'மிடாஸ்' விவேக் மாமனார் கட்டை பாஸ்கரிடம் கிடுக்குப்பிடி விசாரணை- செம்மரக் கடத்தலில் உருளும் தலைகள்?

சென்னை: செம்மரக் கட்டைகள் கடத்தல் வழக்கில் வருவாய் புலனாய்வுத்துறையினரால் கைது செய்யப்பட்டுள்ள கட்டை பாஸ்கரிடம் துருவி துருவி விசாரணை நடைபெற்று வருகிறது. இதனையடுத்து செம்மரக் கடத்தலில் மேலும் பலர் கைது செய்யப்படக் கூடும் எனவும் கூறப்படுகிறது.

கட்டை பாஸ்கர்.. தமிழகம்- ஆந்திரா போலீசாரின் தேடுதல் வேட்டையில் பிரதான நபர். செம்மரக் கடத்தலின் காட்பாதராக இருப்பவர் கட்டை பாஸ்கர். இவரது மகளைத்தான் சசிகலாவின் உறவினரான இளவரசியின் மகன் விவேக் ஜெயராமன் திருமணம் செய்துள்ளார். இந்த திருமணத்தை ஜெயலலிதா ஏற்க மறுத்தார். இத்தனைக்கும் விவேக், போயஸ் கார்டனிலேயே வளர்ந்தவர். ஜெயலலிதாவின் செல்லப் பிள்ளை. ஆனாலும் கட்டை பாஸ்கர் என்ற கடத்தல் மன்னன் குடும்பத்தில் விவேக் திருமணம் செய்வதை ஜெயலலிதா ஏற்கவில்லை.

விவேக்கைப் பொறுத்தவரையில் சசிகலா குடும்பத்தின் மிடாஸ் மதுபான ஆலை, ஜெயா டிவி உள்ளிட்டவைகளை நிர்வகித்து வருகிறார். சசிகலா சிறையில் இருந்த போது விவேக்குக்கும் டிடிவி தினகரனுக்கும் இடையே பல மனக்கசப்புகள் ஏற்பட்டதற்கும் இந்த நிர்வாகங்கள் அடிப்படையிலான பொருளாதார சிக்கல்தான் காரணமாம்.

சசிகலா, விவேக் குடும்பங்கள் மீது வருமான வரித்துறை சோதனை நடந்தால் அதில் கட்டை பாஸ்கர் வீடும் சிக்குவது உண்டு. கடந்த சில ஆண்டுகளுக்கு சசிகலாவின் ஒட்டுமொத்த சொந்தங்களுக்கும் எதிராக வருமான் வரித்துறை மெகா ரெய்டு நடத்தியது. அதில் கட்டை பாஸ்கர் வீடும் அடக்கம்.

அதேபோல் 2 ஆண்டுகளுக்கு முன்னர் கட்டை பாஸ்கர் ஆந்திரா போலீசிடம் சிக்கினார். அப்போது ஆந்திரா போலீசாரிடன் நான் யார் தெரியுமா? என உதார்விட்டார் கட்டை பாஸ்கர். ஆனால் போலீசார் கொத்தாக அவரை கைது செய்தது. இந்த நிலையில் மீண்டும் செம்மரக் கடத்தல் வழக்கில் கட்டை பாஸ்கர், வருவாய்ப் புலனாய்வுத்துறையினரால் கைது செய்யப்பட்டுள்ளார்.

கட்டை பாஸ்கரிடம் தொடர்ந்து வருவாய் புலனாய்வுத்துறையினர் விசாரணை நடத்தி வருகின்றனர். செம்மரக் கடத்தல் தொடர்பான மேலும் சில புள்ளிகள் தொடர்பான விவரங்களை பெறுவதில் வருவாய்ப் புலனாய்வுத்துறையினர் மும்முரமாக இருக்கின்றனராம். கட்டை பாஸ்கர் இதற்கு முன்னர் சிக்கி இருந்தாலும் இப்போது அவரிடம் சில விவரங்களைப் பெற்றே ஆக வேண்டும் என்பதில் அதிகாரிகள் உறுதியாக இருக்கின்றனராம். அதனால்தான் இந்த கைது நடவடிக்கையே மேற்கொள்ளப்பட்டதாம்.

English summary

Directorate Revenue Intelligence grills Red sander Kattai Baskar. Kattai Baskar was arrested for Red sandle smuggling.