இதான் அரசியல் விஜய்.. ஆட்டத்தை ஆரம்பித்த டெல்லி.. ஒரே நாளில் 3 சம்பவங்கள்.. மாட்டுனா மட்டன்தான்!
சென்னை: தமிழக சட்டமன்றத் தேர்தல் முடிவுகள் வெளியாகி இரண்டு நாட்கள் கடந்த நிலையிலும், புதிய அரசு அமைவதில் நீடித்து வரும் முட்டுக்கட்டை தமிழக அரசியலில் பெரும் பரபரப்பை ஏற்படுத்தியுள்ளது. தமிழக வெற்றிக் கழகம் (TVK) 108 இடங்களைப் பிடித்து தனிப்பெரும் கட்சியாக உருவெடுத்தாலும், ஆட்சி அமைக்கத் தேவையான 118 என்ற மேஜிக் எண்ணை எட்ட முடியாத சூழல் நிலவுகிறது. இந்த இக்கட்டான தருணத்தில், டெல்லியின் நேரடி மற்றும் மறைமுகத் தலையீடுகள் விஜய்க்குப் பெரும் சவாலாக மாறியுள்ளன.
ஒரே நாளில் நடந்துள்ள 3 முக்கிய சம்பவங்கள் இதோ:
1. ஆளுநர் மாளிகையின் 'மெஜாரிட்டி' முட்டுக்கட்டை
தனிப்பெரும் கட்சி என்ற அடிப்படையில் ஆட்சி அமைக்க உரிமை கோர நேற்று ஆளுநர் மாளிகைக்குச் சென்றார் தவெக தலைவர் விஜய். காங்கிரஸின் 5 எம்.எல்.ஏ-க்களின் ஆதரவையும் சேர்த்து மொத்தம் 112 உறுப்பினர்களின் ஆதரவுக் கடிதத்தை அவர் ஆளுநர் ஆர்லேகரிடம் சமர்ப்பித்தார்.
இருப்பினும், ஆளுநர் தரப்பு இதற்கு உடனே பச்சைக்கொடி காட்டவில்லை. 234 இடங்களைக் கொண்ட தமிழகச் சட்டமன்றத்தில் 118 ஆதரவு இருந்தால் மட்டுமே ஆட்சி அமைக்க அழைக்க முடியும் என்பதில் ஆளுநர் உறுதியாக இருப்பதாகக் கூறப்படுகிறது. விஜய் இரண்டு தொகுதிகளில் வெற்றி பெற்றதால், சட்டப்படி ஒரு தொகுதியை அவர் துறக்கும்போது தவெகவின் பலம் 107 ஆகக் குறைகிறது. "போதிய பெரும்பான்மை இல்லாமல் யாரையும் ஆட்சி அமைக்க அழைக்க முடியாது" என ஆளுநர் ஆர்லேகர் சட்ட வல்லுநர்களுடன் ஆலோசனை நடத்தி வருவது, விஜய்க்கு டெல்லி கொடுக்கும் முதல் நெருக்கடியாகப் பார்க்கப்படுகிறது. ஏனென்றால் பெரும்பான்மை இல்லையென்றாலும் தனிப்பெரும் கட்சியை ஆட்சி அமைக்க வைத்து.. பெரும்பான்மையை நிரூபிக்க சொல்ல வேண்டும்.
2. 'பிஎம் ஸ்ரீ' (PM SHRI) பள்ளிகள்: மீண்டும் மும்மொழிக் கொள்கை போர்
ஆட்சி அமைப்பதில் சிக்கல் நீடிக்கும் வேளையில், மத்திய அரசு தமிழகத் தலைமைச் செயலாளருக்கு அனுப்பியுள்ள கடிதம் அடுத்த அதிர்ச்சியை ஏற்படுத்தியுள்ளது. தேசிய கல்விக் கொள்கையின் கீழ் 'பிஎம் ஸ்ரீ' மாதிரிப் பள்ளிகள் திட்டத்தைச் செயல்படுத்த உடனடியாகப் புரிந்துணர்வு ஒப்பந்தத்தில் (MoU) கையெழுத்திடுமாறு மத்தியக் கல்வி அமைச்சகம் வலியுறுத்தியுள்ளது.
கடந்த திமுக அரசு, மும்மொழிக் கொள்கையை (ஹிந்தி திணிப்பு) எதிர்த்து இந்தத் திட்டத்தைப் புறக்கணித்தது. இதனால் மத்திய அரசு வழங்க வேண்டிய 'சமக்ர சிக்சா' நிதி முடக்கப்பட்டது. இப்போது ஆட்சி மாற்றம் ஏற்படும் சூழலில், "நிதியைப் பெற வேண்டுமென்றால் மும்மொழிக் கொள்கையை ஏற்றாக வேண்டும்" என்ற அழுத்தத்தை டெல்லி மீண்டும் பிரயோகித்துள்ளது. தமிழ் மொழி உரிமைகளுக்காகப் போராடுவோம் என்று முழங்கிய விஜய், பதவி ஏற்பதற்கு முன்பே மொழிப்போர் மற்றும் நிதி நெருக்கடி ஆகிய இரண்டு முனைத் தாக்குதல்களைச் சந்திக்க வேண்டிய நிலைக்குத் தள்ளப்பட்டுள்ளார்.
3. வருமான வரி ஏய்ப்பு வழக்கு: நீதிமன்றத்தின் அதிரடி உத்தரவு
விஜய்க்கு எதிரான மூன்றாவது மற்றும் மிக முக்கியமான நெருக்கடி நீதித்துறையிலிருந்து வந்துள்ளது. விஜய்க்கு எதிரான வருமான வரி ஏய்ப்பு மற்றும் சொத்து விவரங்களை மறைத்ததாகத் தொடரப்பட்ட மனுவை விசாரணைக்கு எடுத்துக்கொள்ள சென்னை உயர்நீதிமன்றம் நேற்று உத்தரவிட்டுள்ளது.
எம். ராஜ்குமார் என்பவர் தாக்கல் செய்துள்ள இந்த மனுவில்:
விஜய் தனது தேர்தல் பிரமாணப் பத்திரத்தில் வருமானத்தை மறைத்துள்ளார்.
அவர் மீது ஐபிசி (IPC) பிரிவுகளின் கீழ் மோசடி வழக்குப்பதிவு செய்ய வேண்டும்.
அமலாக்கத்துறை (ED) மூலம் பணமோசடி தடுப்புச் சட்டத்தின் (PMLA) கீழ் விசாரணை நடத்த வேண்டும்.
நீதிமன்றத்தின் இந்த உத்தரவு, விஜய் முதலமைச்சராகப் பதவியேற்கும் முன்பே அவருக்குச் சட்ட ரீதியான முட்டுக்கட்டைகளைப் போடும் முயற்சியாகக் கருதப்படுகிறது. குறிப்பாக, அமலாக்கத்துறை மற்றும் வருமான வரித்துறை மூலம் டெல்லி விஜய்யை தனது கட்டுப்பாட்டுக்குள் கொண்டு வர முயல்வதையே இந்த அடுத்தடுத்த சம்பவங்கள் காட்டுகின்றன.
ஆளுநரின் இழுபறி, மும்மொழிக் கொள்கை திணிப்பு, வருமான வரி வழக்கு என மூன்று திசைகளில் இருந்தும் விஜய்க்கு நெருக்கடி முற்றியுள்ளது. இந்த "டெல்லி ஆட்டத்தை" விஜய் தனது ராஜதந்திரத்தால் எப்படி முறியடிக்கப் போகிறார் என்பதைப் பொறுத்தே தமிழகத்தின் அடுத்தகட்ட அரசியல் அமையும்.
Click it and Unblock the Notifications
Sign in with Google