Nallakannu: நல்லகண்ணு உடல்நிலையில் பின்னடைவு! ராஜீவ் காந்தி மருத்துவமனைக்கு விரைந்த ஸ்டாலின்

சென்னை: இந்திய கம்யூனிஸ்ட் கட்சியின் மூத்த தலைவர் நல்லகண்ணு உடல்நிலையில் பின்னடைவு ஏற்பட்டுள்ளதாக தகவல்கள் வெளியான நிலையில் சென்னை ராஜீவ் காந்தி மருத்துவமனைக்கு முதல்வர் ஸ்டாலின் விரைந்துள்ளார்.

நல்லகண்ணு வயது மூப்பின் காரணமாக வீட்டில் ஓய்வு எடுத்து வந்தார். கடந்த ஆகஸ்ட் மாதம் 22 ஆம் தேதி திடீரென வீட்டில் தவறி விழுந்ததில் காயமடைந்தார். இதையடுத்து அவர் சென்னை ராஜீவ் காந்தி அரசு மருத்துவமனையில் அனுமதிக்கப்பட்டார்.

அங்கு அவருக்கு தீவிர சிகிச்சை அளிக்கப்பட்டது. பின்னர் அவர் வீடு திரும்பினார். இந்த நிலையில் கடந்த ஆண்டு டிசம்பர் 25 ஆம் தேதி மீண்டும் அவருக்கு மூச்சுத் திணறல் ஏற்பட்டது.

இதையடுத்து மருத்துவமனையில் அனுமதிக்கப்பட்ட அவர் பின்னர் சிகிச்சை முடிந்து கடந்த மாதம் 8ஆம்தேதி குணமடைந்து வீடு திரும்பினார். தொடர்ந்து வீட்டில் ஓய்வு எடுத்து வந்த நல்லகண்ணுவுக்கு கடந்த 1 ஆம் தேதி மூச்சுத்திணறல் ஏற்பட்டதையடுத்து அவர் உடனடியாக ராஜீவ்காந்தி அரசு பொது மருத்துவமனையில் தீவிர சிகிச்சை பிரிவில் அனுமதிக்கப்பட்டுள்ளார்.

அங்கு அவருக்கு கடந்த 20 நாட்களுக்கும் மேலாக சிகிச்சை அளிக்கப்பட்டு வந்த நிலையில் நேற்று முதல் அவரது உடல்நிலை பெரும் பின்னடைவை சந்தித்துள்ளதாக சொல்லப்படுகிறது.

வயது மூப்பு காரணமாக கடந்த 7 மாதங்களாகவே அவ்வப்போது ராஜீவ் காந்தி அரசு மருத்துவமனையில் நல்லகண்ணு அனுமதிக்கப்பட்டு சிகிச்சைக்கு பிறகு வீட்டுக்கு அனுப்பப்பட்டு ஓய்வு எடுத்து வந்தார்.

இந்த நிலையில் அவரது உடல்நிலையில் பின்னடைவு ஏற்பட்டுள்ளதால் ராஜீவ் காந்தி மருத்துவமனையில் வீரபாண்டியன், முத்தரசன் உள்ளிட்ட இந்திய கம்யூனிஸ்ட் கட்சியின் மூத்த தலைவர்கள் வந்த வண்ணம் உள்ளனர்.

அது போல் முதல்வர் ஸ்டாலினும், ராஜீவ் காந்தி அரசு மருத்துவமனைக்கு விரைந்துள்ளார். இதனால் மருத்துவமனையில் பரபரப்பு எழுந்துள்ளது.

English summary

Communist Party of India (CPI) leader Nallakannu’s health has deteriorated, Tamil Nadu Chief Minister M.K. Stalin rushed to Chennai’s Rajiv Gandhi Government General Hospital. The development has drawn attention from political leaders and supporters across the state.