பல்கலைக்கழகங்களை அறிவாலயங்களாக மாற்றிவிடாதீர்கள் - தமிழிசை செளந்தரராஜன் காட்டம்

Updated: Thursday, April 17, 2025, 11:40 [IST]

Subscribe to Oneindia Tamil

சென்னை: பல்கலைக்கழகங்களை கட்சி தலைமை அலுவலகமாக மாற்றிவிடாதீர்கள். அறிவு அரங்கமாக இருக்க வேண்டிய பல்கலைக்கழகங்களை அறிவாலயங்களாக மாற்றி விடாதீர்கள். உங்கள் விருப்பு வெறுப்பிற்கு ஏற்ப தமிழக மாணவர்களின் எதிர்காலத்தை சிதைக்கிறீர்கள். நம் இந்திய குழந்தைகளை உலக அரங்கிற்கு உயர்த்துவதுதான் புதிய கல்விக் கொள்கை என்று பாஜக மூத்த தலைவர் தமிழிசை செளந்தரராஜன் தெரிவித்துள்ளார்.

தமிழ்நாட்டில் உயர் கல்வியை மேம்படுத்துவதற்காக பல்கலைக்கழகங்களின் துணை வேந்தர்கள் மற்றும் பதிவாளர்களுடனான ஆலோசனை கூட்டம் நேற்று நடைபெற்றது. சென்னை தலைமைச் செயலகத்தில் நடைபெற்ற இந்தக் கூட்டத்துக்கு முதல்வர் முக ஸ்டாலின் தலைமை வகித்தார்.. இந்தக் கூட்டத்தில் பல்கலைக்கழகங்களின் செயல்பாடுகள், திட்டங்கள் உள்ளிட்டவை குறித்து விவாதிக்கப்பட்டன.

மேலும், பல்கலைக்கழகங்களில் பகுத்தறிவுக்கு ஒவ்வாத கருத்துகளை மாணவர்களுக்கு இடையே பரப்பக் கூடாது என்று பல்கலைக்கழகத் துணை வேந்தர்களுக்கு முதல்வர் மு.க.ஸ்டாலின் உத்தரவிட்டுள்ளார்.

இதுகுறித்து பாஜக மூத்த தலைவர் தமிழிசை செளந்தரராஜன் வெளியிட்டுள்ள எக்ஸ் தளப்பதிவில் கூறியுள்ளதாவது: தமிழக முதல்வர் மு.க.ஸ்டாலின் நீங்கள் நேற்று துணை வேந்தர்களை கூப்பிட்டு என்ன சொல்லி இருக்கிறீர்களோ அதுதான் புதிய கல்வி கொள்கை.. நீங்கள் ஒருவர் பேசுவதற்காக மட்டும் எழுதி கொடுக்கப்பட்டது அல்ல அது. மரியாதைக்குரிய கஸ்தூரி ரங்கன் தலைமையில். பல லட்சம் கல்வியாளர்களிடம் கருத்து கேட்டு கொண்டுவரப்பட்டது புதிய கல்விக் கொள்கை.

அதை அறிமுகப்படுத்தும்போது பிரதமர் மோடி சொன்னது நம் இந்திய குழந்தைகளை வகுப்பறையில் இருந்து உலக அரங்கிற்கு உயர்த்துவது தான் இந்த கல்வி ஆக புதிய கல்விக் கொள்கையை முற்றிலுமாக படிக்காமல் மற்ற மாநிலங்கள் எல்லாம் பின்பற்றி மாணவ மாணவிகளை உலக அரங்கிற்கு உயர்த்திக் கொண்டிருக்கும்போது நீங்கள் மோடி எதிர்ப்பு என்ற கருப்பு கண்ணாடியை போட்டுக்கொண்டு உங்கள் விருப்பு வெறுப்பிற்கு ஏற்ப தமிழக மாணவ மாணவர்களின் எதிர்காலத்தை சிதைத்து கொண்டிருக்கிறீர்கள்.

உலகளாவிய தலைமையகமாக தமிழக பல்கலைக்கழகங்கள் திகழ வேண்டும்... என்று என்று சொல்லிவிட்டு பல்கலைக்கழகங்களை உங்கள் தலைமைக் கழக அலுவலகங்களாக மாற்றி விடாதீர்கள். அறிவு அரங்கமாக இருக்க வேண்டிய பல்கலைக்கழகங்களை உங்கள் அறிவாலயங்களாக மாற்றி விடாதீர்கள் என்று தெரிவித்துள்ளார்.