ரொம்ப யோசிக்க வேண்டாம்.. நல்லதே நடக்கும்.. பராசக்தி பரபரப்புக்கு நடுவே.. சிவகார்த்திகேயன் கூல் பேச்சு
திருச்சி: விஜய்யின் ஜனநாயகன் படத்தை போன்றே பராசக்தி படத்திற்கும் தணிக்கை சான்றிதழ் தற்போது வரை வழங்கப்படாத நிலையில் படம் ரிலீஸ் ஆகுமா என கேள்வி எழுந்துள்ளது. இந்த நிலையில் ரொம்ப யோசிக்க வேண்டாம்.. நல்லதே நடக்கும்.. என சிவகார்த்திகேயன் பேசிய வீடியோ டிரெண்ட் ஆகி வருகிறது.
பராசக்தி திரைப்படம் வரும் 10 ஆம் தேதி வெளியாகும் என அறிவிக்கப்பட்டது. டான் பிக்சர்ஸ் தயாரிப்பில் சிவகார்த்திகேயன், மோகன் ரவி, அதர்வா, ஸ்ரீலீலா நடிபில் சுதா கொங்கரா இயக்கத்தில் இந்த படம் உருவாகியுள்ளது.
படம் நாளை மறுநாள் வெளியாக உள்ள நிலையில் படத்திற்கு இன்னமும் தணிக்கை சான்றிதழ் வழங்கப்படவில்லை. இதனால் ஜனநாயகன் படம் போல பராசக்தி படமும் வெளியாகுமா? என எதிர்பார்ப்பு ஏற்பட்டுள்ளது. இந்தநிலையில் நல்லதே நடக்கும்.. ரொம்ப யோசிக்க வேண்டாம் என சிவகார்த்திகேயன் பேசியுள்ளது.
திருச்சியில் நடிகர் சிவகார்த்திகேயன் பேசியதாவது:- இந்த படம் என்ன பேசுகின்றது என்பது தான் ரொம்ப ரொம்ப முக்கியம். இந்த படம் பண்றதுக்கு மிக முக்கியமான காரணம் இந்த கதை உண்மை சம்பவங்களின் அடிப்படையானது. நம்ம மொழிக்காக.. நம்ம மண்ணுக்காக.. தமிழுக்காக உயிரை விட்ட நிறைய பேர் அவங்களுடைய முயற்சி என்ன? தியாகம் என்ன? என்பதை அவங்களுக்கு வணக்கம் சொல்கிறது மாதிரியான படம் தான் இந்த படம்.
இப்படிப்பட்ட கதை இருப்பதனால் தான் இவ்வளவு பெரிய நடிகர்கள் எல்லாரும் இதற்கு ஒத்துக்கொண்டனர். எல்லாரும் சேர்ந்தே ஓடுவோம், சேர்ந்தே ஜெயிப்போம்.. என்ன கவலை இருந்தாலும் ரொம்ப யோசிக்க வேண்டாம்.. நல்லதே நடக்கும்.. நல்லதே நடக்கும். நல்லதே நடக்கும்.. என்று கூறினார்.
அப்போது சிவகார்த்திகேயன், ரஜினிகாந்தின் டயலாக்கான பராசக்தி ஹீரோ டா என்ற டயலாக்கையும் பேசினார். பேரை கேட்டதும் சும்மா அதிருதுல்லா.. என்றும் ரஜினி வாய்சில் மிமிக்ரி செய்தார். இந்த நிலையில் வரும் 10 ஆம் தேதி திரையரங்குகளில் படம் ரிலீஸ் ஆகும் என டான் பிக்சர்ஸ் மீண்டும் ஒரு ட்வீட் பதிவிட்டுள்ளது. இதனால் ரசிகர்கள் உற்சாகமடைந்துள்ளனர்.
Click it and Unblock the Notifications
Sign in with Google