நகர்ப்புற உள்ளாட்சித் தேர்தலில் தேமுதிக தனித்து போட்டி; விஜயகாந்த் திட்டவட்டம்!

Updated: Monday, November 29, 2021, 20:55 [IST]

Subscribe to Oneindia Tamil

சென்னை: நகர்ப்புற உள்ளாட்சித் தேர்தலில் தேமுதிக தனித்து போட்டியிடும் என அக்கட்சியின் தலைவர் விஜயகாந்த் திட்டவட்டமாக அறிவித்துவிட்டார்.

இதன் மூலம் எந்தக் கட்சியுடனும் தேமுதிக கூட்டணி வைக்கப்போவதில்லை என்பதை தெளிவுப்படுத்தி யூகங்களுக்கு முற்றுப்புள்ளி வைத்துவிட்டார்.

நகர்ப்புற உள்ளாட்சித் தேர்தலில் தேமுதிக சார்பில் போட்டியிட விரும்புவோர் டிசம்பர் 1-ம் தேதி முதல் 7-ம் தேதி வரை மாவட்ட அலுவலகங்களில் விருப்பமனு கொடுக்கலாம் என விஜயகாந்த் கேட்டுக்கொண்டுள்ளார்.

நகர்ப்புற உள்ளாட்சி

டிசம்பர் மாத இறுதியில் நகர்ப்புற உள்ளாட்சித் தேர்தல் நடைபெறும் என எதிர்பார்க்கப்படும் நிலையில், அரசியல் கட்சிகள் அதற்காக தங்களை ஆயத்தப்படுத்தி வருகின்றன. ஒவ்வொரு கட்சியிலும் விருப்பமனு பெறும் படலம் தொடங்கியிருப்பதோடு கூட்டணி விவகாரம் கூட ஏறத்தாழ இறுதிசெய்யப்பட்டு சீட் பங்கீடு தொடர்பான பேச்சுவார்த்தைகள் தொடங்கவுள்ளன. இந்நிலையில் தேமுதிக யாருடன் கூட்டணி சேரும் என அரசியல் நோக்கர்கள் உட்பட பலரும் ஆவலோடு எதிர்பார்த்து காத்திருக்கும் வேளையில் வழக்கம் போல் துணிச்சலான அறிவிப்பை வெளியிட்டுள்ளார் விஜயகாந்த்.

தனித்து போட்டி

அதாவது நகர்ப்புற உள்ளாட்சித் தேர்தலில் தேமுதிக தனித்து போட்டியிடும் என திட்டவட்டமாக தெரிவித்துள்ள விஜயகாந்த் யாரையும் நம்பியும் தாம் கட்சி தொடங்கவில்லை என்பதை சூசகமாக உணர்த்திவிட்டார். மேலும், தேமுதிகவில் அடிப்படை உறுப்பினராக இருந்தால் கூட எந்தப் பதவிக்கும் போட்டியிட விருப்பமனு அளிக்கலாம் எனத் தெரிவித்திருக்கிறார். டிசம்பர் 1-ம் தேதி முதல் 7-ம் தேதி வரை விருப்பமனு வழங்க கால அவகாசமும் அளித்திருக்கிறார்.

விஜயகாந்த் பேச்சு

திமுக கூட்டணியில் அல்லது பாஜக கூட்டணியில் தேமுதிக இணையக் கூடும் என அரசியல் ஆருடங்கள் கூறப்பட்டு வந்த நிலையில் அதனை தவிடுபொடியாக்கும் வகையில் அதிரடி காட்டியிருக்கிறார் விஜயகாந்த். மக்களுடனும் இறைவனுடம் மட்டுமே இந்த விஜயகாந்த் கூட்டணி வைப்பேன் என அவர் உடல்நலம் நன்றாக இருந்த போது பல மேடைகளில் பேசியிருப்பது திரும்பிப்பார்க்கத் தக்கது.

தொண்டர்கள்

இதனிடையே தனித்து போட்டி என்ற முடிவை தேமுதிக நிர்வாகிகளும், தொண்டர்களும் எந்தளவுக்கு ஏற்றுக்கொள்ளப்போகிறார்கள் எனத் தெரியவில்லை. தற்போதுள்ள அரசியல் சூழலில் தனித்துக் களம் கண்டால் அது கட்சிக்கு தான் பின்னடைவை தரக்கூடும் என பலரும் அஞ்சுவதும் கவனிக்கத்தக்கது.