
இரவு சென்னை வருகிறார்: அங்கிருந்து இரவு 7.55 மணிக்கு விஸ்டாரா விமானம் மூலம் சென்னை புறப்படும் சோனியா காந்தி இரவு 10.50 மணிக்கு சென்னை விமான நிலையம் வந்தடைகிறார். விமான நிலையத்தில் கே.எஸ்.அழகிரி தலைமையில் காங்கிரஸார் அளிக்கும் வரவேற்பை ஏற்றுக்கொண்டு சென்னை கிண்டியில் உள்ள நட்சத்திர விடுதிக்கு ஓய்வெடுக்கச் செல்கிறார்.
காங். நிர்வாகிகளுடன் சந்திப்பு: அதன் பின்னர் நாளை காலை தமிழக காங்கிரஸ் கமிட்டி நிர்வாகிகளை சந்தித்துப் பேசும் சோனியா காந்தி, தமிழக அரசியல் நிலவரம், நாடாளுமன்றத் தேர்தலை எதிர்கொள்வது என்பன உள்ளிட்ட விவகாரங்கள் பற்றி சில நிமிடங்கள் பேசுவார் எனத் தெரிவிக்கப்படுகிறது. அதைத் தொடர்ந்து முதலமைச்சர் ஸ்டாலின் அளிக்கும் மதிய விருந்தில் பங்கேற்கிறார். சோனியா காந்தியுடன் அவரது மகள் பிரியங்கா காந்தியும் அனைத்து நிகழ்வுகளிலும் பங்கேற்கிறார்.
முதல்வர் மதிய விருந்து: முதலமைச்சர் ஸ்டாலின் கொடுக்கும் மதிய விருந்து நிகழ்ச்சி அவரது சித்தரஞ்சன் சாலை இல்லத்தில் நடைபெறுகிறதா அல்லது நட்சத்திர விடுதியில் நடைபெறுகிறதா என்ற விவரம் மட்டும் இன்னும் வெளியாகவில்லை. ஸ்ரீபெரும்புதூரில் உள்ள தனது தந்தை ராஜீவ்காந்தி நினைவிடத்துக்கு ப்ரியங்கா காந்தி செல்லக்கூடும் என எதிர்பார்க்கப்படுவதால் அதற்கான பாதுகாப்பு ஏற்பாடுகளையும் காவல்துறை தயார் நிலையில் வைத்துள்ளது.
Click it and Unblock the Notifications
Sign in with Google